Ben Thanggoumang Guite – Chairman
Cin Sian Dal – Secretary
James Vaiphei – Information
Thomas Khai – Treasury

2010 Khuado Meeting Minutes
Ani: June 09 2010 Wednesday
Ahun: 19:00-22:00
Amun: Ben Thanggoumang Guite
Flat 4, Ridgemead Court
51 Wickenham Road
Isleworth, TW7 6BA

2010/JUN/001 Khuado Celebration Committee
Chairman: Benjamin Guite
Secretary: Cin S. Dal
Treasury: Thomas Khai
Information: James Vaiphei

2010/JUN/002 Khuado Sumzat ding Geelna (Budget Planning)
Budget buppi £1,200 ( Pound tul khat leh za nih)
2010/JUN/003 Sum zon/don zia ding (Fund-raising)

a) Innkuan tawh a om te: ……….. £30
b) Khatguak om, nasep nei te:……. £20
c) Sangnaupang te: ……… £15
d) Raffle zong kizuak ding…… £1.50
(A ki sam lai teng, muan zawk/ mai ngap zawk deuh te tung ah ki nget beh ding hi.)

2010/JUN/004 Sum piak zia ding (Payment System)

ZIUK bank account: Account number: 81 52 35 11
Sort Code: 40-02-05

a) Direct debit tawh ki pia thei
b) Cheque tawh kipia thei
c) Celebration committee te khat peuhpeuh tung ah sumtang(cash) in kipia thei
(Note: Sumpiak ciang ‘Khuado’ ci in Reference hong at ding.)

2010/JUN/005 Sum Budget khen zia ding

a) Hall sap nang: £350
b) An leh tui nek ding £200
c) Hall decoration £50
d) Tuamtuam zatding £100
e) Music £500 Budget

2010/JUN/006 Khuado bawl na ding mun (Khuado Venue)

a) Mimal 100-150 kikal a ta, inn khan (Hall) zong ding
b) Information kai khawm ding
c) August kha bei ma in a mun ding ki cian sak ding

2010/JUN/007 Vaipuak hawmna

1) Music hong mai kaih ding
Thang Sian Mung
Nang Mun Lian
Suan Khan Thang

2) Pawi hong vaihawm sak ding
Dal Kim Mang
Dim Ngaih Lian
Janice
Nemi
Hang Tum Thang

3) Decoration and Ushering (Reception)

Go Suum Piang
John Thomte
Niang Khawm Huai
Thang Don Mang

4) An huan ding

Dim Ai Cing
Pau Sawm Cing
Zam Hao
Lian Za Khai
Lian Than Tuang
Tuan Len Tuang

2010/JUN/008 Khuado Hungeel na (Programme details)

Khuado ni: October 02 2010, Saturday

01:00pm – Zintung hun
02:30pm – Khuado Lungdam hun
05:00pm – Nitak Annek hun
06:00pm – Khuado Gualnop hun

2010/JUN/009 Khuado Hungeel na (Programme details)

13:00 Zintun hun (Guest arrival)
(Light refreshment, sandwiches, tea, coffee and juice)
14:30 Khuado hun kipat na
Section I (Khuado leh Lungdam genna)
1) Ki pat thu nget na (Dr. Gin Khan Khual, Oxford)
2) Mai tang muak na (Welcome speech)
a) Mang/sap kam tawh genna (Janice)
b) Kawl kam tawh genna (Liannu)
c) Hindi kam tawh genna (Nemi)
d) Zo kam tawh genna (Huaipi)

3) Hun geel na zaksak na (Liannu)
4) Mipi lasak na (Tun sung khat pan)
5) Khua do thu genna (Rev. Thawng Khua Kai, Birmingham)
6) Zo ngei na lam
7) Naupang hun piak na (Sia Piang leh Khawmhuai)
Daduho lasak na
9) Ngeina lam (Lengna, guests te tungpan)
10) Ma Ei Tong lasak na
11) Secretary Report
12) Treasury Report
13) Short speeches from guests
14) Ankuang thu pha piak na (Rev. Robert Vaiphei)

Mipi tawh Zo ngei na lam khop na leh An kuang thuk hun

17:00 Nitak an kuang um khop na (Dinner)

Section II (Khuado gualnop hun, celebration)

18:00 Music band te makaih na tawh hun zom to suak ding
(Lasa nuam ten, Music band te tawh ki zom ding)
21:00 Vai man hun

2010/JUN/010 Lengna sap ding teng (Guests to be invited)

