Ahih kei leh Zomi hilo Zokam thei ahi kha tam maw.
photo credit: andrew_ross

Zomi ahih leh bel ka pianzawh Zomi vanlenghawl ah ka tuancilna, ka khatvei tuankhak na hi dinga, April 19, 2010 ni hi ciin ka ciamteh ding hi. Ka kik lam uh ciang Zomi Diamond zuak khat tawh ka tuangkhawm kha leuleu uh a, a tapa Zomi siavuan (Physician, Medical Doctor) tawh zong ka tuangkhawm kha uh hi. Tua ni pen April 21, 2010 ni hi leuleu hi. Ka zinna peuh ah Zomi mi thupi tawh kituak kha ka hih manin Topa thupha hi ka ci hi. Kuate hiam cih dan leh, “Mi mawkmawklo” vive ka tuakkha hi.

Ka lungnuamlo khat bel nungakno nih ka kiangvua tute pen kawlpau bekbek tawh kiho uh a, tua vanlenghawlpa tawh a kiho ciang bekin Zokam zang se uh hi. Zomi hi napi Zokam zanglo pawl ahi tam ka ci ngiaunguau hi. Tua nungakno te Zomi ahi tam? Zomi hi gige napi Zopau paulo, Zokam zanglo ahi uh tam. Ahih kei leh Zokam siam, Zopau thei uh ahih manin Vanlenghawlpa Zomi tawh akiho uh ciang Zokam zang uh ahi tam. Ahih kei leh nungakte Zomi hi in vanlenghawlpa Zomi hilo in Zokam tawh akihopih uh ahizaw tam?

Zomi a hi – Zokam a paulo, amau leh amau kiho ciang zong Zokam a zanglo om cihna hi. Zomi hinapi ei leh ei kiho ciang zong namdang pau i kawm leh i pau i ham hong dau ding ahih manin ka lungnuam kei. Zokam Zopau a theilo hileng phamawh kei, thei napi zanglo… ka lungnuam kei.

Hau Za Cin
Phuitong Liim
www.hauzacin.blogspot.com

Mihing peuhmah a pianpan a khantoh hun sung khempeuh a nu in a anglum ah tawi in, ama awsuah tawh hopih ciauciau a, a tano in tua mah za masa leh zamun masa pen ahih manin tua tawh hong khangkhia masa hi. Tua pen nu hopihna, nu aw khum, nu aw nem, mother tongue a cih uh ahi hi. Kei, ka nu aw nem Zokam ahi hi.

Zokam tawh ka kipan a, Zokam tawh ka khangkhia a, Zokam tawh lawm leh gual ka khawl a, Zokam mah tawh thu leh la sut leng nuam kasa hi. Tua in ka lungsim hong zo baih pen a, tua in ka lungsim tawng hong deng pen hi. Lia leh Taang kingaihna la bang Zokam tawh kiphuakte nuam kasa a, Pasian ngaih la zong Zokam tawh kiphuakte kei-a diak kasa hi. Nu leh Pa tawh kihona zong Zokam nuam kasa a, thului leh laibu sim ciang zong Zokam mah tel nop pen kasa hi. Khangluite thu leh la suut ciangin zong Zola tawh a kiphuak la tuamtuamte bang bun kasa a, hong zen ngaingai liang in ka thei hi. Mibanga lawmngaih khawng nei thei dinga ka om ciang zawllai khawng ka at hong kul a, zawllai ka at ciangin zong Zokam mah zang leng ka lungsim tawngnung pen ka gensiamzaw in ka thei a, ka gen khit zawh loh hangin ka pulakzo pen hiin ka thei hi. Zawllai ngah khak sunsun ciang zong Zolai tawh ki-at zawllaite pen khum ngaungau a, lungsim hong vut in nak vang liansak hanhan a; hong zo deuh, lungsim tawng hong holh deuh hi. A kigelhna laidal i tawi bek zong i khut ling daldalsak pah hi. ‘Nang kong it pen na hi a…’ cih laigual bang akihel ciang i cimul tho zangzang a, kilungdam lua, ki angtang lua, ‘hi lua, hilua, lungdam si’ng’ ciin ilungsim tuisuak ziahziah hi. ‘Hih leitungah nang bek ka it pen, ka ngaihpen, nang simloh kuamah ka it omlo, zong ka it thei nawnkei ding hi,’ a cih ciang bangin leitung pen paalpi pak sang etlawmzaw in kimuta hi. Tua zah a lungsim hong zo laimal leh awkhum pen Zokam pan hong luangkhia itna ngaihna thu ahi hi.

Minam dang lak ah bual in lawm leh gual thak ka tuah ciangin zong Zokam zangte zaha lungsim hong bunzo omlo hi. ‘I love you. I love you so much’ hong kicih ciangin zong a gennop a thuk mahmah hangin, ‘hong it ing, hong ngai ing’ cih sangin dauzaw kasa hi. A deihna leh a gente lungsim a tawng nungpen hi kha ding hi, a lungsim ah a ip zawh nawnloh leh a ngaihsutna taktak hikha ding hi. Kei lungsim ah vaitham sawt thei tuanlo hi. ‘Ka va han duhtak che em’ hong kicih hangin lungsim ah thaam zolo a, ‘ka lungdumtu ber ini asin’ hong kicih ni in zong kilungkim zolo hi. Lungsim tawng ah a zak nuam mahmah kammal om a, tua pen Zokam tawh hong kigen siausiau ciang ahi hi.

