Christ (Christos)

Christ cih kammal Greek pau Christos pan in hongpai hi a, Hebrew pauin Mashiach, Messiah a hihi. Greek pau Christos le Hebrew pau Mashiach, a khiatna kibang hi a, sathau kinilhpa (the anointed one) cih na hi. Thuciam lui (Old Testament= OT) sungah mashach= sathaunilh cih kam mal 140 vei ki mu hi.

Kuate Sathau ki nilh hiam? Kamsangte, Siampite leh Kumpite a hi uh hi.

1. Kamsangte (Prophets), Kamsang ih cihte in Pasian thu gente, a hi bangbang in mipite tung ah gen uh hi. (Prophets represented God among the people (IKings 19:15-16).
2. Siampite (Priests), Siampi ih cih te in mipite thu, thu piang khat peuhpeuh Pasian tung ah pulakna nasep a neite ahi uh hi. (Priests represented the people before God through sacrifices and prayers( Ex. 28:40-41)
3. Kumpite (Kings), OT sung a Kumpi te in, Pasian taangin mipite ukna leh kepna thu nei uh hi.(Kings defended and ruled over the people on behalf of God)(1 Sam.16:12-13).

Messiah (Christiante upna)

A tom in gen leng, Leitungmite mawhna pan in hong honkhiading, Pasian hong sawlpa, Pasian tapa Jesus Christ a hihi.

Messiah (Judah Biaknate upna)

Thuciamlui (OT) sungah a ki mu thei thuin, Isreal mite tamveipi mite khutnuai ah sal in om ngei cih a hihi. Khatvei leh Egypt gamah, khatvei leh Babylon gamah cih bangin na omsuk omto uh hi. Tua bangin mite khutnuai ah omin, suahtak zawhna ding lampi zong om nawnlo, lunggim singim in om uha, ih mailamding bingta hi, bangmah ih hih zo nawn kei ding hi, ih hanciam nasate zong a mawkna suakkhinta hi, ci in lungkham, thanem, lametbei in na om uh hi. A zawdeuh in Babylon gam ah tuabangin a om laitak un, Jews mite suahtak theihna dingin Pasianin Persia te kumpi, Cyrus (580-529 BC) zangin, Kum 70 sung vilvel Babylon gamah saltana panin Israelte suahtakna ngah sak hi. Cyrus ih cih pa Jews te zong hilo, Pasian zong theikha beeklo hina pi in, Pasian in Isrealte suahtakna ding in sathau na nilh biikbeek mawk hi. (Isaiah 45:1, Ezra 1:1ff). Tua hi a, Judah Biakna a zuite a dingin Messiah in, Salsuahna panin suahtaakna a piading Pasian sawlpa cih a hihi. ( Messiah is the awaited redeemer of the Jews, to be sent by God to free them). Tua hi a, Messiah ih cih in, gam khat peuhpeuh  leh minam khat peuhpeuh  a suakta sak theiding sathau kinilhte cihna in zong ki khiathei hi. (Government, Politics & Diplomacy, an exceptional or hoped for liberator of a country or people).

Tua hi a, Kawlgam sung, hih bang thu bialbual kawm kalah, lungsim sungah hongsuak thu in, Hihbang hunlaitakin Kawlgam adingin Christ ih cih in kua hi mawkding ahi hiam? Laisim mipite kong dotnop thu in:

Who is Christ (Jesus) for Myanmar at this time?

CSKhai

The University of Hamburg, Germany

April 1, 2010

Lungdam. GK

Mawh nei leitung mite honkhia ding aa mi bang aa hong piang, bawngkuang sung aa hong suak “Immanuel Pasian” kiang pan hong luang khia nop na leh thupha nam kim nang tung ah hong tung ta hen. “Van a sangbel na ah Pasian minthang ta hen. Leitung a deih mite tung ah nopna om ta hen” ci in vatung mite a ki ko bang mah un, Zeisu sung aa om nop na ih ngah na ding in “deihna, lungulh na tawh” a mah ih lungsim sung ah ihsap leh ih san kul hi. A sangsa mi khempeuh leh a sanglai ding te hang ih ih lungdam hi. A sang thei nailo te aa ding in thu ngetsak ni.

Ih mun tek ah haksat na tuamtuam leh nopsa na te ih tuah kawmkal ah, tuni ciang ih nuntakna hong kepsak aa, kum 2009 pan 2010 sung hong lutpih ding ih Pa Pasian in, kum 2010 pen na cidam kum, na lungnop kum, na daupai kum, na lawhcin kum, Pasian tawh na kinai zawk kum leh leitung thupha vantung thupha a nam kim na ngah na san kum ding in hong siam ta hen.