1) Burmese Embassy
2) Indian Embassy
3) EMA
4) Mizo Community
5) Kuki Community
6) Burmese Community
7) Shan Community
Karen Community
9) Kachin Community
10) Rakhine Community
11) Muntuamtuam a om Zomi Innkuan te

2010/JUN/011 Lengna sap zia ding

a) Website leh net tuamtuam ah za sak ding
b) Mimal leh kipawl na te tung ah lai khak ding

2010/JUN/012 Committee in Mai lam sepding

a) July kha sung khat vei ki mu kik ding
b) Vaipuak panmun len te thu za sak ding
c) Invitation card/ letter bawl ding
d) Welcome speech Zokam in at ding

Ciaptehna: Meeting bawl nang inn hong zang sak in, nitak an zong hong vak Ben & Lulun te innkuan tung lungdam hi.

Khuado Celebration Committee

Ben Guite
Cin Dal
James Vaiphei
Thomas Khai

PORTLAND PAINA

America gamah kum simin November kha Thursday ni nunung pen Lungdam kohna  (Thanksgiving Day) ni-in kizang hi. America-te Khuado Pawi hi a, Zomite Khuado Pawi tawh kibang hi. Tu kumin hih hun pen Porltand khua (Oregon) ah zang dingin ka pai hi. Nov. 21-23 sung Sacramento-ah bangin Nov.24-30 Portlandah ka zang hi.

Sacramento khua-ah

Ka omna Los Angeles leh Portland kikalah Sacramento khua om a, San Francisco khua tawh kinai hi. Kum 1971-75 sung Jorhatah B.Th. ka kahpih Nu Ngeni-te nupa hih khua-ah om a, hong bang in a cih bangun ka bang hi. Nov.21-23 sung amau kiangah ka tam hi. Nu Ngeni pasal Dr. Lalliana Mualchin pen Ziinliing lam a Ph.D. ngah (Seismologist) ahi hi. Amau pen Mizoram Lunglei lam mi hi a, America a omna uh kum 30 bang val zo-in inn hoih mahmah nei uh hi.  Ta nih numei khat leh pasal khat a nei uh hi. A tate uh gol ta ahih manin mun dangah om uh a, amau nupa kia inn ngakin a om uh hi. Tu laitakin Pawlpi kipiakna nei loin amau bekin a om laitak uh ahih manin Nov.22 Nipi ni-in neek khawmna hong bawl in hong cih bangun nekkhawmna mi 4 in ka nei uh hi. Amau nupa leh ka paipih ka lawmpa Sente tangval khat tawh ko teng in nekkhawmna amau innah ka bawl uh hi. Mi ka tawm uh hangin nuam ka sa mahmah uh hi. Dr. Lalliana Mualchin pen thugen dingin kisam kawikawi hi. Nov. 28-30, 3009 sung International Atomic Energy Agency (IAEA) makaihna tawh kibawl kamkupna-ah thugen dingin Italy-ah kisam a, vai pai hi. Hih IAEA pen tu laia Atomic bomb bawlna lam a misiam mipilte kipawlna ahi hi. Japan gam in zong University-ah thugen dingin sam ngei a, tu-in zong Saudi Arabia kumpi in University a thugen dingin sam hi.

Ka tun ni-un lampi-ah California gam vaihawmna Capitol innpi hong etpih uh hi. Hih inn pen California ukpa Governor Schwarzenegger leh a vaihawmpihte zum omna hi. Schwarzenegger pen datsian bawlsiam minthang (actor) lui ahi hi. Nov. 22 nitak lam ciangin mun minthang mahmah khat “Tahoe Lake” kici tuikulh gol mahmah, khual zin mite paina munah hong paipih uh hi. Khua dam ahih manin mualtung leh leilak khempeuh vuuk in khuhin pak ziaizuai hi. Tua panin Carson City (Nevada state) ah ka pai uh a, Carson city-ah an ka ne uh hi. Carson cih pen Zogam sangmangpa min tawh a kibang hi a, ahi zongin hih Carson min neipa pen cowboy minthang ahih manin ama min tawh khuapi kibawl ahi hi. Sakol tungah a tuanna lim golpi khat zong bawl uh hi. Nov. 23 ni-in nidanga Kham (gold) tangh lianpi a kimuhna (Gold Rush kici) lui-ah hong paipih uh hi. Hih lui pen Ciau lui cia khawng hi a, lui gei-ah kham tangh golpi khat kimu a, tua a mupa Marshal kici pen a phawk tawntungna dingin a lim golpi khat kibawl hi. Khual zin mite in et belin a neih khat uh ahi hi.