Bang hanga hizah taka Zokam in ka lungsim hong zodiak hiding hiam cih ka ngaihsut ciangin ka pian pan kipan ka nu in Zokam tawh hong hopih a, ka ihmut sung nangawn in hong hopih in, ka vak kal, ka pusuah kal in zong Zokam tawh ‘ka boihno koi ah a om tam aw, kua tawh a kikhawl tam aw’ ci-a hong kankan man ahi tam khawng peuh ka ci hi. Ahih kei leh ka suah pan kipan tuni ciang dong kei hong bawlpa Pa Pasian kiangah lungdam a koh ni, lungkham a koh ni, kei thupha hong piak ni, cihte in vantunga om Pa Pasian pen Zokam bek mah tawh a hopih den man ahi tam aw ka ci hi. Pau ka kisin ciil in Zokam hong sinsak masa hi dinga, ka khut benga lasak ka kisin ciil in zong Zokam tawh la hong sasak hi ding hi. Kei leh ka sen tunnu kikal bek hilo, kei leh amah leh ka pianna pa leh Pa Pasian kikal thu leh la khempeuh zong Zokam tawh na van, Zokam tawh na sai khin thei ahih manin kei adingin Zokam khum diak hi ding hi. Pasian phat a lungdama a laam diaidiai ciangin zong a lasak nopsak pawl pen Zokam tawh kiphuak late hi a, pau tuam leh kam tuam hi masa lo hi. Pasian itna tangko a Pulpit tung pan Kalvari itna thu leh sisan manpha thute a tangko ni in zong Zokam mah tawh na gen khia den hi. Nop ni dah ni a om khak ciangin zong Zokam tawh zin leh leng na do in, Zokam aw nem tak tawh na kha khia kik a, itna phawkna thute zong Zokam tawh na mop den hi.

Kei leltak zong laipai thei a gual khat gual nih ka kuih pan kipan tuni dongin pau tuamtuam tawh zawlthu, tangthu, thu leh la ka theih ka siam bangbang ciamteh a ka gelh zel hangin a dang pau namte sangin Zokam in ka lungsim hong nosuak sak pen hi. Zokam mah tawh paunak leh thuciin bun zaw a, Zokam mah tawh gelh leng siang sinsen in kitel zaw hi. Ahi zongin Kawlpi ka zin ciangin ka Zokam siamna ka behlap nop tha hong suak hi. Kawlpi ka tun ma, Zangkong ka tun tak ciangin ka minam pih Zomi omte Zokam pen a kammal kicingzaw, thugen ciang thu bun zaw, la suut ciang la bunzaw cih ka mu pah hi. Tua manin kei a pen kicing nai hetlo hi cih ka tel pah hi. Zokam ka siamnopna hong kibehlap a, kammal zat dan ka siambeh nuam hi.

Kawlpi ka tun tak ciangin Zomi sungah a deu hetlo Sia Rev. Job Thawngno hong vaidawn hong holimpihna kammalte, hong pahtawi hong lungkimsakna kammalte, hong hansuah hong vaikhakna kammalte ka zak ciangin ‘ka kisin ding tam si e’ cih bekbek ka lungsim ah hong dim hi. Aman, “Cin leh Cing pen a kilamdanna ‘g’ (‘zi’) bek hi a, tua a kilamdanna ‘g’ pen – Cinpu adingin Cingpi pen a ‘zi’ (‘g’) ahih manin amau pen Topa gawm ahi hi,” cih bangin Zokam zang siam hi. “‘Hau Za Cin’ cih leh ‘Haiciin’ cih limlim zong kinai mahmah ahih manin a kinai sem dinga Topa gelsa hi ding hi,” cih bangin zong Zokam zang siam tazen hi. Tua ni panin Zokam ka siamnopna hong kibehlap kaan lai hi.

Nu ei, ikimuh theih angtang si’ing, nuam peuhmah si ing, hampha kisa lua ing, lungdam lua peuhmah si ing… cih bang kammalte ka zakna pan Zokam ka siamnop semsemna hong khang hanhan hi. ‘Dam maw’ cih geugau sangin ‘Hong dam maw, cidam in hong tung thei maw?’ cih kammalte khawng na khum ngaungau zaw a, ‘dam mah’ cih suk pah gaga sangin ‘Note thungetsakna leh Pasian hehpihna tawh hong dam mah ung ei,’ cih khawng na khumzawlai hi. ‘Ankuang thungetna nei ni’ cih sangin ‘ankuang tungah lungdam ko ni’ cih khawng na kilawmzaw a, ‘thungetkhopna hun zang ni’ cih sang ‘vekpi ki-apna hun hisak ni’ cih kilawmzaw hi.

