Zogam News 25 January 2010

1. Nung kal sungin Aizawl Khuapi sung Veng tuamtuam panin Kawlgam mi 47 kiman a, tua sung panin 14 pen bail kiphal lo hi. Mi 35 pen bail kiphalsak a, ahi zongin a bail ding mi kimu loin thongah kikoih cih thu kiza.  Gamdang mi hihna tawh kisai ahih manin a bail dingin kumpi nasem a niam pen LDC (Lower Divisional Clerk) hi dinga, tua banah sum Rs.5000/- koih kholh kul ahih manin a bail ding mi om lo hi. A bail ding mi a om loh ciangin Kawlgamah puak ding kici a, ahi zongin amaute ngetna bangin Thongah koih kik zaw hi ci-in mizoaw in gen.

2. Chennai khuapi-a Reach Home Children Foundation panin Manipur mi naupang 17 kihonkhia cih thu Chennai Zomi Welfare Committee in gen. Hih naupang kepna munah July 28, 2009 ni-in Manipur panin naupang pasal 8 leh numei 9 kipuak hi. Laisim sak ding ci-in nu leh pate phalna tawh a pai pen lai kisim sak loin room (khan) neu khat sungah  kikhum cipin, bawlsia mahmah uh a, satna, betna tampi a thuak banah a numeite zong kibawlsia cih kiza. A upa pen kum 12 bek hi a, a omna uh siangtho lo an gina ne lo uh ahih manin cithak vei-in gen thei takin kikem cih thu a kizak ciangin a inn vengte in Policete kiangah ko a, Police makaihna tawh Child Welfare Committee (CWM) makaipa Dr. P. Manorama in va lakhia hi. Tu-in CWM malakna tawh kumpite in zatui tawh kem uh a, a sawt loin Manipurah kipuak ding cih kiza hi. Hih tawh kisai a muanmawh Manipur mi  Lumci kici pen hih bang lam sema minthang khat hi cih thu kiza.

3. Assam gamnuaimi  ULFA makaipipa Paresh Barua matna ding tawh kisai-in Kawlgam kumpi in India kumpi deihna bangin huh ding cih kiza. Paresh Barua pen Kachin gam nuai mite lakah kibu dingin ummawh uh a, Kawlgam galkapte leh India galkapte in kha nih, khathum sungin mat sawm ding ci-in Press Trust of India gen.

4. Pu Lienkhothang IES Memorial Football, 2010 kimawlna Mimbung khua-ah Jan.13-16, 2010 sung thupi takin om cih zogam.com in gen. Hih kimawlna-ah Hiangmun, Teikhang, Kawlbem, Selam, Suangbem, Sinzawl leh Mimbung khua panin Team 16 kihel a, Mimbung MCN-A in khatna, Friends,(Sinzawl) in nihna ngah hi. Khatnate in Haipi leh sum Rs.10,000 sangin, nihna in Haipi leh sum Rs.7,000 ngah hi. Pu Lienkhothang pen kum 1974 kumin Lamka-ah pianga,  Mimbung nungak Rebecca Thuamngaihzual tawh 2003 kumin kitengin ta nih nei hi.1997 kumin Indian Engineering Service (IES) a zawh khit ciangin Meileng lampi bawlna lamah sem a, Jiribam-Tupul kikal bawlin Silcharah Project Deputy Officer a sep laitakin April 7, 2008 ni-in accidentah si hi. Amah  phawk tawntungna dingin a zi leh tate in Memorial Football Tourment a bawl uh ahi hi.

GK