Portland lamah

Nov. 24 ni-in Sacramento panin Portland zuanin ka pai hi. Sia Zam King Mang in vanleeng tualah hong dawn hi. Nitak ciangin Sia Kam Khaw Thang tapa Sia Khup T. Suante innah nitak an ka ne khawm uh hi. Sia Khup zi Nu Ngaih pen Sia Mang naunu hi a, a nu Niang Go Cing (Niangbawi) zong amau kiangah om hi. Sia Khupte inn pen golin kicing mahmah a, mi khempeuh banna, kikhopna leh pai khopna, Pawi khat peuh a om ciangin a zatna uh inn nuam mahmah khat ahi hi. Tham loin amau innkuan pen dik mahmah uh a, leengla do siamin, mi khempeuh in maingap uh hi.

Rev. Dr. J.H. Cope kum 99 Cin’na Pawi

Nov. 25 nitakin Zomi Association of USA min tawh Cope topa hong pai kum 99 cin’na pawi Pa Khup-te innah ka zang uh hi. Sia Thang Khan Mung in Cope hong pai kum leh NGO paizia pawl khat gen masa hi. Tua khit ciangin Cope topa tangthu leh a manphatna thu ken ka gen hi. Cope topa in Lai hong bawlsakin, Labu masa penpen 1914 kumin hong bawlsak a, 1915 kumin Mathai laibu hong bawlsakin, 1918 kumin Labu a nihveina bawl hi. Sihzang leh Tedim pau tawh hih laibu kibawlte lahkhiatna (exhibition) ka nei uh hi. 1919 kuma  Zogam bup Thukizakna masa penpen (Chin Hills News) copy zong kilak hi. Tawp ciangin hih laibute hong pai mite in mu nuamin en ngeingai uh hi. Mai kum cianga sin ding Zolai Sinna Bu apna zong ka nei hi.

Thanksgiving Day ni-in Sia Zam King Mangte innkuan in Turkey gol mahmah khat (lb 12) lei-in Mikangte nu leh pa-in a neih uh Mama San-te innah an nek khopna ka nei uh hi. Mama San pasal pen tuma kum thum lai-in si zo a, tu-in amah bekin om hi. Mi hopih dan siam mahmah a, hong ngaih bawl siam mahmah hi. Nitak ciangin Sia Khupte innah Pa Hau Paute innkuan leh meltheih teng tawh Thanksgiving ankuang umna ka nei leuleu uh hi.

Dr.E.H. East’ Inn Etna

Nov. 27 ni-in Sia Mangte nupa in a pu Sia Thang Khan Mung tawh Dr. E. H. East inn lui hong etpih  hi. Dr. East pen Zogamah 1902 kumin hong pai a, 1910 ciangin cidam lohna hangin ciahkik hi. A ciah ciangin Portlandah Zato hongin teeng a, 1939 kumin si a, a zi Emily East pen 1943 kumin si hi. A sihna inn en dingin a pai ka hi uh hi. A mun ka tun’ uh ciangin inn neipa a kongah a vakkhia ding tawh ka kisutuah lian uh hi. Amin pen Clifford Carlsen III hi a, a beisa kum sangih hun lai-in East’ tanu tung pan a lei ahi hi. East tanu zong si zo hi. A inn sungah hong lutsakin hong veel sak hi. Inn sungah meituahna mun, annekna mun, tutna mun cihte-ah maan ka la uh hi. Inn nung lam zong hong veelpih a, huang lianpi nei a, singkung zong golpipi po hi. Apple kung thum khawng omin, singkung sang mahmah zong om a, hih singkungte pen East in a suan hi dingin ki-um hi. Kum 100 bang upa ta ding hi hong ci hi. Inn neipa in East-te innkuan maan honkhat na kem a, tua zong hong lak hi. Tua maante tawh zong maan ka kila uh hi.  A inn pen gol mahmah a, that nih  ahi hi. Clifford pen tadensa lam sem (journalist) hi a, a zi pen editor ahi hi. A zi leh a ta  numei na vak a, a tapa neute geel ka mu uh hi.

