Yangon Khuapi Zinna By Rev. Dr. J.M. Ngul Khan Pau

YANGON KHUAPI ZINNA
March 2-9, 2009

2003 kumin Yangon khuapi-ah ka zi Lucy Engjadim tawh Pasian thugenna hun manpha mahmah ni bang zah sung hiam ka zang ngei uh hi. Tutung in zong Topa thupha tangin hun manpha mahmah zang kik thei ka hih manun Ama hehpihna ka phat uh hi.

March 1, 2009 ni in Jet Lite tawh Guwahati panin Kolkata zuanin zing nai 8:00 in ka lengkhia uh a, Kolkata Airport ah Lian Naulak in a mawtaw thak liklek tawh hong dawn hi. Lian pen Shillong ah College leh University a kah lai pek panin kitheisa ka hih manun vanleng tual panin gen nop pawlkhat gen kawmkawmin ka giahna ding uh Hotel Heritage ka tung uh hi. Tua hotel giah man Sia Lalzamang leh a zi Boinute’n hong siksak uh a, tua nitak zong ann lim pha mahmah tawh hong vak uh hi. Zomi Christian Fellowship, Kolkata kikhopna sun hun nai 12:00-2:30 sungah thugenna hunpha hong pia uh hi. Tu kum sung Kolkata ZCF Committee-ah: Chairman Pa Gin Khan Chin, Secretary Pa Lalawmpuia ahi uh hi.

March 2, 2009 ni in Indian Airline tawh Netaji Subhas Chandra Bose International Airport panin ka lengkhia uh a, nai nih sung khawng ka len zawh uh ciangin Yangon khuapi kimu zihziah hi. Yangon International Airport ah Rev. Lam Cin Thang, Sia David Nawl Tling leh a zi Go Ngaih Lun (ka tu nu) leh a tano uh Elizabeth te’n hong dawn uh hi.

Yangon khuapi pen thupi kasak mahmah na uh thunih om hi. Khatna-ah mawtaw horn zang se lo uh hi. A nihna ah siangtho mahmah hi. Ka tunna ding uh Eastern Hotel ah hong kha uh a, Dimnu tawh Pasian kiangah lungdam ka ko uh hi. Tua nitak Sia Lam Cin Thang leh a zi in Yangon a fast food minthang mahmah khat ah ann hong nekpih uh hi. Sia Thang Khan Khen leh a tate’n tua nitakin ka tunna uh hotel hong pha uh hi.

March 3, 2009 ni in All Nations Theological Seminary (ANTS) ah ka hawh uh a, siate tawh hansuahna hun ka zangkhawm uh hi. Hunbit nasem sia 5 leh huhsia 5 mah om hi. Tua hun ka man zawh uh ciangin amau Pasian thuhilhna (outreach) mun ka pha uh a, naupang tampi nipi kal khat sung hilh ding uh hi. Hih naupangte sangkah zo lo, khualak khawngah a vakthap, a om mawkmawk te hi uh a, a nu leh pate uh nek leh tak zongin sun thapai nasem uh ahih manin – kem manlo, pattah manlo uh hi. Kawllai thei lo, Jesu Khris hong tatkhiatna thu zong thei vet lo uh hi. Tua panin annsai khat Sakhi leh Sazuk sa kingah theihnaah zingann lim mahmah hong nekpih uh hi. Tua nitak Rev. Kham Sian Khup leh Sia Thang Khan Khen te’n Sen annsai-ah ann hong nekpih uh a – ngasa, aksa a-kipan duh bangbangin baal nekin ka ne uh hi. Rev. Khup pen ko innkuan tawh ka kitheih zawh uh sawtpi hi zoin, tu’n Master of Divinity a kum nihna Mandalay ah a sin laitak hi. Pasian thupha tangin hong zawh nading thungetna ka neihsak hi.