Leitungbup Zomi Innkuan Kipawlna ai tang in,

Chin Do Kham
Chairman
Board of Trustees
Lietungbup Zomi Innkuan Kipawlna

Jesu Christ hong pian pen leitung mihingte leh ganhingte aadingin Lungdamnathu taktak ahi hi. Tua thu a taangko vantungmite zong kipak mahmah uh hi. Vantungmi lasakna choir tawh kithuahin taangko se hi. Vantung kumpipa hongpiak Tapa sang a, letsong alianzaw omlo hi. Apuksa mihingte tan dingin a nuntakna hongpia itna sangin itna lianzaw omlo hi. Vantung mihonpi choir tawh pahtawi-in, a Sangpenpa letsong leitung mite hong pia ahi hi. Tua letsong piakna pawipi pen vantung mikhempeuh a uap dingin kikhawm uh hi. Vantungmi Choir pawl in,”Cikmah a kisa ngeilo Hotkhiatna Lapi” sa uh hi. Tua pen a kisamasa pen Hotkhiatna Lapi ahi hi.

” Pasian vantung mihonte hong kilang a, Topa vangliatna in a kiimkotah hong taang hi, amaute nakpi takin lau uh hi. Vantungmite in amaute kiangah, “Lau kei un, mikhempeuh aading lungdamthu, note tungah kahong puak hi. Tuni-in David khua-ah note Honpa ahi, Christ Topa hong suakzo hi. Bang hongci kihil ding hiam, cihleh naungeek khat puantawh kituun-a bawngkuang sungah kisial namu ding uh hi, a ci hi. Tua khitphetin, vantungmi honpite thakhatin kilang a, ” Van a saangbelna ah om Pasian min thang ta hen. Leitung mite sungah kilemna om tahen. Leitung mite tungah deihsakna thupha kidim hen,” ci-in lasa uh hi. Luke 2:9-14

Matthews 1:21 “..amah in tapa khat a nei ding a, amin Jesu naphuak ding hi, bang hang hiam cihleh ama mipawlte amawhna pan honkhia ding hi.”

Mathews 1:23. ” En un, nungak siangtho in tapa khat a nei ding hi. Amah Emmanuel kici ding hi. A khiatna in, “Eite tawh Pasian omkhawm” acihna ahi hi.

photo credit: Sainshafei

Christmas bang ci zat:

Jesu suahni pen Laisiangtho sungah kiciamteh lo hi. Zatkhialh ding lau ahihmanin Khasiangtho- in imcip hikha ding hi. Jesu thuhilhnate sangin suahni peuh kithupi sehzaw khaleh ci zong hiding hi. Ih bawl kei zongin phamawh salo zong hikha ding hi. Zatsiam leng siatluatna omlo ahizongin, mihingte lampialbaihin zangkhial ding lau zong hiding hi.

Lungdambawl cih Laisiangtho in genlo napi Zomite in Christmas pen Lungdambawl ci-in khia ngiau hi. Lawkite nangawn tawlnga-in anlim kikum uh hi. Europe gamah Christian huzaap haatzaw ahihmanin nakpi-in kithupi seh hi. December buppi Holiday in zang uh hi. Khuasung lamdung a singkung khempeuh electricity meipak tawh zem uh hi. Innkiim aa om nakhempeuh asan-anai colornamkim tawh kituam zihziah hi. Mall leh Shopping center khempeuh meipak namkim tawh kizeem hi. Christmas late kihongin zaknop mahmah hi. Akhawi ganhingte aadingin Christmas puan khuisak uh hi.

Tua kawmkalah Pasian tate in, hunhoih zangin Pasian naseem uh hi. Christian Center muntuamtuamah akhawnkhongin anvak uh hi. Mizawng nasep neilo, inn leh lo neilo tampi kigualin an dawh uh hi. Khakhat sung tawntung tua bangin bawl uh hi. Neektheih antuamtuam kipuak uh hi.Sum tampipi dong uh hi. Tagah huhna in nei uh hi. Africa mizawnggam ah anpuak uh hi. Puansilh kipia bebek mualpi bangin vum hi.

