USA Zomi Communities Cup Report

USA gam sung a Zomi a tampen a ten’na, Zomi bekbek inn (120) val, mimal vekpi (600) apha, USA Zomi Capital a kici Tulsa khuapi a om Zomi-te a’ding in, Confederation Cup man khinta ahih hang, USA Zomi Communities Cup kisuilai ding ahih manin, nungak tangval, nupi papi in July 4 hong tunkaal ding kingaklah mahmah hi.

July 4 ni pen USA gam’ suahtakni hi a, gammite pawi kham ni khat hi bilbel hi. Khuakhal ni a sa’t mahmah laitak hi a, nitak lam ciang bangin khuahun asatna 100degreeF kah velvel ahih manin, lawpna lian mahmah napi, khuahun kilung himawh simpian hi. Zomi-te’ pawlpi tuamtuamte in khuahun a nopna dingin thu kihahnget mahmah hi. Nupi pawl khat bangin antang in, khuahun a satluatlohna ding thu ngen uhhi. Khuahun a genkhol TV nasemte in July 4 ni pen a satna 102 degree F akah dingin ummawhmawk uhhi.

USA Zomi Communities Cup bawhlung kidemna pawi pen Zomi Innkuan Oklahoma kipawlna innteekna tawh a kibawl ding hi a, Zomi Innkuan USA – 2009 Kumcin Khawmpi Tulsa khuapi ah July 4, 2009 ni in kibawl ding ahih manin, Khawmpi muakna in, innteekte in USA gam sung mun tuamtuam a om Zomi-te a kimawl dingin zawnin bawhlung suih a kidem ding ahi hi.

Zomi Innkuan Oklahoma kipawlna in ahuam, innteek Zomi-te sung panin anuai a bawhlung Team-te hong ding uhhi. Thawnpi, Khanpi leh Langkhai makai in Zomi Innkuan Oklahoma – A Team, Sianlal leh Khaipi makai in Zomi Innkuan Oklahoma – B Team, Hegin leh Seilal makai in Zomi Innkuan Oklahoma – Kuki Team cih bangin Team (3) hong kithawi uhhi.

USA Zomi Communities Cup a tuh dingin khual panin anuai a kimawl pawlte (Team-te) hong kuan uhhi.

Florida Zomi Innkuan, Chicago Zomi Innkuan, Zomi Innkuan Iowa , Dumas Zomi Innkuan, Kansa Zomi Innkuan leh Oklahoma City Zomi-te cih bangin khual pan Team (6) hong kuan uhhi.

Innteek Zomi Innkuan Oklahoma kipawlna in kimawlna tawh kisai vai khempeuh avaan dingin Sports Committee khat seh uh a, Pa Thang Suan Gin makai in, Pa Nang Sian Sum in thusa sem a, innteek Team-te’ makai teng tawh panmun hong la uhhi. Muanna tawh a kiseh ahih bangmah in, kimawlna lawhcing takin a kibawl zawhna dingin nakpi in hanciam uhhi. Kimawlna sung ah abei ding sum leh paai kisamteng nangawm, innteek min tawh a kimawl ding mimal kim tung pan in sum kidong uh a, khua leh tui, kipawlna leh minam ading deihsakna lianpi tawh nakpi takin ma pang uhhi.

USA Zomi Communities Cup bawhlung kidemna sung pan a khatna ngahte leh a nihna ngahte, kimawl a siampen pa, kungpang a siampen pa cihte pahtawina Cup/Trophy, Medals leh sumtang mahmah piak dingin kigeel a, Burmese Christian Assembly pawlpi’ Senior Pastor, Rev. Suan Za Lian in, khua leh tui ading a deihsakna, khangnote tha apiak nopna leh apianna a Nu a pahtawina tawh, Cup/Trophy leh Medals teng khempeuh hong guan hi. Rev.Dr. Seikam in a makaih, Asian Baptist Church pawlpi inzong kimawl hun sungteng a kizang dingin pawlpi’ Sound System-te khua leh tui ading deihsakna tawh phaltak in hong zangsak hi. International Full Gospel Assembly pawlpi Pastor Rev. Pau Khan Mung inzong pawi hun sungteng a kisapna bangin zat dingin a mawtawpi hong kawm hi.