Zomite adingin Dr.East a man phatna tuamtuam om hi. Khatna-ah Zogamah Zato sangmang masa pen hi. Rev. Carson zomah sangmang nihna zong ahi hi.  Rev.Carson Haka-ah omin manlah ahih manin East in Sakol tung tuangin Tedim leh  Tonzang gamah 1904 kumin gam hawl dingin zin kawikawi hi. Sangmang hong pai mi 7 sung panin Tedim leh Tonzang leitang a sik masa penpen ahi hi. Siavuan ahih mah bangin gawlbawk tampi atsakin, ha-na (tooth pain) tampi bawhsak hi. A nihna-ah, Zomi Khristian a suak masa penpen Pu Thuam Hang leh Pu Pau Suan pen ama nasepna hanga Khristian suak ahi hi.  Thuam Hang tapa a haphu pen East in bawhkhiatsak a, tua panin kimel theih uh hi. A tapa dang khat zong TB natna nei a, ganhing namkim tawh a thoih uh hangin dam thei lo ahih manin thungetna tawh a dam ciangin hong kikheel hi. A thumna-ah Pasian adingin a kipia zo mahmah khat ahi hi. Sangmang a nget ciangin makaite in thudotna (interview) nei uh a, “Midangte pai nop lohna munah hong sawl un” ci hi. Sangmang ciatciat zong a kipiak zawhna uh kibang kim tuan lo hi. Tua ahih manin hih banga a kipiazo Zogam sangmangpa’ inn leh a sihna khua Portland mu thei a Pasian in hunpha hong piak pen hampha ka kisa hi.

Tua banah Rev.Dr. JM Paupu sangkahna Western Seminary zong ka mu kha hi. East inn tawh kikong ngat cih ding hi. A kikalah lampi pai-in a kinai mahmah, East-te inn kong khang lianah tua sanginn om hi. Tua khit ciangin khua sungah ka vak kawikawi uh a, tui kholna mun ka pai khit uh ciangin khua sung lei sang pen tungah pai-in khuasung khempeuh a kimuhna mualtung a om Zato inn sang dawnah kah to-in khan 9-na panin Portland khuapi sung ka en uh hi. Khua lai zangah lui khat luangin, lei sang mahmah zong kidawh hi.

Thukhupna

Portland khua-ah Lai Siangtho Sang nih om hi: Western Seminary leh Portland Bible College ahi hi. Western Seminary ah B.D., M.Th. leh Doctorate degree sin theih a, Portland Bible College-ah B.Th. sin theih hi. Tu laitakin PBC ah Bungmual khua panin Tg. Guite kici leh Lia Muani d/o Dr. Thang Lian Kap, New Lamka om hi. Portland khua-ah Kawlgam panin Zomi galtai mi 100 val bang om ta hi. A tung thak zong honkhat omin, tua a tung thakte pen Sia Zam King Mangte nupa in a kisapna khempeuh uh vansak hi. Inn sap ding zonsak, damlo Zato pai ding a om leh paipih, Zum kah ding a om leh paipih uh hi. City Bible Church kici Pawlpi tawh kizomin Burmese Christian Church kici phuan uh a, tua lai-ah Sia Zam King Mang in Pastor sem hi. Kikhop ding ciangin motor tawh mi pui-in tawp ciangin kha kik hi. Zomite a itna uh leh Pasian adinga a kipiak zawhna uh thupi ka sa hi. Portland khua Zomite in a tate uh Tedim pau siamsak khin uh a, etteh huai ka sa mahmah hi. Tham loin, missionary hong pai masate omna khua-ah tu ciangin Zomite tengin, khua-in kinei ta cih ka ngaihsut ciangin lamdang zong ka sa hi. Pasian in tu hun ciangin nidanga Pasian thu hong puak mite kiangah Pasian thu hilh dingin hong deih hi kha ding hi ci-in ka ngaihsun hi.

Rev. G.K. Nang

Fuller Theological Seminary,

Pasadena, CA. Dec. 2, 2009

Delhi ah Tedim kampau Zomi 1,200 bang ki om hi. Tua lak pan a tamzaw tham (1,000 ciang bang) pen Zomi galtai ki hihi. Khuado Pawi ah hong kihel pen 700-800 bek ding in kituat hi.

Tutung program ah item li (4) ki thupi sak hi – ngeina lam, kisiansuahna/minam a ding thungetna, lasakna leh annek khopna.

Hun pen 1:30 pm lan 4:30 dong kizang hi.

Tg Joseph Pau Lam Mung leh Lia Cing Sian Hau te in siamtak leh kizen tak in hong makaih uh a, kicim man vetlo hi.

A tom in hih a nuai a bang in hun kizang hi.

Khuado Lasakna : Tg Pau Muan leh a lawmte
Vaidawn thugenna : Pu G Swan Za Lian
Kisiansuahna/thupha ngetna : Pu N Thang Za Khen – a thu na sim nop leh hiah
Lasakna : Selected Artistes Lia Vungbawih, Vungkok leh a lawmte, leh Lia Cing Lun, Lia Hoih Niang, Lia Cingboi, Lia Biaklun, etc
Ngeina Lam Lahna: Zomi Ngeina Lam ah Falamte’n hong lak thei uh a, muh nop kisa in ki awng ngeingai hi.
Lungdam Kohna :Secretary Finance, Khuado 2009 leh Chairman, Zomi Innkuan, Vikaspuri
Hun khakna : Pastor Ngin Khan Do
Lamvui kaihna leh Pawi an nekna: Mipi

Tukum pen mediate (news reporters) lut saklo ding kici hi napi in Mizzima leh DVB (Democratic Voice of Burma) te in hong ngei teitei uh a, kinial zolo in hong uap uh suak hi.