Gamzawng Christian lut theihna mun-a omte in Christmas tunhun ani sehseh uh hi. Lamen mahmah hi. Christmas zatsiam leeng manpha lua hi. Pawlpi-lian tuamtuamte nasep ziate pen thupi mahmah mawk hi. US ah Jesu mintawh nasepnate pen kua demzawh ding hilo hi.

Lungdambawl hunbek hilo hi. US gamah zawng mahmah taleng, amun-amual tualtelte aadingin an kingawl theilo zah dingin naseem uh hi. Mizawng anvaknamun a tuamin omsak ngiat hi. Minsazian pia-in an vasiim tawntung hi. Cinate zong a khongin zatui sun uh hi. Inn neilote kisilna ding hoihtakin bawlsak hi. Super Markette in a khotloh uh ante puak uh hi. Mihaute in leitawmin pia ngiatngiat uh hi. Tuazah a Pasian vantungmi zah mihoih natam mahmah hi.

Satan in zong bawl ve:

Dawimangpa Satan inzong bawl ve hi. December 25 ni US galkapte pawibawlin nuamtakin, Japan ten bomb khiat uh hi. Leitungah December khasungin motor kitaih tampen hun ahi hi. Zukham-a si tullomin om tawntung hi. Bawngsa-emmin leh zu meh uh hi. Bawngsa pen sex thahaat sak hi. Sex haatsak zu minthang manpha pente tawh meh hi. Sun tawh zaan tawh puansuah khia-in laam uh hi. Eden huanah puan kisilhlo hi, cilehbung uh hi. Lungdambawl letsongin amau pumpi kipia mai uh hi.

USgamah Thanksgiving ni pen sai-aak puultunni hi a, Christmas pen bawngpuul tunni ahi hi. Million bangzah kigo diam kitheilo hi. Lungdam bawl ciangin Christian picingna munah Service hoihtak kibawl hi Kimawlna tuamtuam zang uh hi. Sa kihello a lim mahmah vantung manna tawh kibang ne-in lungsim siangthotakin gualnuam uh hi.

Zogamah Lungdam bawl hun hong tun ciangin Lawkite nangawm omkhawmin anlimpen kikum uh hi. Mizawng gamah anlim kihello-in kilungdamzo taktaklo hi. Lungdambawl kigin ni hong tun ciangin, naupangte sa-em nang geukang pua-in dainawl pai uh hi. Lawplua-in paunuam mahmah uh hi. Pawlpi khempeuh in meipum kici ganlian bawng, sial cihbang go uh hi. Laipiante bang in nak bawlsan hi. Gambuppi phialah ganhing tam si lua ahihmanin, ganhingte hehpih huai mahmah hi. Ganhingte pautheilo hi. Nuamna leh dahna omdan tuamtuam tawh lak thei uh hi.

Kaneulai-in uitalsan khat kanei uh hi. Tua ui pen pilmahmah hi. Kapaina khempeuh hong zui hi. Kakhawlnamun khempeuhah kagei neekin kual hi. Nikhat, kapate in, kongsang thoihna dingin ka-ui manin hen uh hi. Amei peekin, hong hon in, cibang kekin hong en hi. Keizong, awngin, “khah un, khah un, ” ci-in naupang kahin kakap hi. Khamzawh hilo-in en ngamlo-in phaitamlam nai-in katai hi. Kah cihtakin kakap hi. Tua ni ka-ui in, hong en a, amei hong peeksan pen , a pau bangin kabil sungah mang ngeilo hi. Ganhingte khuatheilo-in ngaihsun kei in.

Lungdam bawlni zingsang khat, kapa in,ama zakkhopin lakhat hongsa hiathiat hi. ” Taikhua vaal ven, zaangni suak ven, zang sawmsial zong heina bansam nau bang hong kap ding aw e,” ci-in innka dawnah khuadak kawikawi hi. Ganhing tam silua sa-in a lungsim sukha ahitam, ci-in kangaihsun kik kik hi.

Nikhatni ciangin ei Christian nuntak hong saangsemsem leh ganhing zong kigo ngam nawnlo kha ding hi. ” Note pai unla, leitung aa-om Nuntakna-nei khempeuh tungah lungdamnathu vahilh un.” Mark16:15. Lungdamnathu icihpen leitungaa-om nuntakna nei khempeuhte aading ahi hi. Jesu in mihingte bek tankhia lo hi. Ganhingte zong ahi hi. Vanthak leh lei thakah kipet kilai, sa kine om nawnlo ding hi. “Tuuno leh keivomte kikhawl ding uh hi. Humpite in bawng bangin lopa ne ding hi. Gul in leivui anin nei ding hi. Kamual siangtho tungah kiliamsakna leh kithahnate om nawnlo ding hi, Topa in ci hi. ” Isaiah 65:25

A kuamahciat tungah Pasian piak Lungdamna thupha hong tungkim ciat tahen. Lungdamtak leh cidamtakin Lungdampawi zang theiciat dingin hong ompih hen. Asiangtho-alimci lungdampawi suaksak ni.