Tua bang kammal nem leh kilawm, a gennop kicing mahmah zawlai Zokam te ka zak ciang Zokam ka siamloh lam ka phawk a, ka siamnopna hong khang hi. Zokam pen pau thei ing, ka gennop zong gen thei le ling, ka gente zong mi in theisiam lel inteh, ahi zongin ‘siam’ dingin ka kisin takpi mah kisam lai cih ka phawk hi. Zomi hi’ing a Zokam ka theih hoih a, ka siam hoihzaw lai hi. Ka nu hong hopihna aw khum (ka bilkha ah) ka zak den theihna dingin Zokam ka siam takpi mah a hoihpen ahi hi.

Hau Za Cin

Phuitong Liim

Vang ngaihno khut len kawm in leitung kimvial a ka zinpih ka American Tourister suitcase tawh Zangkong vanlengtual ka tuk suk deda leh Zangkong khuapi lut phei na ding ah, “Welcome to Yangon” na kici pah a, a langlam ka et leh “Welcome to Myanmar, The Golden Land” cih na kisuang hi. Vanlengtual lah Ronald Reagan International Airport , Washington DC zahin na siangtho kilkel ahih manin kei zong ka kiim ka kianga vak hialhial mikang khualzinte bangin nuam kasa hiaihiai pah hi.

1. Pagoda tam: Lamdang ka sak khat pen vanlentung pan zong kimu pah, khuapi sung lut leng zong kimu sem, khuadak tam leng kitam muh semsem – pagoda. Kawlte pen a tamzaw Buddhist hi a, kawlgam zong ‘the land of pagoda – Burma ’ kici mah hi. Mun khempeuh ah kham tawh kizut pagoda kimu a, Buddhist siampi zong kimu kawikawi hi.

2. Sai kang en: ‘The land of white elephant – Siam ’ kici hi napi Kawlgam ah Sai kang ka va mu kha hi. Siam ( Thailand ) pen Sai kang omna gam ciin a kiciamteh hi a, Kawlgam ah Sai kang om cih kiza ngeilo hi. Ahi zongin Zangkong khuapi laizang ah Sai kang khat kikhawi a, a nu (female) hi in, ta khat neita a, a pi suakta cihna hi. Rakhine gam pan kum 2002 kuma kila hi a, gamsung kimkot hawlpih in vanleng tawh kipua kawikawi zo kici hi. Maan zaih kiphallo a, kamphatna a deihte in tua mun ah va bia uh, ann va pia uh kici hi. Kumpi in, “Hih Sai kang om hangin gamsungah kilemna om ding, nek leh dawn kicing ding, sum leh pai kihau ding, hamphatna hong pia ding hi,” ci uh hi, kici hi. Et taak veve thong.

3. Ngapik lim lua: Kawlgam sungah a kine ngapikte pen gampua ah hong kizuak ngapik tawh kibang vetlo in na lim mahmah mawk hi. Nidang India lam khawngah hong kizuakte pen uih cihtak uih, vom dia dua, kihhuai phial ahih manin ngapik ka ne nuam kei a, a nete zong lamdang kasa hi. Ahi zongin amau nek leh hong kizuak ngeite kibang vetlo a, ‘ba i theem’ a cihte uh na hi bilbel hi. Laphettoh zong Tonsim omlai ka nekte uh sang Singapore omlai ka nekte uh limzaw pekpek hi. Kawlgam ah zong a lim penpente kimu leuleu hi. Nidang, tun zong hilai in um ing, Aizawl te in ‘Shillong bawngsa lim’ ciin bawngsa ciatciat a tam man zaw in a leinop uh tawh kibang hi.

4. Zomi hizah pha maw?: Kawlpi ka tun ciang ka vakna peuh Zomi, lam gei khempeuh inn min en leng Zomi min kisuang, ‘Zomi hihzah om hitazen maw’ ka ci a, ka inntek pah hi. Ka suah ka khan Zomi hih zah ka mu ngei kei hi. Nidangin saklam pan khualzinte in, No mizogam ah Zomi om maw? Hong cih ciangin na’ kasa pian a, ei tam kisak simsim laia ‘om maw’ hong cih pen tawm hongsa pian cihna ahih manin hong tawm muh si e ka ci hi. Ahi zongin amau hong kipatna tawh tuat lehang ahi lua ding na hi mawk hi. Zomi hong bawl Pasian min ka lungsim in ka phawk velval hi.

5. Siangtho sitset: Nung kum lamin India pan siate khat khualzinna thu a gelhna ah, “Zangkong khuasung siangtho mahmah hi,” acih pen lamdang sa, a taktak in ci leng umlah sim, a kamsiam a hizaw kha tam ci nuam sim hi ing. Ahizongin keima mit mahmah tawh ka va muh ciang ‘siangtho takpi’ a, lamdang kasakna double (kibehlap) hi. ‘Air con Taxi’ a cih zong lamdang kasak sim leh US , Singapore khawng mah bangin car sungah Air Con om na zang vial uh hi.