Mizzima in Youtube ah video clip khat hong suah khia pah a a thulu pen - India Zomite leh Kawlgam Zomite in Khuado Pawi zang hi ci a, hong lungkim sak mahmah pong hi. Hih bang a namdang khat in hong muh ding kal mah i ngaklah tawntung hiven!

Hih bang a pawi thupi leh mihing tampi a ding pen vaihawm baih nawnlo a, Khuado Committe in nu-le-pa, u-le-nau sum leh pai, tha-le-ngal tawh hong huh hong panpihte tung ah lungdam mahmah hi.

Mailam ah a nuam zaw sem leh a thupi zaw sem a zat ding i hanciam lailai ding hi.

- Khuado Committe 2009

[Show as slideshow]

[View with PicLens]

12►

Tam in tawm leng hih bang a Zo ngei pawi khat i bawl ciat man un a pawi zong a thupi leh picing hong suak taktak ta hi.

Zo minam tuamtuamte in zong hong phawk pih ta un, zong hong eng mahmah khat uh hi ding in ka tuat hi!

Australia ah mun nih ah Khuado Pawi kizang ta cihna hi a, mailam ah mun tam zaw sem ah a zat zawh ding uh zong lamen hang.

Zomite khangto diam!

image source: Paul Khai

Zomi Innkuan makaite kiang ah Zomi mimal leh innkuan bangzah hiam in puan leh innsung van zat tuamtuam tamlo a om lam ka hilh hi. Tua ciang in amau zong hong la pah le ung hoih lo ding hiam ci in hong la pah uhi.

Hih puan leh innsung van zat tuamtuamte pen Zomi Innkuan in Zomi galtai Delhi ah omte a ding in a kaihkhawp ahihi.

Tuni pen a nihveina hi ta a, mailam ah zong a tamsem itna leh lainatna tawh kipankhawp toh zel ding uh i deih hi.

Huhna puan leh van zat hong piate tung ah lungdamna lian mahmah hi.

Hih a nuai a video pen Mizzima TV in clip tomno khat Youtube ah a koih ahihi.

www.youtube.com/watch?v=xWIDmPiCCH4

1620 kum in England gam a biakna lam pawlphut kawikawi a avaak pawl Mayflower temawpi zui in US gam ah hongtaai uhhi.Ahangpeen England kumpi mikheempeuh ama biak inn or pawlpi bek ah kikhawm hamtang ding cihthugeen gen hi. Hih biaknavaai a azinkawikawi mite in amau le amau in atuamvilvel in kikhopna thungetkhopna neinuam uh ahihman asimtham kimukhawm uh-a ahizong in amakaaite kumpipan man veve ahi. Atawpna ah notepeen Indian ten hongdoding hi cihthu tawh kilausak ahihman in khualzin hongkipan khia uh ahihi.

Suakta tak abiakna piaktheinazong ding England gam nusia ding khensatna nei uh a a inn alote uh nusia in alawm agualte u kiang ah MANGPHA MAN NI GUAI AW ci in kikhen uhhi.

Akhualzinna uh lauhuai mahmah in lamkaal ah tuipitung migilo te leh nakhat tai 75 sang a ahatzaw huihpi tezong tuak uh ahihman in anuntaakna uh lauhuaina tawh kidim hi. Tembawpi tung ah mikigaak mahmah in mi 102 atuangsungpan Pasal picing 70 bangleh numeinaupang 32 pha uhhi. Kisilnadin puasawpnading tui omlo I ann ginazong eilo in a ante uhzong pawlkhat hiing sawnsawn hi.

Tua tembawpi in mipi tampitak apuakban ah vangikpipi tui leh ann te a kipan atuhding uh khaicite, suanding singnote, niikten puansilh leh inn leh losaknading vantuamtuam te, temte leh Indians te kiang a azuakding uh khitang te puakawm lailai ahihman in gik mahmah hi.