July 3, 2009 ni in a kimawl ding Team pawl khatte leh Khawmpi akah ding makaite zin hong tungta uhhi. Ahong tungbaihte bang Oral Roberts University huang sung a tualpite ah kisin in diang phangphang uhhi. Khual panin in ahong tung nunung pen, Dumas pawl leh Kansas pawl pen, khuaveng (State veng) ahih manun, kimawl ni dingin hong zing tun uhhi.

A kimawl ding tawh, Khawmpi akah ding tawh, Tulsa khuapi ah zin leh leeng, Zomi mimal vekpi (150) val pha ahih manin, khuanu khuapa inn bulpite leh zinte meeltheih tanau teng pen zindo in, kimanlah mahmah hi. Tualpi ah sun an kivaak ding ahih manin, khuanu khuapate leh Pawlpite pangkhawm in annek tuidawn kivaihawm hi. (Zindona leh Khawmpi panpihna tawh kisai Lungdam Kohna atuam in kipulak ding hi).

Pawipi ni, July 4 ni zingsang lam in nalamdang khat hong piang hi. Khawmpi kahte thu kikum in a manlah laitak, innteek kimawl ding Team-te tualpi puah in a manlah laitak, Oklahoma khuakhal nisa akang dingin a kithawi laitak in, khuahun genkholte in a ummawhloh, thupha guah hong zu ziahziah hi. Thungen khempeu in lungdam ko in, lungnuam takin khuahun nuam mahmah lak ah tualpi hong zuan thei uhhi. Bawhlung kimawlna pen sun nai 11:00AM a kipan ding hi a, guah zong hong thei bawlpianta hi. Khawmpi akah Zomi Innkuan kipawlna tuamtuam pan makaite, palaite, tangmite, bawhlung kimawlna tha apia ding khuanu khuapa, nungak tangvalte sun 11:30AM in tualpi ah hong kimta uhhi.

Tulsa khuapi a Zomi atam pen a ten’na veng, Zonuam veng tawh akinai mahmah, Jewish Federation of Tulsa pawlte’ Soccer Field akikawm hi a, tualpi pen nih pha in, huang tawh ki-um ahih manin, suaktatak leh nuamtak kimawlna a kibawl thei ding ahi hi.. Makaite in tualpi nih pen min vawh uh a, leilu lam tualpi pen Lamka Tualpi ci-in, leitaw lam tualpi pen Tedim Tualpi kici hi.

http://www.youtube. com/watch? v=N5uwMT9YWA8

USA Zomi Communities Cup akituh ding bawhlung Team (9) zong tualpi sung ah mun la khin uh a, innteek nungaknote in a makaih dingin kimawlte mai ah hong ding sinsen uhhi. Guah theuta ahih manin, Team tuamtuamte dialkhaite (Flags) huih lak ah hong laam zota hi. Pawi hunkem Lia Vungpi zong tualpi mailam panin hong awngkhiata a, hungeelnate hong taangko khitcianin, azahtak huai Zomi Innkuan kipawlna makaite in mun hong la dimdem uhhi.

Zomi-te in anungta Pasian abiate hi a, sepna bawlna khempeuh ama tung ah ako tangtangte ahi hi. Pawihun a kipatna dingin Rev. Suan Za Lian in hun leh vai khempeuh anungta Pasian tung ah apna thungetna aneih khit ciangin, Zomi Innkuan Oklahoma kipawlna Chairman Rev. Kap Khan Mang in USA Zomi Communities Cup bawhlung kidemna pawi hong hong takpita hi. Khuahun zong nuam semsem ahih manin, a kimawl dingte leh pawi en mipi kilungdam mahmah a, khut kibeng ziahziah hi.

Team makai teng, kimawlna tawh kisai kiciamna ala dingin amailam ah hong kuankhia uh a, Florida Zomi Innkuan pan kipawlna lam makai Pa En Lian Pau makai in, a kimawl ding khempeuh in kisiamna hong bawl uhhi. Mipi in dai khipkhep in zahtakna kipia hi.

Zomi Innkuan USA kipawlna, President Dr. Chin Do Kham in minam hanthotna kam hong gen khitciangin, Team makai teng, kimawlna tawh kisai kiciamna ala dingin amailam ah hong kuankhia uh a, Florida Zomi Innkuan pan kipawlna lam makai Pa En Lian Pau makai in, a kimawl ding khempeuh in kisiamna hong bawl uhhi. Mipi in dai khipkhep in zahtakna kipia hi.