India khuapi Delhi zin sangin Kawlgam khuapi Zangkong zin pen a nuamzaw na himawk hi.

6. Nitumna lam ‘Saklam’ ci uh: Kawlgam pan India hong zinsuk peuhmah in a paina lam uh nitumna lam hita mah leh ‘saklam’ ci den uh hi. Geography theilo na hi uh hiam? cihnop huai phial hi. Ahi zongin Kawlzang ah teng lehang India lam zin ding pen mualtungah kahtoh kul, a niam pan a sangzaw ah kahtoh kisam ahih manin ‘saklam’ cih pen a olno cik ding himah hi. Khuadak leng zong taikua khen lam pen mualtung vive himawk a, kahtoh ding kihtakhuai sim hi. Tua hi a, nitumna lam hong zinsuk uh ciang ‘saklam’ a cih uh leh zong amau tenna zanggam pan mualtung kahto ahih manuh hi ciin theisiam ni. ‘Khua nuam icih peuhmah a sangna lam ah om hi’ kici a, mualtung khua pen zanggam khua sangin nuamzaw den hi. Tua manin Zomi tampi tenna khua pen mualtung ahi hi.

Aw ka tenna vangkhua mualdawn Zolenmui kai,

Nun a nuam lunta vangkhua ka ngai tuanlo,

Zomi in kei ka piang, Zomi bang ka nungta,

Zomi bangin tu in la ka sa.

7. An lim peuhmah: Gam khangto leh anlim neta kei phak ngeina gam pawlkhat – Sen , Singapore , Hong Kong , US , Japan khawng mah bangin nek leh dawn kicinga, mehteh mehgah ban ah singgah theipuam leh dawn ding tuivot tuamtuam lim mahmah hi. India omlai masala spicy food leh niangtui sa mahmah tawh lungkim mahmah hun khawng kingai ngaungau khollo hi. Tua hunte tawh teh in kawlgam pen nek leh dawn ah a kiningcing mahmah, a nuamsa mahmah uh himawk hi. Sensai lah tam, Kalasai lah om, Kawlsai lah thupisem.

Zo-ann mah limpen sa ing icih bel a limzaw dang itam nek nailoh man hikha thei ding hi. Zo-ann mah cidamhuai pen sa ing ci leng bel umzawta ing; Zohuan bel tuiso sungah mehteh mehgah kikhahsuk ziau in – sathau, ci, cikhum kihelse lo; a thuk, a uih, a hiing cih lah kihel selo ahih manin siangtho, cidamhuai penpen bek hi.

Cidam na ut leh Zo-ann tam nek inla, anlim na duh leh namdang ann zong ciam in.

(zop lai ding)

Hau Za Cin

Phuitong Liim

Galkap Kumpi dinmun

Amasain Galkap kumpi in hih Election hong bawl sawm na uh tawh kisai et masak ding hoih sa ing. Kum 20 sung amau khutsung ah kiukna, hauhna leh adang phattuam na tampi ngah khin uh hi. Kum 1 in Gas man bekbek $ Million 2000 ngah mawk uhi. Tuateng leh adang leisungpan piang Suangmanpha tampi te nusia-in Kawlgam Democracy dingin Election kabawl dinguh cihpen Mipi lungkimna tawh akibawl ding Election ahih ding bel ngaihsut na vet zong kul nawn lo phial hi. Tuabanah Gamthukhun abawl uhleh Election law abawlte uh pen alangpang ding te bangmah atat theihloh nang akhe uh asattawng sak khitsa hong suak mawk hi.

Hih thuteng i et ciang ki ukna pen mipi tungah suan nuam lolua cihna hi pak hi. Amau utbang hileh Kiteelna pen bawl nuam hetlo ding uh hi. Ki ukna Aana honglak khit aa kipan Roadmap hong bawl uh aa, tua tengpen kum 20 bang hun hongla uh hi. Gamsung gampua pan-in ah Roadmap abawluh lungduai takin ki ngak bawl ahihmanin Election abawlding uh simloh paulap ding nei nawnlo hong suak ta uh hi. Ahizongin hailo uh ahihman un Election abawlkhit masiah paulap ding hong om nawn kei suak leh Election ah amau teng mahin hong uk suak theih nangin abawlsa hongsuakin ami ding zong amau tengmah Pheituam tual hong suahin Puanten tual hong teng pah khin uh hi.

Thukhatah bang Ni-in Election ki pan ding hi, ci-a hong tangko khiat loh uh pen Phe kimawl ten acihmawh uh teh zatding Phedal khat asel sim uh tawh hong kibang mahmah hi. (Mipi in hih Election tawh kisai lungkim lo-in gamsung hongbuai dinguh angak zong hi thei aa, hongbuai leh Marshellaw tawh amau ki ukna hongzom leuleu thei ding uh hi. Mualtungmi te tawh akikap dinguh zong hun hong sawt toutou uha tua zong hong paulap thei ding uh hi. International force zong hong paulap thei lai ding uh hi.) hi pen asel-uh Phe dal khat azat ding uh hi thei hi.