Banghang tua Messiah pen Jesuh ahi hi ci thei ding ih hiam? Jesuh pen khut tawh bawl loh Pasian Tapa Khrih ahih hang ahi hi. Jesuh Khrih pen Tankhia Pa le tote tungah Topa ahi hi.

Tua lo topa dangdang te ii thute pen “Kawlte kua bawl Pasian bawl, Pasian kua bawl Kawlte bawl cih thu tawh a kibang hi lel hi”.

Philippians 2: 6-11

‘…who though he was in the form of God, did not count equaility with God a thing to be grasped, but made himself nothing, taking the form of a servant, being born in the likeness of men. And being found in human form, he humbled himself by becoming obedient to the point of death, even death on a cross. Therefore, God has highly exalted him and bestowed on him the name that is above every name, so that at the name of Jesus every knee should bow, in heaven and on earth and under the earth, and every tongue confess that Jesus Christ is Lord, to the glory of God the Father.

Jesuh Khrih in Pasian pianzia nei na pi-in, Pasian tawh a ki zakim theihna ding thahatna a suang kei hi. Amah kiniam khiat tawm zaw a, nasem lim a hong puazaw hi. Mihing bangin amah hong kibawl a, mihing teekteek mah ahong sun hi. Amah hong kiniam khiat tawm a, simlamteh tung nangawnah sihding a ut hi. Hih thu hangin Pasian in a lian penin amah koih a, min lian dang khem peuh sangin amin lianzaw-in a koih hi. Tua ahih manin vantung leitung leinuai a om mi khempeuh in Jesuh pahtawi in khukdin dinguha, Jesuh Khrih, Topa ahi hi, ci in taangko in Pa Pasian a min thangsak ding uh hi. Philippians 2: 6-11.

In the universe vantung lei nuai-ah Pasian in leitung (earth) pen a dangdang (planets) te sangin na thupi bawl zawin tua te khempeuh ii a laizangah na koih aa, universe ih cih hih a awng thawlpi lakah a om (planet) dang khempeuh ii centre dingin leitung (earth) pen mihing te omna ding teenna ding nuntaakna mun dingin na teel hi. Tua a tel (planet) ii min pen earth kici leitung ahi hi. Tua leitung ii sung aa om piansak nate khempeuh lakah mihing pen athupi pen-in na bawl hi. Piansakna te khempeuh ii laizangah mihing pen a center (a laimu) na hi leuleu hi. Tua mihing te ii laizangah Jesuh Khrih pen a thupi pen hi aa, tua mihing Tapa Jesuh pen mihing te ii laimu (core) ahi hi. Tua ahih manin Jesuh pen mihing te in ih laitaat ding ahi hi. Mangkam-in gen rehang Jesus is the man of men. He is the real man. He is the real of real. The truth of truth. He is not just like a material truth. He is beyond general truth. Kawlkam in gen rehang Jesuh pen a-maan-ta-za bek hi lo-in ta-maa-ta-za ahi hi. He is the real man for us. Without Jesus you won’t feel real. All reality is in him. Thus Jesus is our reality. Hi bang daan aa Pasian mihing te lakah Universe sungah ong kipho laak khia hi.

Hebrews 1: 2na ah “Ahi zongin tuhun nunung ciangin leitung vantung na khempeuh a bawlin a zat, a tawpna-ah na khempeuh a luah dingin a she a Tapa zaning eite tungah thu hong gen hi” na ci hi.