Zomi Innkuan kipawlna tuamtuam pan makaite leh kimawlna lam makaite zahtakna apia dingin bawhlung Team khempeuh hong kigual uh a, tualpi mai ah a thuangthuang in hong kuankhia uhhi. Kimawl ding Team khat khit khat, Makaite zahtakna piakna aman khit ciangin tualpi pualam ah hong pusuak uh a, bawhlung kidemna akipan dingin hong diang phangphang uhhi.

A kitheihsak kholhna bangmah in, a kimawl ding Team (9) pen Group – A leh Group – B in kikhen in, Team khat in Match (2)-ta kimawlkha ding, tua tungtawn in a Group nih pan Points tam angah pen a khatna leh a nihna ngahte Semi Final kah ding, Semi Final ah a zotegel Final sui ding hi ci-in vaihawmte in hong taangko uhhi.

Group kikhen dan zong anuai a bangin limtak in lai tawk kihawmkhia hi.

USA Zomi Communities Cup : Group – A

(i) Zomi Innkuan Oklahoma – A Team (ZIOK-A)

(ii) Zomi Innkuan Oklahoma – Kuki Team (ZIOK-K)

(iii) Chicago Zomi Innkuan (CZI)

(iv) Dumas Zomi Innkuan Texas (DZIT)

(v) Kansas Zomi Soccer Team (KSZ)

USA Zomi Communities Cup : Group – B

(i) Zomi Innkuan Oklahoma – B Team (ZIOK-B)

(ii) Zomi Innkuan Oklahoma – Oklahoma City (ZIOK-C)

(iii) Florida Zomi Innkuan (FZI)

(iv) Zomi Innkuan Iowa (ZII)

Tualpi nih kizang ahih main a kimawl ding Team-te zui-in mipi in tualpi khat leh khat kawm phangphang uhhi. Thapiak nopna bangbang in kitai kawikawi thei hi.

Kimawl hun pen Match khat ah, hun masa Minutes (20), tawlngak hun Minutes (5), hun nihna Minutes (20), kimawl hunbit vekpi gawm Minutes (40) dingin kiciangtan hi.

Sun nai 12:00PM hong satta a, a kimawl masa dingte zong tualpi laizang ah mun la in, thungetna hong nei hamtang uh ahih manin, lungnop huai mahmah a, khutbetna tawh tha kipia ziahziah hi.

Match Masa

Lamka Tualpi ah Group – A pan innteek ZIOK-A pawl leh khual pan DZIT pawl hong kidem uh a, lenglate hong hat mahmah mawk uhhi. DZIT pawl pen Dumas, Amarillo khuapi pan kimawl asiamteng a kigawm hi a, innteekte in nanglah mahmah uhhi. Ahi zongin, innteek kam om ahi ding hiam, ZIOK-A pawl in Goal 1:0 tawh zo uhhi. Sia Pausian in laipi a Referee sem hi.

Tedim Tualpi ah Group – B pan innteek ZIOK-B pawl leh khual pan ZII pawl kidem uhhi. ZII pawl hat mahmah uh a, innteekte lam ah Goal khat hong khum masa uhhi. Innteek pawl zong hong tha hong sankik uh a, nakpi takin ahong hanciam uh leh, lehzawkkik uh a, hun abei ciangin ZIOK-B pawl in Goal 7:2 tawh zo uhhi.

Match Nihna

Lamka Tualpi ah Group – A pan innteek ZIOK-K pawl leh khual pan CZI pawl kidem uhhi. Chicago panin ahong kuan CZI pawl pen kum dang kimawlnate ah ahat mahmah lam uh kizakhol a, innteek pawl inzong khialhna a om hetlo dingin nakpi takin napang uhhi. Kisikim mahmah uh ahih manin, hun abei ciangin Goal 2:2 tawh kidin uhhi. Sia Kapmang in laipi a Referee sem hi.

Tedim Tualpi ah Group – B pan innteek khatmah ahi ZIOK-C pawl leh khual pan FZI pawl kidem uhhi. FZI pawl pen Florida State a om Zomi buppi sung pan a siampen teng ahih ban-ah, lungsim kimuang takin hong kuan uh ahih manin, ma vang mahmah uhhi. Innteek ZIOK-C pawl inzong tha nasan zo veve uh a, baihtak in kizosaklo uhhi. Ahi zong, khual pan ahong kuan FZI pawl in Goal 3:0 tawh zo uhhi. Sia James in laipi a Referee sem hi.