Hih election pen hongbawl taktak thei uhleh ei Mipi ten kua Vote khia ding i hiam, cihpen i ngaitsut huai mahmah thu khat hong suak hi. Gamthukhun sungah Galkap ten 25% alaksa uh hi-a, 75% pen Mipi sungah kihawm ding hi aa, tua 75% dingin zong amau USDP mahin laak sawm lai uh hi. USDP lobuangin kawlgam bupah mee kuang lui zolo ding uhi. Galkap kumpi mahin hong Uk veve ding cihna hi.

CNP vote ding maw, USDP vote ding?

Hih ki teelna pen Polictic lam ah mipi deihna hilo (Thuman tak aa akibawl hilo) cih pen theisa hi. Minam adingin avei mahmah Pu Zozam (CNP) kuanglui na ah Vote apia ding hileng, Tedim gam bangciang kapuah ding aa, Minam aa dingin bangciang kasem ding hi, cih tawh mipi hong zol ding hi. Zogam mipi in Galkap te makaihna deih nawnlo in amah(CNP) vote pia tekin angah dingin ngaih sun leng, akuanglui lai aa agen Tedim gam, Zogam puah ding acih pen hong tangtut diam? ngaihsut huai hi. Pu Zozam in bel MP khasum ngah pelmawh ven cin, gampuah nang Zogam Budget ding Galkap kumpi kiang angah zo ding hiam. Galkap kumpi inbel CNP in angah leh akik ah amau mi Vote ngah ding deihna tawh CNP atat theih loh nang hong vai hawm ding hi. CNP background ah Zogam adeihsak mahmah Galkap Ulian aom leh cih loh bangmah hong gamtang theilo kha ding hi. Background kician aneih simsim leh Vote piaktak mahmah aa, zong hong vai hawm zo kha dingin lam en ing.

Ih gen mahbangin Pu Zozam pen minam vei bek leh gamdang pan aki support mawkmawk ahih lel lehbel keibangin USDP mah Vote pia ding hing. USDP makai zong Zomi sungpan khatmah hong hiding aa amanzong gam puah zawh nang lampi hi, hongci kha ngelngel ding hi. Adangdangte sangin lamet om zaw hi.

1. Pu Thawng Kho Thang (UNLD) in bel “kiteelna ah lut-in MP suak mah taleng Innpi sungah Veih nangawn aki sang theilo ding aa abawl sa uhi. Alutten zong Thuman lohna na muh ciangun na lut uh na kisiik kik lel ding uh hi” ci hi.
2. Pu Chin Sian Thang (ZNC) in bel ” Kiteelna ah Kuanglui-in MP ihi phial zongin MP khasum lo buang Mipi aa dingin bangmah kisem thei tuanlo ding hi. MP khasum deihna tawh kiteelna lutsangin tua sum ding na semin zong nuam zaw ing” ci hi.
3. Pu Zozam (CNP) leh kuanglui ding teng in bel ” Innpi sungah mun ngah zahzah lak ding hi-a, hoih ih sak loh tengpen damdam in kipuah thei zaw ding hi, cih lam etna nei uh-a, kam tawh ahoihloh na teng i gengen sangin lut-in sem khia leng asia apha ki thei zaw ding” ci uh hi.

Kei muhna ah bel Thuman thutak tawh aki bawl lo ding Election ah Party dang bawl behbeh kul nawn lo a, aom sa sungpan Zogam hong puah zo ding Party khat ah Vote piak dingin ngaih sun ing. Hih atung aa tengpen keimimal muhna kong sung khiat hi.

Laiat,
A.Lian
Frankfurt

Tavuan neite in tu dongin a luangte uh hemkhjia khjin nai lo a, a liamte ahih leh Yangon zatopi ah a puak lai tak uh ahi hi.

Political Party phuatding leh phuatlohding kikup nawina om aa phuatding hoihsa tek uh hi. Thugen nawina nitak nai 3:00 in ki tawlnga photin sun siah nekna kinei phot hi. Sun siah nekkhit ciangin amin ding kikup ding hong suah uh hi. Pu Gin Kam Lian, ZNC Secretary leh Pu Khuang Lian te’n hun makaih uh hi.  Pawl khat in amin ah Chin mah kihel ngiat leh ci uh hi. Sponsorpu Pu Zung Hlei Thang in “Ken bel Chin cih kammal akihel teekteek kei zongin phamawh sa keng, Progressive Action Party khawng cisuk lel leng hoihsa ing” ci hi. Sia Khen Kawlpi in “Chin nacih sawm teeiteei uh leh bel ko hong kihel theilo ding suak mai nung” ci hi. Khat pa in “Chin ih cih kei leh koimah ah ngahkei ni” acih nong ciangin Pu Gin Kam Lian in “1990 kum kiteel lai inzong Chin minpua Chin League in koiteng ah ngahtuan ahiam? amin sangin ih nasep thupi zaw hi” acih baan ah “Leitung mun tuamtuam ah Chin min zuak mi tampi omta hi” cilai hi.