LST sung mun tampi-ah Jesuh in Pa Pasian sangin neuzaw (less than the Father) in a kigen ciangin Jesuh pen Pasian taktak hi lo-hi banghang hiam cihleh Pa sangin neu zawin a kigen banah ka Pa’ sawl bangbangin ka gamta hi ci hiven a cih huai ahi hi. Ahi zongin hih bang aa Jesuh Khrih kampauna pen liat zawk neu zawkna a gen hi lo-in Pasian pen thumgawm Pasian ahihna a gengen na hi gige hi. Banghang hiam cih leh Jesuh mahmah in kei le ka Pa pumkhat ka hi uh hi. Kei hong mute in Pa a mu khin ahi hi na ci hi. If you had known me, you would have known my Father also. I and the Father are One na ci zel hi (John 10: 30; 14: 7). Tua baanah Jesuh pen Pa sangin a neu zaw bekin kigen lo-in amah le amah sangin zong a neuzaw (less than himself) in zong kigen zel hi. Ih LST simna Philippians 2: 6na in hi Jesuh kampau khempeuh ii laigil khat ahi hi. Jesuh in a kiniam khiatna le Pasian takpi mihingin ong pian khiatna thu, mihing ahihna ah Pasian sangin a neu zaw bangin mihing kampau (human language) tawh kampau ahi hi. Ih LST simna Philippians 2: 6-11na in Jesuh pen za ah za Pasian za ah za mihing maan ahihna kitel takin hong gen khia hi.

Thumgawm Pasian

Hi thumgawm Pasian thu pen ei mihing pilna siamna tawh a kigen siang khit theih ngei loh ding a lamdang pianzia hi aa tua mah zong a Pasian hihna hi zel hi. Chrsitians te-in Pasian khat bek ih upna monutism ah Muslim te ii upna monutism tawh kilamdang hi. Muslim te in Pasian khat bek hi ci ziau hi. Bang tawh kibang hiam cih leh suang tum pen suangtum bek lian hi-in tui kihel lo hi. Tua ahih manin tua suangtum pen khat bek hi cih bangdaan upna pen Muslim te’n Pasian khat bek a upzia uh ahi hi. Ei Christian te leuleu in Pasian khat bek ih cih ciangin khat bek hi na pi-in thum kigawm hi. There is three person in the Godhead cih thu ih um hi. Ahi zongin Pa pen Tapa hi lo-in, Tapa pen Pa zong hi lo-a tua mah bangin Kha Siangtho pen Pa zong hi lo, Tapa zong hi lo hi. Ahi zongin Tapa pe Pasian hi-a, Pa zong Pasian hi-a, Kha Siangtho zong Pasian ahi hi. The Father is not the Son, the Son is not the Holy Spirit and the Holy Spirit is neither the Father nor the Son. But the Father is God, the Son is God and the Holy Spirit is God cih bang daan ahi hi. Ih pumpi naa te le ih kim ih paam aa piansak naa te tawh ih et kaak ciangin zong thumgawm Pasian ahihna a gimnam na dik thei kha ding hi. A hi zongin tua te pen gentehh theihna hi bek aa thumgawm Pasian ii a lamdan zia a thuk a zaai zia ih tel siang zo kei hi. LST in thumgawm Pasian (trinity) cih kammal a gen lian loh hangin LST mun tampi takah Pasian thumgawm ahihna kilang mahmah hi. Matthew 28:19na bangah the name of the Father and of the Son and of the Holy Spirit na ci ngiatngiat hi. LST pen Pasian kammal ahi hi. Pasian in lai a gelh ciangin a kisuut suut a kiphelh phelh bang daanin lai gelh ngei lo-in ahihna bangin a gelh suk lel, ahihna bangin kisuut kiphelh se lo, Kawlte pau leh kisianpiah se kul lo-in ahihna bangin thu a gen suk Pa hi lel ahih mah bangin thumgawm Pasian hing cih kul se lo-in Pa Tapa Kha Siangtho Pasian ahihna tawh nasem Pa ahihna kilang takin LST sungah kimu suk lel hi. Tua hih manin Christian upna thumgawm Pasian pen tui kihel lo suangtum bang aa a nungta lo ahi lo Pasian ahi hi. Hi thumgawm Pasian ahi Pa Ta le Kha Siangtho sungah Ta pen a kilaitaat ahih mah bangin hih Tapa Pasian Jesuh in Pasian’ pianzia nei napi-in Pasian tawh a kizakim theihna dingin thathanghat thu a suang kei hi. A mah kiniam khiat tawm zaw a, nasem lim a hong puazaw hi. Mihing bangin a mah hong kibawl aa mihing tektek mah a hong sun hi, na ci hi. Ih theih dingah Tapa Pasian ahihna pen a tawntung pek aa a om khin ahi hi. Mihing aa hong pian hun hong suah hun bel om hi. There is time for incarnation but sonship is eternal in the Godhead. Hi thumgawm Pasian sungah ki-itna kizawpna pen a kicing takin na om khin aa, Pasian pen piansakna te a bawlma in a lungleng het lo kisapna a nei het lo Pasian na hi khin gige hi. There is mutual love and mutual relationship between the Godhead even before the foundation of the world was. Tua hi aa Pasian in nang le kei ong bawl ong pian sak zenzen pen a lamdang ahi hi. Pasian in eite hong piansakna thu bel khat om aa tua thu in ama minthangna ding (for his glory alone) cih thu ahi hi. Tua ahih man a Late lai-at pa in Topa aw na ngaihsut tham dingin mihing in bang ahi hiam na ci hi. Zomi Zola sate in zong Topa kei lel tak nong it dingin bang ka hi hiam ana cih ngeeungeeuna hi thu hang ahi hi.