Match Thumna

Lamka Tualpi ah Group – B pawl a kimawl ding hun hi a, Match a kizom in kimawl ding kikham ahih manin, hun khat ki-awngsak hi.

Tedim Tualpi ah Group – A pan a kimawlkha nailo, khual pan KSZ pawl leh Group – A Match Masa pan azo ZIOK-A pawl kimawl hi. Innteek pawl ading in Group sung a Match nunung pen ahih manin, azahna dingun nakpi takin hanciamsan uhhi. Khual pan KSZ pawl zong thathak ahih manin hat mahmah uh a, kithakim mahmah uhhi. Hun abei ciangin Goal 2:2 tawh kidin uhhi. Sia Kamsan in laipi a Referee sem hi. ZIOK-A pawl pen Group Match a zota hi a, Match khat zo, khat kidin in, Points (4) ngah uhhi.

Match Lina

Lamka Tualpi ah Group – B, Match Masa azo ZIOK-B pawl leh Match Nihna alel ZIOK-C pawl kidem uhhi. ZIOK-C pawl in Match masa lel khamawk uh ahih manin, azah nih in hanciam uh a, ZIOK-B pawl in Match masa lim zawh kisa uh ahih manin, kimuangkha uh ahitam, ZIOK-C pawl in Goal 3:1 tawh zokik uhhi. Sia Pauno in laipi a Referee sem hi. A Team nih un Group Match azota uh hi a, Match khattuak zo, khattuak lel uh ahih manin Points (3) ngahtuak uhhi.

Tedim Tualpi ah Group – A pan Match Masa alel DZIT pawl leh Match Nihna azo pawl kimawl ding hi a, kidin uh ahih manin a, ai a kisansak ciang in, akimawl masa dingin CZI pawl in ngah hi. DZIT pawl in lel nuam nawnlo uh ahih manin, azah nih in hanciam uh a, a kimuang simsim CZI pawl inzong zawhloh phamawh in hanciam uh ahih manin, nakpi in muhnop mahmah hi. A Team nih in a zawhkei leh kah zolo dinmuntuak ah om uh ahih manin, hanciam mahmah uhhi. Hun abei ciangin Goal 1:1 tawh kidinzel uhhi. Sia Hegin in laipi a Referee sem hi. Group Match zota uh a, DZIT pawl in Match khat lel, khat kidin tawh Point (1) ngah uh a khawlphot uhhi. CZI pawl in Match nih kidin tawh Point (2) ngah uh a, a pawl dangte a pha dingin Point kicing ngahlo uh ahih manin, a khawlphot uh kul hi.

Match Ngana

Lamka Tualpi ah Group – B pan Match Masa alel ZII pawl leh Match Nihna azo FZI pawl kidem uhhi. FZI pawl pen a hatngei in hat uh a, ZII pawl pen kiginkholhna tamlo ahi dinghiam, a tha uh hong kiapian ahih manin, FZI pawl in Goal 4:0 tawh zo uhhi. Sia Kapmang in laipi a Referee sem hi. A Team nih in Group Match zota uh a, FZI pen lelh neilo in Point (6) tawh kah uhhi. ZII pawl in zawh neilo ahih manin kithakhauhsak in khawlphot uhhi.

Tedim Tualpi ah Group – A pan a Match nihna kimawl ding KSZ pawl leh aisanna tawh angah ZIOK-K pawl kimawl uhhi. A Team nih in Match masatuak kidin ahih manin akah nop uh leh a zawh uh akul ahi hi. A Team nih un nakpi in hancia uh a, innteek ZIOK-K pawlin hun abei ciangin Goal 3:2 tawh zo uhhi. Sia Kamsan in laipi a Referee sem hi. KSZ pawl in Match khat kidin tawh Point (1) ngahin khawlphot uh hi. ZIOK-K pawl in Match khat kidin, khat zo ahih manin Points (4) tawh kah uhhi.

Semi Final Kahte

Group – A pawl sung ah ZIOK-A pawl leh ZIOK-K pawl in Points (4) tuak ngah uh a, a dangte kiaphot uhhi. A kahtegel Points kibang uh a, Goal Difference a kituat ciangin (+1) tuak tawh kikim leuleu uh ahih manin Winning Ratio a kituat ciangin ZIOK-A in (1.50) points, ZIOK-K in (1.25) points ngah uh ahih manin, ZIOK-A pen Group – A sung ah a khatna ngah hi a, ZIOK-K pen a nihna ahi hi.