Thu ki baan gengen in among om thei meello ahih man in DAN in thukimna sa aneih tawh kituak in Pu Gin Kam Lian in “Tuni kong sapna uh pen tu aa bangmah aa ngaihsut hoih atuamtuam nongpiak ding mah uh kadeihman vua hong sam hi ung. DAN in ahoihthei pen in hong geel ding hi” ci in hunkhakna nitak nai 4: 00 in nei hi.

Hun mankhit ciangin a innteek deuhteng in mai kikup kik ding vai kikupna nei hi. Tua mun ah Pu Khuang Lian in “One Chin Organization te’n zong political party khat aphuan nuam uh hi in ei hong hungaih phot uh hi” acih baan ah “Bangbang ahizong in tutung hong khiam mai unla Chin mah cini” hong ci mawk hi. Kaheh hongsuak vat aa,  “Chin na ut leh One Chin Organization ah pai in” kacih leh “Tua ahih leh DAN phiat ding maw?” hong ci aa, “Ken phiat keng” kacih khitteh ka ciahsan leh kanung ah  amauzong avek un hong ciah uh hi.

Lungnuam tuanlo ahih manin Zomi makai Pu Chin Sian Thang’ kiang ah Tedim kampau teng ka paiphei uh hi. Ka kikupkup uh ciang un kum hitanvei Zomi mintawh kiding sa, Zomi te’n minam liankhat ih suahtheihna dingin hihzahta aa ih hanciam kawmkal ah Chin va kicih ziau ding pen haksa kasa mahmah uh hi. Tutung uital kiteelna ah constitution review omlo pi in Zomi te’n kiteelna ah katuh keiding uh hi ci aa leitungbup ii hongtheihpih ding aa ki taangko khin ahih manin Zomi mintawh lutlohding hoihzaw dingin ka um uh hi. Ciampeel kisuak ding aa uitalte mai et minam ih suak laiding hi. Kawlgam taangthu ah Zomi min ahoihlo in ih atnuam hetkei hi.

DAN mintawh hileh moderate pen khading baan ah  deihlohpen in uitalte’ ngimna hong tangtung kha leh cihna bek hilel hi. Uitalte’ ngimna atangtun lohna dingin bel septheih tawp in kisem ding hi. Pasian in hong makaih nak leh uitalte’ tupna hong tangtung hetlo lel ding hi. Akipelh theihna ding thu tampi omlai hi. Gen kholh ding ahoihlo bek hi.

Tukha 24 ni teh DAN thu kikupna omkik ding ahih manin Zomi te’n bangci ngaihsut ih hiam ahun omlai in gen dihni ei guai.

Veina bek tawh

Thangboi
Zangkong

Kawlgam bup bawlung kipawlna phungpi (Myanmar Football Federation (MFF) te in tuhun leitungbup tawh liangko kikim a kimawl zawhna ding ngimna in Kawlgambup bawhlung kimawlna phungpi ahi Myanmar Football Federation(MFF) pan siamna athak (Professional) tawh  kalsuan theihna dingin  Myanmar National League (MNL) min tawh a beisa December 2008 kumin laih uh hi. Hih pen Kawlgam bup bawllung Team/Club min ding kiphuak ahih manin leitungbup in hong theihna ding min zong hi dingin deihna nei uh hi.

Tua bangin a kalsuanna ah Leitungbup bawlung kipawlna (FIFA), Asia bawllung kipawlna (AFF), leh ASEAN bawlung kipawlna (AFC) panin President, Secretary leh bawlung siamte tawh kikupna nasiatak nei uh hi. Tua banah Asia gamah bawlung siam minthang S.Korea leh Japan gam pan makaite leh Asean pan makaite tawh kikupna nei in professional kalsuanna zia ding thukhunte bawl uh hi.Myanmar National League ah min khek cingin kimawl ding Team/Club tumatuamte phuan khia uh hi.

Mynamar  National League(MNL) sungah Pro-Club (8) om a, a neite leh makai thuneite a  nuai bang ahi uh hi.

No. Club min Address

Club neipa Club Maganer Coach

1.       Delta United        No.1, Ywama Curve, Ba Yint Naung Road,    Premier Coffee                   U Tin Myint Aung               U San Win
Block (2), Hlaing Tsp., Yangon
www.deltaunitedfoot ballclub. com U aung Moe Kyaw               U Tun Tun Lin                    U Win Tin

2.      Okkthar United     IBTC Co.,Ltd(Grand Royal )                          IBTC  Co., Ltd
Football Club        No.18, Pyay Road, 7 miles.,Yangon

3.      Yangon United     Air Bagan Limited                                       U Tay Za                            U Aung Kyaw Lwin              U Myo Hlaing Win
Football Club       56,Shwe Taung Gyay St.,                            Htoo Groups
Bahan Tsp., Yangon
www.ygnutd.com

4.      Yadanabone        Loi Hein Co.Ltd. (Alpine)                              Dr. Sai Sam Tun                  U Soe Moe Hlaing              Mr.Roham (French Coach)
Football Club       No(117) Wardan(Kele) Road,                        Loi Hein Co.,Ltd.
Lanmadaw Tsp, Yangon
www.yadanarbonfc. com