Tua biakna vaai a ataai mipite in Mikaang te khua anahisa ahi Virginia painuam uh himahleh huihpi bawlsiatna hang in atembaw uh toleen a avotna mahmah neh vuuk sahmahmahna ahi Plymouth acihna khua tung uhhi. Tua bang a khuavot vuuklakpeen tua England gampan a biaknavaai a ataai mite ading in akhatveina ahihman in thuakhak sa mahmah uhhi.Pawlkhat te tembawtung panpaikhia ngamlo in pawlkhatte tuipipaang ah vaakkhia in singkung lopa te phuk in inn lehlo sa uhhi. Khuavotlak vuuklak ah paikhiat hamsa sa mahmah ahihman un vuuk kanma in innlam zozolo uhhi. Akhamkhop uh ann gamsung ah ngahzolo uh ahihman in mipite cina in siziahziah a alangphial bei uhhi.

Nikhat, American gammmi ahi Samoset akici pa tua gaaltaai mite khuasakna ah hongvaakkha a numeinaupang te cihmawhna hamsatna hongmucian gin mikaangpau in nui siusiau kawm in WELCOME ci hi. Tua gaaltaai mite in Samoset thutampitak adotkhit uhciang in zinpaak te pia uhhi. Samoset vaciahkik in alawmpa ahi amahsang mikaangpau asiamzaw Squanto akicipa tawh hongpaikik in Squanto in gamsung annneek tuidon zindanding khuasakzia ding hilh in samatzia, lingmingahte zonzia leh singgam sung a atangte zonzia hilh thuah hi.

Squanto in Adian te vaaimiim tuhzia te hilh hi. Indian te vaaimin atuh uhcian gin aleisung ah ngasa koih sese uhhi. Ahang peen tuangasa te in aleitha khauhsak in vaaimiim kungte hoihsak tuam hi. Tua England gam pan a hongtaai miten nasep hahkat thei mahmah uh a singhiangkeu tetawh ainnding uh sa in a inn te uh innkhat ah inndeikhat ta hipahpah hi. Alum angah theinading un mei cih uh a ainn sung vanzatding te uh hongbawlthei uhhi. Tembaw tung a aken uh khaici te tawh huan hongbawl in mehteh mehgah hongciing uhhi.

Khua hongkhaalciang in tennading inn sagih honglamzo ta uh a adangtam lamsaan uhhi.Ahuante uh mehteh mehgah tawh hongkidim in vaaimiim te hongsang a neekding dawnding hongnei uh in kuamah gilkial dangtaak omnawnlo ahihman in khuakhaal hunpeen amau ading in khuahun hoihpen hongsuak hi.

Khuakhaal leh phalbikikaal peen England gampan biakna vaai a gaaltaaite ann leh tui te hang in honglungnuam mahmah uhhi. Vaaimiim, Maai,Begaap leh Betangte nei ta uh ahihman un Pawipi khaamding geelna hongnei uhhi. Tua mite in Indian mite tua pawipi ah akihelding in sam uh a America gamsuakmi 90 hongkihelthei hi. Amasapeen America gama thanksgiving day pen nithum sung sawt hi.

Tua England gampan a khualal gaaltaai thu ummite leh America gammiten ann ongnekhawm in zukham , laam in kimawltheih tuamtuam te hongkimawl khawm liailiai uhhi. Amaute in alawmthakte uh leh khaigah te hang in lungdamkohna lianpi anei uh ahihi. Tuapan ahongkizom pai tosuak tunidong a ibawl Thanksgiving Day icih hongpiangkhia ahihi.

Khuado Pawi

Zo pau-ah ‘KHUA’ cih in khiatna nam tuamtuam nei hi. Pasian genna in ‘Khuavak’ kizangin, Dawite genna in ‘khuazing’ kizang hi. ‘DO’ I cih in zong khiatna nam tuamtuam mah nei-in, a sia lam leh a hoih lamin kizangkhawm thei hi. I it I ngaih hong zin hong lengla a om ciangin zin do, lengla do ci-in ‘Do’ zatna mun om mah bangin, hong bawlsia thei dawi leh gaalte I sim ciangin zong ‘Do’ ci-in zatna mun mah om veve hi. Zomite in ‘PAWI’ I cih pen Mikangte in ‘Festival/Feast,’ ci-in, Kawlte in ‘Puai’ ci-in, Vaite in ‘Puja’ ci-in leh Mizote in ‘Kuut’ciuhhi.

Hih thute panin Khuado pawi pen thupha hong guan Pasian dona, lungdam kohna leh thupha ngetna pawi ahihi.

A taktak in I Khuadopawi hongkipatkhiatna kanzo hilehang hih USA te Thanksgiving Day tawh kibangkhading in kalam en hi.I pu ipa te ahangkhat tawh tuikaangdungzui in khamtung gamzuanin nataai toto uh-a lamkaal ah hamsatna tampi te thuakban ah neek lehzon hamsatna gilkial dangtaakna tampi naphulkhading in ka um hi.