Tu-in hih thumgawm Pasian sung panin Tapa Pasian pen a Pasian hihna kisuah khia liangin mihingin ong pianna thu khat om hi. Tua pen mihing in Pasian minthangna dingin nungta siam lo bek hi lo-in Pasian lehdo ahih manin tua mawhna hangin sihna leitungah hong piang hi. The wages of sin is death. Hih sihna pan’n hinkikna nuntaak tawntungna Pasian tawh kilem kikna ih ngah theihna dingin Pasian hehpihna hangin Tapa Pasian ahi Jesuh pen mihing bangin Bethlehem bawng annekna kuang sungah ong suak hi.

Hi Tapa Jesuh pen mi nam khempeuh in amau biakna ngeina tek pan a na lamet uh Messiah pen na hi gige a hih manin leitung mi khempeuh in Jesuh a kisam ih hi hi.

Jesuh ii tumdanna (Jesus the God-Man)

Lai Siangtho sungah the Son of Man a cihteh Jesuh pen mihing ahi Joseph ii tapa hi a cihnopna hi lo hi. Mihing tapa the Son of Man a cih tehh Thumgawm Pasian ahihna a pulaak hi pah aa, tua thumgawm Pasian sungah Tapa pen mihing in hong suak hong piang hi cih a gen nuam ahi hi. Pa Pasian (God the Father) ahi a, Kha Siangtho Pasian (God the Holy Spirit) ahi zongin mihing in ong suak ong piang lo hi. The Godhead Pasian’ lutang sung pan Tapa hihna dinmun tawh mihing bangin ong kibawl Pasian ahi (God the Son) pen Jesuh ahih manin tua Jesuh pen theologians te in LST siksan in the God-Man na ci uh hi. Tua pen LST in g the Son of Man a cih pen ahi hi. Tu-in Jesuh pen Pasian lah hi-in Mihing lah hi tawntung hi. Pasian pen nidangin mihing ahih ngei loh hun om hi. Ahi zongin Pasian pen Pa Ta Kha hi tawntung hi. Ta cih kammal pen mihing cihna hi pah nai lo hi.

Tua leh minam khempeuh in Jesuh ih kisam hiam?

Mi khem peuh Jesuh kisam. Everybody/ every sinner need Jesus. Mihing tektek banghang Jesuh kisam sese ih hiam? Why need Jesus? Why not Mahamad? Why not Gautama? Banghang in Muhamad te Gautama te tungtawn hi lo sese in Jesuh tungtawn hi sese cih Christian te’n ih thei hiam? Banghang hiam cih leh amah pen Khrih ahih hang ahi hi. Minam khempeuh in a biakan uh le a ngeina uh ah honpa Tanpa gumpa khat na lamen den uh hi. Jews mite in a lemet uh pen Messiah na ci uh hi. Buddhist te in a lamet uh pen Kawlkam in gen rehang (naughsungh a pwint) na ci uh hi. Banbang hi leh a deihna pen Messiah kici minam khempeuh in hi leitung nat le sat zawn le ngau, gal le sa panin honpa khat ong pai ding hi cih a biakna sung tek vuah upna a nei lo om lo hi.

Tua honpa tanpa gumpa ong pai khin hiam?