5.      Kanbawza          Pyay Road, Kamayout Tsp.,                         U Aung Ko Win                     U Maung Maung Lauh        U Aye Maung Gyi
Football Club      Yangon.www.kbzfc. com KBZ Bank

6.      Zayar Shwe       Shew Naga Minn Group of Companies             U Win Myint                         U Myint Thein                    U Nyain Win
Myay FC           (H,O)Room No-101,Frist Floor,Central Tower,   Shwe Naga Minn
Between 39th and 40th st.Kyautktata Tsp.        Groups Co.,Ltd
www.zeyarfc. com

7.     Southern             Yuzana Construction,                                    U Htee Myint                        U Myint Kyu                     U Kyaw Tine
Myanmar FC       Shwegontine, Bahan Tsp.,                             Yuzana Co.,Ltd
www.southernmmfc. com

8.     Magway FC         Asia World                                                   U Tun Myint Naing                 U Sein Taung                   U Kyi Lwin
No(61/62), Central Post Office Lane,                Asia World Co.,Ltd
Lanmadaw Tsp.
www.magwayfootballc lub.com

Hih a tung a MNL sung a om Club (8) banah tukum a kipan a nuai aa athak Club (3) te kibehlap dingin min piakna nei ta uh cih thukiza hi.

1. Nyipyidaw FC       – Nyipyidaw
2. Zwekabin United   – Karen State
3. Manawmyay  FC  -  Kachin State

Hih a thakte sungah Nyipyidaw ah kimawl dingin Zomi Tg.Lal Ceu Luai leh bawlung siam mi 31 te in MNL ah  minsazian piakna Febraury 1,2010 ni in nei ta cih Myanma Alin Newspaper pan kiza hi. Tg. Lal Ceu Luai pen a beisa Myanmar  Olympic Selected Club (U-23) pan leh Myanmar Fusal Selected pan teel ngah hi. South East Asia leh South East Asia Fusal Selected ngah a Kawlgambup aitang in kimawl khin ahi hi.

Nyipyidaw FC min tawh MNL ah Tg. Lal Ceu Luai kimawlna ding khasum leh Club dangah akileina ding tawh kisai pulakna a om nai loh hangin, tuhun laitak  Myanmar Professional khatin khakhat in Ks.30000 – 1500000/- kikal kipia hi. Nyipidaw FC ah Tg. Lal Ceu Luai in khakhat in Ks.500000 ngah ding cih kiza hi. Tg. Lal Ceu Luai in a beisa hunin Ministry of Construction Club (sauhluhzi Vuanzi thanah) ah a kimawl laitak in Tg. Thang Cin Mang ( Forsetry Ministry Club) leh Tg. Vial Za Kam ( Ministry of Defence) tetawh kimawl khawm ngei uh ahi hi.

Zomite Pasian in kawlgam bup Level dinmun ah hong lamto ta ahih manin Pasian min phat loin i om thei kei hi. Pasian deihna om leh Zomi Football Association (ZOFA) pan Sia Do Khan Khup, Oasis Football Club, Founder and Chairman, in hong laksak ZOFA Selected mi 3 te zong asawt loin MNL sungah hong kihel zawh lai na dingin thungetna ah phawk ciat ni. Zomite hanlungciam khangto diam!

Repoter by- Tongsan Media Group

India Union home Secretary Mr.Gopal K.Pillai makai in palai mi 10 te leh Kawlgam General pawl khat Muanhuai khuapi(Naypyidaw) ah January 19,2010 ni in India gam leh Kawlgam-Zogam gamgi Meiteite tawh kibuaina vai thukikupna nasiatak nei uh hi. A hi zongin Indian’s ministry of Home Affairs lamte in thu kician pulakna nei thei lo uh hi. Hih thukikupna tawh kisai in New Delhi pansan Thukizakna ahi “The Times of India” in Jan.19,2010 ni suak tawh a genna ah hih gamgi buaina tawh kisai pen Kachin gam sung a om Meitei galkal United Liberation Front of Assam te in India Kumpi panpihna tawh kidona thu bulpite akan beh lai dingin Kawlgam kumpite in pulakna nei uh ci hi. Hih thu tawh kisai India Palaite in Kawl kumpi tungah vaipuak guan uh cih kiza hi.

Tua hi in,hih buaina tawh kisai in Kawl kumpite le India gamnih mapang khawm a, siangtho sak mengmeng dingin kikum uh cih kiza hi. Hih buaina bulpi akikupna uh ah India gamgi leh Zogam gamgi tengah Meite galkapte in Beng(zavom) nasiatak cing uh a Sen(China) kumpi tawh kizom a nasem khawm hi dingin ki ummawh cih thu “The Times of India” in gen lai hi. A beisa kum October sungin Indian Army Chief General Deepak Kapoor’ Kawlgam zinngei a, Senior General Than Shwe tawh kimu hi. Naypyidaw ah India palaite tukum ading a khatvei zinna ahi hi.

