Zomi leh Myanmar 2010 Election [opinion]

Myanmar 2010 election vai hi ta leh, economic sanction vai hi ta leh, gamsung gampua a om Zomi te’n ngaihsutna tuamtuam a om ding mah hi. Ei bek hi lo, Kawlte leh gamdang mi nam tuamtuam ten zong ngaihsutna tampi neitek uhi.

Daw Aung San Suu Kyi in September 25, 2009 a Sr. General Than Shwe kiang a laikhak na ah – a ngetna te – ngaihsak in Diplomatic representatives ( UK, USA and Australia) tawh October 9, 2009 ni in ki muthei uh a hi teh… thu hoih zaw khat peuh ong piang ding lam en pong hangh e. Tulai teng, Yangon ah Than Shwe leh Daw Suu zong ki mu ding cihbang thuthang hiau hiau kiza hi.

Ei Zomi te a ding in, kim leh pam thu piang leh, mite kalsuanzia ih etcik mahmah ding kisam ding hi.

ZNC election ah ki heal ding leh lo ding pen, makai te thu hi ding hi. Tu ta dih in, kihel nuam mah leng zong a kihel thei din mun ki hi nai lo – illegal party a ong kiciam teh hilai mawk in.

A tom in,
- Abeisa kum 20 sung a Daw Suu leh NLD policy a hi ” sanction and isolation” tawh ih gam kilamdang thei mahmah lo a hi teh, lampi dang khat tawh kalsaun ding kisam hi.
- Myanmar 2010 election tawh kisai in, thu tampi ong ki khel lai thei ding din mun a hih man in, ei bang a Kawlgam ah minam tamlua het lo ten, ei leh ei kong kikhak khum a – nungngat san ding pen thupai zia ding hilo hi.
- Kawlgam a Budist te makaih na tawh thahat lua in – mipi in a mau thu ong neisak luat khak ding uh zong – ei anungta Pasian a um te ading in, ih mailam ding thu ngaihven mahmah ding kisam sa ingh.

Tuhun kim leh pam in bang gen a, bang thupiang a, abeisa leh ong pailai ding hun te – ih etsiam, ih kalsuan theih leh Zomite ih mailam ong nuam ding hi.

“Kawl mangpa thu akpi in phiatnelh” ih pute ih pate in paunak a neih uh phawk in – Zomite Kawlgam kumpi tawh kizopna ah nung leh ma, kim le pam khuahun mit haksa, bil honsa in ih mailam policy ding ngel thei ding in Pasian in lam honglak hen.

Gin Mang
October 9, 2009