March 4, 2009 ni in Sia Aung Mang hong pai a, amau sanginn MEGST ka pha hi. Amau siate tawh Development Associates International te’ saina nuaiah Master of Art in Organizational Management and Leadership tawh kisai kikupna ka nei uh hi. Amau zong a program hoih tuak sa ahih manin kikup behlap lai ding thukimin ka kikhen uh hi. Tua laiah zingann hong nekpih uh a, thu leh la kiza kik ni, ci-in ka kikhen uh hi. Nitak lamin Mynamar Baptist Convention (MBC) office ka pha uh a, Rev. Zaw Win, General Secretary thak tawh kimeltheihna leh Council of Baptist Churches in Norht-East India (CBCNEI) leh MBC bang ci pang khawm thei ding cih kikupna ka nei uh hi. Amah Asho Chin minam sung pan ahih manin hong sanggam bawlin thukikupna zong nuamtakin ka zang thei uh hi. Sia Lam Cin Thang in hong makaih a, Rev. Kip Thian Pau, MBC Literature Director zum leh nasepna, laikhetna phualpi ka en uh hi. Tua nitak in Rev. Dr. Simon Pau Khan En makaihna tawh Tedim Baptist Church (TBC) upate’n nitak ann hong nekpih uh a, kamkumna tawh zong kizom suak hi. Sia Lam leh a lawmnu in zong hong zui thei uh hi. Sia Enno tawh mailam kalsuanzia ding leh Rev. Aung Mang te tawh ka kihona thu ka zasak hi.

March 5, 2009 ni in ka tunu uh Go Ngaih Lun leh a lawmpa David te’ nasepna mun en dingin zingsang niangdawn zawh ciangin taxi air condition tawh hong pui uh hi. Amau omna pen Yangon vanlengtual tawh kinai kik bilbel a, khuapi khantohna ding geelna mun lam hi leh kilawm hi. Naupang 45 a kepna uh ah thugenna hun ka nei uh a, naupangte’n la siam takin hong sa uh hi. Nek leh tak amau tawh ne khawm bek tham loin sanginn hoih mahmahah kahsak uh ahih manin hih naupangte genthei innsung pan ahih hangun hih bang hamphatna a ngah theih manun Pasian min ka phat uh hi. Amau zong a sawt loin Khamtungah gospel pai ding; gupna thu tangko ding ciin kilim sin mahmah uh hi. A Lai Siangtho Sanginn uh va pha in thungetna ka nei uh hi. B.Th. ciang sinna hi a, tuni dongin Pasian hehpihna tawh paito thei hi. Amau tawh Yangon Shopping Mall pawlkhatah hawh in nitak ann zong hong nekpih uh hi. ‘Pasian Gam leh Ama Deihna zong masa ding’ in thungetna ka neihkhop zawh uh ciangin ka kikhen uh hi.

March 6, 2009 ni in Yangon Sizang Baptist Church ah Sia Pau makaihna tawh Spiritual Journey cih thupi a neiin thusinna kinei a, pawlpi makai a kipanin nu leh pa nungak leh tangval mi 150 pawl hong kihel thei hi. Thusin khatna ah “Johari Window” (I nuntakna mite theih dinga i phal, mite theihloh leh ei bek in i theih, ei nangawnin i theihloh) cih sinna kinei hi. Niangtui dawn zawh ciangin thusinna nihna ah “Thu um lote lungsim” Lai Siangtho in bang ci gen hiam cih sinna kinei a, hun thumna ah “Thu um mite lungsim” leh a nunung penah “Deeper Christian Living” cihte kisin hi. Sun annek zawh in Dimnu in zong numeite tawh kisai hun hong zang hi. YSBC upate’ thusiamna tawh sun ann lim mahmah leh niangtui leh moh a kihel teng khempeuh hong vaak piikpeek uh hi. Hih bang thusinna neih tohtoh ding lunggulhna leh Pasian tungah ki-apna kineiin ka kikhen phot uh hi.

March 7, 2009 ni in Myanmar Institute of Theology (MIT) graduation day ah ka kihel thei a, Lai Siangtho sanginn tuamtuam MIT nuaia kizopna nei khempeuhte in Lai Zawhna Laipi ngah uh hi. Zomi a kisim thei ding mi 40 taang bang pha dingin ka um hi. Siapi Simon Pau Khan En vaihawm siamna tawh hun geelna thupi mahmah kizang thei hi. YSBC panin lai zawhna letmat a ngah mi li pha uh a, amau tawh sun ann ne khawmin Pasian tungah lungdam kohna hun ka zangkhawm uh hi. Pawlpi in zong mawtaw nih dimin hih program va uap uh hi. Tua nitakin MIT makaihna tawh Yangon sunga Pawlpi makaite Hotel Panda ah lungdam kohna leh ann nekkhopna om a, ko nupa zong tua laiah kihel dingin sapna ngah ka hih manun lungdamtakin ka kihel uh hi. Zomi, Kawlgam gam bup Khristian kipawlna leh vai tuamtuam ah makai sem ka muh ciangin “Topa laptoh Zomite” cih la ka lungsungah hong ging velval hi.