Group – B pawl sung ah FZI pawl in lelh neilo ahih manin, Points (6) tawh a khatna ngah a, ZIOK-B leh ZIOK-C pawl in Points (3) tuak ngah uhhi. Goal Difference a kituat ciang in ZIOK-B in (+3) ngah a, ZIOK-C in (-1) ngah ahih manin, ZIOK-B in Group – B sung ah a nihna ngah hi.

Semi Final – 1

Lamka Tualpi ah Group – A sung pan a khatna angah ZIOK-A pawl leh Group – B sung pan a nihna angah ZIOK-B pawl kidem uhhi. Sia Kamsan in laipi a Referee sem hi. USA Zomi Communities Cup a la dingin a kithawi, innteek tuaktuak uh hi a, kithakim mahmah uhhi. ZIOK-B in ZIOK-A pen uzaw danin zahtak bawl ahih manin, a lungsim uh ah tawm angapthawhloh hangin, a tha in zozaw ahih manin, kisikim mahmah uhhi. Hun abei dongmah alang alang ah kitun kawikawi uh a, Goal 1:1 tawh kidinmawk uhhi. Referee in Penalty tang (5) tuak suisak a, Goal (4) tuak khum uh hi. Penalty tang (3) tuak kisuisak leuleu a Goal (2) tuak khumzel uh ahih manin, anunung pen kungpangtegel Penalty a kisuih dingbek uh omlai hi. ZIOK-B pawl pan kungpang Sianlal (Captain) in Penalty hong sui masa a, zawhkamlo ahitam, lut zolo hi. ZIOK-A pawl pan kungpang Thawnpi in Penalty a suih ciangin Sianlal lungkiata ahi dinghiam, limtak in khum thei hi. ZIOK-A pawl pen Final akah hita hi.

Semi Final – 2

Tedim Tualpi ah Group – B sung pan a khatna angah FZI pawl leh Group – A sung pan a nihna angah ZIOK-K pawl kidem uhhi. USA Zomi Communities Cup a ngah dingin a kingap tuaktuak ahih manin, kisikim mahmah uhhi. Innteek in zong innteek kahi cizo nawnlo a, nakpi in hanciam hi. Khual inzong khiamtuanlo ahih manin, muhnop mahmah hi. FZI pawl in lelh aneihloh bangun, a tha uh zang mahmah ahih manin, hun abei ciangin Goal 1:0 tawh zo in Final kah uhhi. Sia Pauno in laipi a Referee sem hi.

Final

Innteek ZIOK-A pawl pen 2007, 2008 kum in Florida ah akuan Zomi Innkuan Oklahoma kipawlna tangin a kimawlte ahi uhhi. FZI pawl zong veng nih leh thum sung panin a kitengkhia, khangthak ngalhat bawhlung siam vive ahi uhhi.. Na zawhngap uh hiam ci-in kidong leh zawhngap ci’n dawngtuak uh ahih hangin, na kihta uh hiam ci-in dongkik le’ng kizahtak tuaksim uhhi. Tulsa khuapi pan mipi tampi takmah in FZI pawl tha apiak ban-ah, Team Manger Liabawi mahmahin Hand-speaker tawi in awng ziahziah a thapia ahih manin, innteek ZIOK-A pawl tha apiate tawh lekkim zo uhhi. Kimawlte zong, sun thapai in Match (3) tuak asuikhin uh ahih manin, Minutes (15) kitawlngasak a, nungak tangvalte thapiakna leh USA Zomi Communities Cup sang dingin alawpna uh hangin thadimsa in hong kithawi uhhi.

A lai a Referee sem dingin Sia Suangin leh anawl a Referee dingin Sia Pauno leh Sia Mangno hong kithawi uhhi. ZIOK-A pawl leh FZI pawl USA Zomi Communities Cup Final kisui dingin tualpi nawl panin Referee-te makaihna tawh tualpi laizang hong lut uh ciangin mipi in khut bengin, awng in tha pia ziahziah uhhi. A kimawl dingte in mipi zahtakna hong pia uh a kilawm mahmah hi. Kimawlte in a mun ding uh alakma in amau pawiciat kikawisa in thungetna nei uh a, lungkim huai mahmah hi.