Khua akidociang in inkhat leh innkhat sa kikholh, kisiim in zaanhak in nekhawmdawnkhawm in kilaam hi. Khuakhal khaipawi hunsung peen akoikoi ah kialhun hi-a annneek tuidawn kihamsa ciat in mikhempeuh nakiseem in khat leh khatzong kimuh hun tutkhop hun kinei meello hi. I ann ciinte honggah hongkhangcing in mehteh mehgah te huansung ah honggah zihziah a ann tawh kuamah buainawn lo gilkialdaangtaak ki om nawnlo I khai te sengkhit phitphet khitciang ki awl mahmah in khat leh khat zong kileengla in khual gamla pan kihawh kilawmta ban ah ikhawhsa tetung ah kilungdam lua mahmah ahihman in hih khuadopawi akikham ahihi. Thu khat ah kumkhat ikhawhsa te laakkhit hun ahihman in kumkhen pawi zong kici thei veve hi.

Khua, Do, Pawi akhiatna peen J Thang Lian Pau gelh akilasawn ahihi.

Thang Khawm Pau Zomi, USA

A report a kicing dam in hong kisuah ding hi.

Tu’n a slide show na en phot mai un maw!

1st. Thursday: 53^rd CSA (Chin Students’ Association) kumsim khawmpi TCCU Hall Lanva, Lamka ah kibawl.

2nd. Friday:  Burma, Kalemyo (Kawlpi) ah Zomite’n Khuado Pawi lawpna thupitak na zang uhi. Lamka (India) ah zong Khuado Pawi CSA makaihna tawh na lawm uhi.  Tuni Gandhi pianni hi. US President Obama in America I zungpi Mahatma Gandhi hi ci.

3rd. Saturday: Kawlpi ah tuni zong Khuado Pawi kibawl lai hi. Germany, Frankfurt ah Khuado Pawi Germany Zomi Innkuan in kilawm takin mang; tuni mah in Zogam khuapi (capital) Haka ah zong Khuado Pawi kilawm hi.  Australia, Melbourne ah zong Khuado Pawi thupi takin bawl uhi.  Malaysia Zomi Khangnote in Faisal Cup ah prize vala ziahziah uh – U-12 Netball: Champion, U-12 Tukpeng: Champion, U-16 Tukpeng: 2nd Runner Up (A thumna) cih bang in.

4th. Sunday: Tuni a 4-veina TBC Youth Conference Haupi khua, Zogam (Chin State) kipan hi.  Nov 9, 2009 dong ding hi. Resource persons pen Revd Dr. Pum Suan Pau, Revd Go Chin Zam, Revd Tuan Khan Mung leh Sya Go Van Mung te hi-in siam thei mahmah uhhi. Thusin in TBC khangno 500 val kihel thei hi. Mizogam ZBC gambup in Khawk Khoppi bawl.

5th. Monday: ZCLS (Zomi Christian Literature Society) makaihna tawh Ministers Conference tuni kipan.

7th. Wednesday: Tuni Kawlpi ah tuikhang in mitampi zum kah theilo, sum zong theilo in om uh.

9th. Friday: TBC Youth Conference a 4-veina nuamtak in tuni kikhak hi.  ZCLS Ministers Conference man – hih kawmpi sung in Kawlpi ZOMUS makai ding kiteelna zong om a, President Rev Tuan Khan Mung (Tuamung) ahihi.

10th. Saturday: Zomi Innkuan, Aizawl innteekna tawh Khuado Pawi Aizawl khuapi ah amasa pen Vanapa Hall ah kibawl hi. ZIDCO Chairman, Pu Lalrobiaka zong kihel hi.  Portland Zomi Innkuan (USA) in zong tuni Khuado Pawi nasia takin lawm. Sweden Zomi Innkuan in zong tuni mah in Zo ngeina Khuado Pawi lawm uhi.  USA, Michigan State a Battlecreek Zomi Innkuante zindo siamna leh makaihsiamna tawh a masapen Zomi North America Cup tuni kipan.

11th. Sunday: Zomi North America Cup tuni kizo.

12th. Monday: AG Kalay Section 3 kiphuan;

13th. Tuesday: New Delhi ah Khalpiton kici pawi thupitak Thangkhal kampau zangte in bawl;

17th. Saturday: Singapore Zomi Innkuan in tuni Khuado Pawi lawm.