A mau kikupna ah Kawlgam le India gamgi 1,630 KM sungah Gamgi a nawngkai sak pen gamnuai mite ahi United National Liberation Front, The People’s liberation Army, Naga leh Kuki cihteng in munli ah nasem in buaina piangsak den uh ci in India palaite in thugenna nei uh hi. Tua bek tham loin India gam sung Arunachal Pradesh, Nagaland, Manipur leh Mizoram state sung tengah zong buaina piangsak den ahihna thute gen lai uh hi. Hih mite khempeuh pen India gam panin Kawlgam leh Sengam(Sino- Burmese) ah khamtheih nasepna ngimna bulpi a hi cih kigen hi.

India leh Kawlgam kumpi in a beisa 1993 kum lai akipan gam nih sum lei sum zuakna nasiatak neih ding thukimna nei uh hi. Tu laitak Indiate pen Kawlgamte kipawlpih a muanpi pen Chin, Singapore leh Thailand te hi in, tua zomah India a li na ahi uh hi. 2007-2008 sung bekbek gamnih sum bawl kizopna tungtangah US$ 995 Million pha in, tua sung panin US$ 810million man Kawlgam pan India ah kizuak khia hi. Tua ahih manin Kawlgam kumpi in gamgi buaina vai bang mah awlmawhna om lo ahihna kimu uh hi. Tua banah Arakan State, Sittwe seaport leh Kaladan Multi-Modal Transit Transportaion Project nasepna ading bekbek in India kumpi in US$ 117 million pia khia lai uh hi.

Tua hi in hih gamnih thukikupna pen kilawmsakna thukikupna lel dingin kigensia mahmah hi. India te pen leitungah Democrecy ukna gam minthang mahmah khat ahih hangin, Kawlgam mite deihsakna leh democrecy mantak neih ding deihsakna cihte nei loin, kawlgam sung a van manphate a deih man bek hi ci in New York pansan a nasem Human Rights Watch pawlte in gensia mahmah uh hi. Hih bang tawh gamgi buaina siang zo ngei lo ding a, sia semsem zaw dingin thumute in gen uh hi. India ulain palaite nung Monday ni in New delhi pan ding khia uh a, Friday Jan.22,2010 ni in India zuan kik ding uh cih kiza hi.

Reporter-Tongsan tanute

Src: Irrawaddy

U Tay Za in gam sung gam pua ah kizang Air Bagan neipa in kithei pha mahmah a, Motor lei/zuak kik, sing at set Company, buh gawina set Company, Suang manpha lei/zuak nasep company, tuitha tawh lo nasepna lam cih bangin nasep lian tampi mah asem mihau minthang ahi hi. U Tay Za pen bawllung lamah Yangon United FC kici a neipa zong ahi hi. A sawt loin Kawlgam sungah tui tha tawh khuaphelep mei (electric hydro power) nasepna lianpi mun nih kumpite tawh sem khawm ding cih kiza hi.

U Zaw Zaw pen Myanmar National Leage (MNL) kici a minthang a phuan khia pa hi in, tulaitak ciang dong Myanamar Football Federation ah Chairman sem hi. Gam sung le gamdang pan bawllung siamte sam a, sum teng tultul a sim apia khia ziahziah pah ahi hi. Tua bek tham loin, Hotel, Motor lei/zuak nasem, Buangnai kung cinna Lo Ekka 3000 nei, Billatmee(Max Cement) bawlna setzung nei, Yangon-Bago kikal Motor lampi sap ngetna bawl, Nyipithaw khuapi lamna ah makai, Mandalay kianga om Yadanabon Cyber City kilamna ah makai sem, Phakan suangkhuk ah nasempi cih bangin Company tampi nei lai hi. Nargis tungtang ah huhna Teng tulnih val bang a pia khia mihau aminthang ahi hi.

Hihte nih pen Kawl Kumpite tawh kipawlsim a nasem siam mahmahte hi in, kumpite maiet zia zong a siam mahmah cih kigen ahi hi. Hihte lakah Zomite kihel hun ding galet kawm in, Zomite hanlungciam khangto diam..

Report by Tongsan
Src: Irrawady

Kawlgam in Russia tawh kithukimna (contract) a neih bang in Russia in MiG-29 vanleng 20 pia ding hi.

Hih kithukimna pen 400m euros (£356m; $570m) hi cih Russian galvan bawl company Rosoboronexport sungthu theite in gen hi.

Gam tampi in Kawlgam pen a human rights record hoihloh man in sumbawl leh vanlei ding phal lo uhi.

Ahih hang in Kawlgam a uk galkap mang-te in van hi in, galvan nangawn a vengte uh China, India leh Russia gam pan ngah veve hi.

The Kommersant kici thukizakna in Russia in Kawlgam MiG gal vanleng 12 2001 kum in leisak zo hi ci hi.

Rosoboronexport sungthu theite mah in 1990s in Kawlgam (Burma) in China pan gal vanleng $2bn man lei zo hi ci sawnsawn hi.

2010 ciang in Kawlgam bup kiteelna om ding hi a, galkap mangte a ki thawithawi hi leh kilawm mawk hi.

photo credit: mashleymorgan