Ong pai khin hi. Tua ong pai khin Pa pen Mangkam in Christ kici hi. Tua Christ pen mihing in ong piang Jesuh pen na hi a, Gautama te Muhamad te Mormon te pen Khrih/Christ/ Messiah taktak na hi lo uh hi. Amau te pen pian sak te hi-a, Jesuh Khrih ahih leh piansakna te a piangsak pa ahih banah ama lim le mel sun aa a piansak mihing te tawh a kikholh khawm theihna ding le a mawhna uh maisak theihna dingin mihing’ lim aa hong kibawl Pasian ahih manin amah pen leitung mite zonzon ngakngakk pen ahi hi. Jews te in lamen en lai uh a, Buddhist te in zong ngak lai uh hi. Ei Christians te in ih hih leh ih um khin ih sang khin ih tel khin hi. Tua ahih manin hih ih up ih theih ih saan ih nuntaak pih Khrih lungdamna thu ih taang ko ding, hih Jesuh suah lungdamna thu ih gen ding ih taavuan ahi hi. Minam khempeuh ii lamet Messiah ong suak khin hi cih taangko in. Hi a hong tung khin Jesuh kumpi gam pen a sisan tawh Calvary mual tungah ki phut khin hi. Hong tung khin in ahi zongin a kicing zaw in hong tung laiding hi. Tua a kicing zaw pen Second Coming Topa Jesuh ong pai kik ciang ding ahi hi. A kicing zaw ih ngah theihna dingin hong tungkhin thu ih muh ih up ih saan ih ngah ding kisam masa hi. A kicing zaw hun pen beina hun (comsummation) tawh kingah bek ding hi. Christians te le leitung mi khempeuh in beina hun a ngak khawm ih hih hangin Christian te in ngahkhitna thu tawh beina a ngak te ih hihna pen ih tumdaanna ahi hi. Ei Christian te in hih kumpi gam pen Jesuh Khrih sungah upna tawh a ngah khin te ih hi hi. Tua upna pen Jesuh ong tatkhiatna sisan sungah kingah thei bek hi. Tua hih manin minam khempeuh in Jesuh sisan tektek a kisapna tua hang ahi hi. John 14: 6na ah “Keimah in Lampi ka hi a, Thuman, le Nuntaakna zong ka hi hi. Kei hong suang lo-in (kei sisan taakna lo-in) Pa kiangah kuamah tung thei lo ding hi” na ci lian hi.

LST hi ta leh ih pu ih pa te hun lai hi ta leh ih et takteh sinsan taakna tawh mawh maisakna kipia bek ahi hi. Ahi zongin tua sisan taakna te a tawn tung in ki mang thei lo-in Jesuh sisan taakna bek kikal sese hiam? Banghang in nang le kei sissan sangin Jesuh sisan thupi zaw se hiam? Ih ngeina sung aa sinsan taakna te banghangin a tawntung aa kimang thei lo sese hiam? A tawntung aa kimang thei lo cih tehh, gentehna, mi tanu khat tawh na mawh hangin lawi giat liauna in a tawntung in kimang thei lo-in tawmvei sung mawhna maisak bek hi. Leitung vaan nuai tawh kisai tawntung thu tawh kisai mawhmaisak na hi nai lo hi. Tua bang mawhmaisakna pen na kha a tankhia zo mawhmaisakna hi lo hi. Dawi le kau lau man aa sisan taakna in Jesuh ong tatkhiatna thu tawh kisai peuh mah lo kizom peuh mah lo hi.

Jesuh sisan, Jesuh’ ong tatkhiatna le Jesuh sungah cih bek sese kul ding hiam? A ci mi tampi te lak ah kei aadingin Jesuh Khrih lo tawh nuntaak tawntungna kingah thei lo hi mah na cih teltal na pen teltuam mi tatkhiat mi na hih khit gige na ahi hi. Tua bang a ci tentan thei dingin Pasian in khamangthang tampi ong beh lap sak ta hen.

Tua ih gen thu te ih Lai Siangtho simna mun ah pai kik rehang pasian’ kammal in kitel takin gen pah hi. Banghang hiam cih leh amah Jesuh, Jesuh ka cihtehh leitung vannuai theih Jesuh pen hi. Isreal gam le Philippines gam khawng aa Jesuh mi nei kuama theih loh te a gen ka hi kei hi. Tua ei gen pen mi khempeuh ih a theih Jesuh Khrih pen ah hi. Buddhist makaai te Muslim makaai te bangin nang sangin thei zaw lai uh hi. Tulai internet online communication hat semsem ahih manin Jesuh a thei kha lo te aa ding cih sangin Jesuh a um nuam lo, a um ngam lo te aa dingin thungetna ci lecin thumaan zaw kha ding hi.