18th. Sunday: Japan, Tokyo ah Zomi Christian Fellowship makaihna tawh Khuado Pawi na lawm uhi.  Lamka ah UBI bank pan sum Rs 4.54 crore mang!  Lanva TCCU Hall ah CSA GHQ election om – Sianu Niangno in President ngah.

19th. Monday: Zomi Christian Literature Society (ZCLS) makaihna tawh tuni sun nai 1:00 hunin Leipi Tuiphum Biakinn-ah Zolai paizia, gelhzia leh masawnzia kikup khopna hunnuamtak kinei a, mi 53 kihel thei hi. Zomi Tennis Open Cup, Florida (US) ah 2009 tuni kipan.

20th. Tuesday: Bass guitar tumsiam Pu Gin Suan Cin aka Cinpi leh apawlte Lazy Club music bandte in USA ah August 13 ni aa kipan Khuapi 15 leh State 9 ah show 11 vei vilvel anuaikhit nung uh tuni in Zangkong lam zuanin hong ciahta uh.

21st. Wednesday:  Zangkong Khuahun – Tonzang gamsung ah Talpak (Meitei) singnuaimi pawl 3 bang om aa, UNLF te bekbek zong galkap 1,000 bang a omding in kiseh hi. Tulaitak in Tonzang khuasung maimual veng Town Hall mai aa inn hoih mahmah khat meitei te’n aleisawm laitak uh ahi hi.

22nd. Thursday:  Washington DC ah Chin Food Aid Concert kibawl ding tawh kisai in lasiamte tuni tung ta uhi – Zomite’n Tedim kampau mi lasiam khat zong a kihelloh lamdang a sak thu uh gen ngeingai.  Zomi Human Rights Foundation (ZHRF) inntekna tawh Challenges and issues facing indigenous people cih thulu zang in seminar Manipur ah ni-nih sung kipan.

24th. Saturday: USA, Tulsa, Oklahoma Zomi Innkuan in Khuado Pawi limci takin na lawm uhi.  Zomi National Congress (ZNC) in thusuah (press release) bawl in 2010 kiteelna ah kihello ding a zia uh leh a hang pulak uhi.

25th.Sunday: USA, Arizona Zomi Innkuan in Khuado Pawi lopna nei.  Tuni in Tonzang ah Mopawi siim mi 5 mawtaw tuahsia in si uhi.  Tg Pau Kap Thang Hatzaw in AIIMS Trauma Centre New Delhi pan hong nusia hi.

26th. Monday:  Tg Pau Kap Thang Hatzaw vuina programme Zomi Christian Fellowship makaihna tawh kinei.

28th. Wednesday: Zomi Tennis Open Cup (Florida) tuni kizo.

29th. Thursday: Burmese Christain Association (BCA) New Delhi in ni 4 sung om ding crusade pan – thugen Rev Dam Suan Mung.

30th. Friday:  Malaysia, Kuala Lumpur ah Zomi 1300 val in Chinese Assembly Hall ah thugenna, lasakna, fashion show etc in nuamtak in khua na do uhi.  Zomi lasiam tampi zong kihel thei hi – Thawn Kham, Sangpi, Taapi, Dalpi etc; Florida Zomi Innkuan in zong Khuado Pawi zang uh a, Lawn Tennis tournament nangawn organise uhi.  ZYA (Zomi Youth Association, Kawlpi) makaihna ni nih sung Leadership For Organizational Effectiveness Thusinna kipan.  The 3rd North East Tamchon Football Trophy, 2009 Dr. Ambedkar Stadium, ITO, New Delhi ah kipan hi. Hih tournament pen Tangkhul Naga Society Delhi (TNSD)te vaihawmna ahihi.

31st. Saturday: USA, Washington DC ah Zomite’n zong Zo ngeina Khuado Pawi nuam takin tuni bawl uhi.  New Delhi ah 29^th Siamsin Annual Conference (SSPP) nuamtak kizang hi.

Undateds!

• 15^th Anniversary Zingsol Magazine kici Zomi Siamsin Kipawlna, Mandalay in hawm khia – Vaphual.net pan download theih.
• Zomi In Diaspora research Sia JM Ngul Khan Pau in a bawl laitak hi a, questionnaire Zomite a ding in hawm khia – Vaphual.net pan zong download theih.
• New Testament Zolai pdf version kihawm; Vaphual.net ah zong download theih.
• Tedim, Lawibual: Pa Tun Khen Pau tanu Lia Go Siam Cing leh a nau Tg Go Lam Tuang-te in tutung September kha in University of Technology, Kalaymyo pan in a unau un B.E (Bachelor of Engineer) degree ngah uh.

November Diary
 
Khuado Pawi New Delhi ah 14th November 2009 ciang kilawm ding.