March 8, 2009 Nipi ni zing nai 8:30-10:30 in Tedim Baptist Church (TBC) ah kikhawmin Mark 11:12-26 sung siksanin thugenna hun ka zang hi. Biakinn mi dim zihziah bek tham loin a pua lamah zong tut leh din thuah tampi na om uh hi. Siapi Dr. Simon Pau Khan En senior pastor sepna ahih manin thu leh la nuam mahmah hi. Rev. Khoi Lam Thang, Secretary, Bible Society of Myanmar tawh pulpit zang khawm thei ka hih manin hampha ka kisa hi. Tedim Baptist upate in kei Zopuan hoih mahmah leh ka zi Dimnu puandum hoih mahmah hong silhsak uh hi. Hong itna uh leh hong pahtawina uh thupi kasa a, ka mangngilh kei ding uh hi.

Tua panin Sizang Baptist Church ah 11:00-1:00 hun ka zang a, Ephesians 5:16-21 sung siksanin Khristian kalsuanzia nam guk ka gen hi. Sizang Tuiphum Pawlpi upate’n kei Sizang puan hong silhsak a, Dimnu puanza hoih pha mahmah pia uh hi. Hih bang kipahtawina leh ki-itna lungdamhuai a vaihawm makaite hangin Pasian tungah lungdam ka ko uh hi.

Nitak nai 2:30-4:30 sung Full Gospel Church, Zo Hun ah thugen dingin ka pai leuleu uh a, Dr. Mungtawng leh pawlpi upate’n Khris itna tawh hong na muak uh hi. Biak piakna nuam mahmah khitui luang ziahziah thei dingin hun kizang a, tua zawh ciangin thugenna hun ka zang hi. Sawltak 1:8-23 sung siksanin Bang hangin Khristian masate’n leitung lumlet uh hiam? cih ka gen hi. A lamdang mahmah khat pen, ka thugen zawh ciangin Sia Mungtawng in pulpit lamah Dimnu tawh hong sam a, Pawlpi mite kiangah, “Siate’ ading thungetsak ni, itna sum zong dawng ding hi hang,” ci hi. Khitui tawh thu hong kingetsak pen sum tawh kileitheilo hamphatna hi. Itna sum kidong Kawl sumin 1,47,000/- pha hi. Ko zong Pawlpi in naupang camp ding a vaihawmna uh huhna in tul 47,000 Sia Mungtawng khutah ka ap uh hi. Siapa in tua tulza pen dollar in hong pia a, $ 100 ka ngah uh hi. Hih sum seed money (khaici sum) adingin ka koih tuam uh hi. Pasian in pha hong sakpih a America ka pai theih uh leh hih sum a bulpi dingin ka kem uh hi. I biak Pasian in ko nupa nuntaknaah na lamdang hong sem kik a, Mikang hih zah lawm ka neih hangun Mikang gamah thugenin hih zah vei ka pai hangun hih bang kideihsakna ka tuak ngei kei uh hi. Zomite’ zangin ko innkuan Topa Pasian in thupha hong pia tawntung hi.

Ka lungsimah Late 121:1 “Mualtung lam ka ento a keima huhna koi lai pan hong pai hiam? Keima huhna van leh lei a bawlpa kiang pan hong pai hi,” cih leh “Elijah Pasian” ahihna hong phawksak hi. Kialpi tun laitakin Pasian in Elijah kiangah, “Tho inla Sidon gam, Zarephath khuaah pai in, tua laiah meigong khatin nang hong vak ding hi,” ci hi (I Kum 17:9). Bang hangin Pasian in a kamsangpa Kumpi innah sawl loin meigong, khatvei bek nek ding ann a nei kiangah sawl ahi hiam? Annel tawmkha leh sathau a neih zangin Pasian ahihna lak hi. Pasian in tua ann bung leh sathau bung zangin kialpi sung khempeuh a nasempa ann na vak hi.

Leitung gam thupi leh gam nuamzawte ah Pasian huhna tawh ka zin koikoi zo hi. Kei adingin sum leh pai ngen hiloin Pawlpi ading huhna ka ngen hi. Mikangte zong a hauhzah uh tawh tehin piakkhiatna lamah cingh mahmah hetlo uh hi. Midangte adingin Pasian in namdangte zang hi. Kei adingin, tu ciangciang, Pasian in Zomi te zang hi. I neih loh lam ka thei hi, i haksat lam ka mu hi. Tua bang hi pipi kimlai itna tawh hong piakhia Zomite’ hong deihsakna thupi kasa hi.

Rev. Dr. J.M. Ngul Khan Pau
General Secretary
Council of Baptist Churches in North East India (CBCNEI)
Guwahati, Assam, India
June 4, 2009