http://www.youtube. com/watch? v=BhvNu9ZDjAg

Nitak nai 7:30PM hun in, USA Zomi Communities Cup – Final kipanta hi. Confederation Cup Final Brazil leh USA sang’in muhnop zaw ding hi aci bang om hi. ZIOK-A pawl in hun a tamzaw neh mahmah uh a, FZI inzong hun khatkhat alangte kung ciangciang hong nawt theizel hi. ZIOK-A pawlin a hanciamna uh agah hong lo masa uh a, Goal (1) hong khum uhhi. FZI pawl zong ta peuhmahlo uh ahih manin, ZIOK-A pawl kung lam ah ahong nawhtai kawmun Goal (1) hong lohkikziauzo uhhi. Tua tawh khawllo uh a, nih vei khawng ZIOK-A kungkhuam hong kha uh ahih manin, muhnop semsem hi. ZIOK-A pawl zong kidawm takin hong kimawlkik uh a, damdam in mai ahong nawt uh leh a zawhna ding Goal (1) hong khupbeh uhhi. FZI pawl in a lohkikna ding ahanciam uh hangin, hun cingta ahih manin, lungkim takin khut kilen in, ZIOK-A pawl in Goal 2:1 tawh USA Zomi Communities Cup akhatna angah uh ahi hi.

A kilawm mahmah, a etteh huai mahmah khat in, Final kimawlna azawh uh ciangin ZIOK-A hita leh, FZI pawl hita leh, a pawlciat un khut kilen in lungdam kohna thungetna aneih uhpen, anungta Pasian inzong namtui takin sang ding hi kicingam hi.

USA Zomi Communities Cup – bawhlung kidemna hun manna dingin pahtawina pawi khat kibawl hi. Zomi Innkuan Oklahoma kipawlna thusapi Taang GSKhup in hun makaih a, Sports Committee Makaipipa in lungdam kohna thugenna hun zang hi. Rev. Thawng Khan Cin in, a Nihna angah FZI pawlte khatkhat in a Nihna Medal awksak hi. Rev Suan Za Lian in a Khatna angah ZIOK-A pawlte khatkhat in a Khatna Medal awksak hi. Kimawlna sung ah a siampen (Best Player) pahtawina pen FZI pawl pan Go Sian Tuang kiteel a, Pa Awn Za Pau in pahtawina pia hi. Kungpang asiam pen (Best Goalkeeper) dingin ZIOK-A pawl pan Zam Khan Thawn kiteel a, Pa Pau Za Khan in pahtawina pia hi. USA Zomi Communities Cup – a Nihna Trophy leh pahtawina sum ($300) pen Dr. Seikam in FZI Captain/Manager Pau Sian Lian tung ah pia hi. USA Zomi Communities Cup – a Khatna Trophy leh pahtawina sum ($500) pen Dr. Chin Do Kham in ZIOK-A Captain Thang Thawn Mung tung ah pia hi.

Pahtawina pawi leh hun leh vai khempeuh gualzawhna lungdam kohna thungetna pen Rev. Kap Khan Mang in hong nei a, USA Zomi Communities Cup bawhlung kidemna, lawhcing tak leh gualnuam takin kizo hi. Nitak nai 8:30PM satta ahih manin ni atum tawh hong kituaklian hi. USA gam suahtakni ahih manin, Fireworks a kilot ziahziah tawh hong kituak hi.

USA Zomi Communities Cup bawhlung kidemna a kibawl zawh manin Zomi khangnote bek hilo, khuanu khuapa, numei naupang akua mahpeuh maitai lungnuam takin kikhawl thei ahih manin, USA atung tuipi galkaai Zomi-te adingin ki-itna leh kipumkhatna hong piangsak mahmah hi..

Khuanu khuapate hanciamna leh Pawlpite panpihna tawh, zin leh leeng khempeuh, a kimawl khempeuh leh innteek aduh khempeuh, aksa taangciim, vaimim ciim, buhmansih, buhkan leh e-kya-kwe sun-an in kicing takin kivaak a, pawi man ciangin Khawmpi mun ah nitak an dingin Asian Food kicing takin kivaak leuleu hi.

USA Zomi Communities Cup bawhlung kidemna kizota a, nitak nai 9:00PM satta ahih manin, pawlsiim khempeuh kitawl mahmah ding tawh kibang hinapi, Zomi Innkuan USA – 2009 Kumcin Khawmpi, Hun Nihna kizomsuak ahih manin, Khawmpi kikah zolai hi. Zomi-te kipawlkhawm in, thu vaihawmkhawm le’ng vai tampi a kizo ding ahihna thu hong phawksak hi.