Tua ih gen Jesuh pen Khrih ahi hi. Judah mite in a na lamet uh Messiah pen hi. Buddhist te in a na lamet uh “naugtsungh a pwint” a cih pen ahi hi. Tu laitak Sen gamah Dalailama kici Phungyi minthang khat in kei “naugh sungh apwint” hi ing ci na pi in amau mahmah in um lo uh hi. Judah te in Messiah pen tu dong lamen lai uh hi. Pasian hehpihna tawh ei Christian te in Messiah ih nei khin ih sang khin ih um khin hi. Uplohna ih cih pen tu zawh kum za khit tehh Jesuh ong pai ding hi kici henla kum za khit tehh ong pai takpi lian mah lezong um lo toto ding hi lel hi.

Tua ei gen Jesuh pen leitung biakna maikai khempeuh in a na theih uh Jesuh Khrih a hi hi. A mah pen minam khempeuh ii lamet Messiah pen na hi khin gige hi. Ahi zongin amau te in Jesuh thei napi in um lo uh hi. Tua ahih manin ei Pasian hehpihna tawh a um khin te in hih lungdam na thu, a hong tung khin Pasian kumpi gam thu Isaiah 9: 6na aa a gen ong suak naungeek thu pen lungdamna le lawp mahmahna tawh ih taangko ding ahi hi.

For to us a child is born, to us a son is given; and the government shall be upon his shoulder, and his name shall be called Wonderful Counselor, Mighty God, Everlasting Father, Prince of peace.

Tu ni in thu ummite in Jesuh Khrih bek ih cihna LST in Jesuh Khrih sisan bek hi. Tatkhiatna ih cih pen Pasian ong hehpihna sungah upna bek tawh (Justification by Grace through Faith Alone) bek hi ih cih ngamna pen bang hang hiam cih leh Jesuh Khrih pen Pasian Tapa ana hihna hang ahihi. Adangdang te pen piansak mi kihi in, Jesuh ahih leh a piangsak pa, piansakna kumpi pa Khrih Jesuh ahih hang ahi hi. Tua hih manin Jesuh Khrin pen ih nuntaakna ah masak ding hi hang. Amah pen eite aading in refugee nuntaakna tawh Bethlehem buang annekna kuang sungah ong suak hi ta ngial hi. Jesuh kiniam khiatzia en in Christian te midang te aa dingin etteh taak le thupha ih hih ding Pasian in deih hi. Matthew 6: 33na ah Pasian gam le a dikna na zong masa un a cih mah bangin Jesuh Khrih ih nuntaakna ah laitaatin masak in, mai zumpih ding hi hang. Jesuh tawh tawn khawm peuh rehang buk no khat zong nopna daihna kilemna nuntaakna hong hi lel ding hi. Amah gam le dikna zong masa peuh rehang ih kisap na dangdang te zong hong kipia thuah sawnsawn lai ding hi.

Hauh nop man dau pai nop man pil nop man aa, Pasian gam le dikna zong lo ding hi hangh. Pasian gam le dikna zong masa rehang kihau thei ih maa kihon thei-in kidau pai thei hi cih sungsuak ngaihsutna (motivation) pen maan lo hi. Pasian gam le a dikna a Jesuh mahmah a thupha sangin masak ngiat, ih kisap pen mah ahih pahna a theithei le a nuntaak pih thei dingin Topa’ Kha siangtho in eite ong lawng ciat ta hen.

Application

Ih LST mun in hong gen thu in hi bang bang ahi hi.

Khatna ah

Khrih pen mihing in ong pian ma-in Pasian na hi gige hi. Prior to the incarnation, Christ was in the form of God. Jonh 1: 1; 17: 5, 24na ah Tapa Jesuh pen Bethlehem ah ong suah ma-in kipatna nei lo tawpna nei lo-in a tawntung in Pa Pasian tawh a na om khin Khrih ahi hi. Pasian pianzia nei cih tehh, Pasian taktak ii hihna qualities khempeuh nei in amah pen Pasian mahmah ahih pahna Pasian tawh kipum khatin a kizakim thumgawm Pasian ahihna a gen ahi hi. Nang le kei in Pasian pianzia ih neih zia, Pasian lim le mel sun aa hong kibawl zia tawh kibang lo-in Jesuh in Pasian pianzia nei (he was in the form of God) cih tehh amah pen Pasian mahmah ahih pahna a gen nuam ahi hi. Ih theih dingah Buddha Gautama bangin kei Pasian hing ci ngei lo hi (Fallow my teachings don’t follow me) na ci hi. Kong gen bangin sem inla, kei sep bangin sem kei in a ci ahi hi. Do as I say don’t as I do cih daan ahi hi. Ahi zongin Jesuh Khrih in Matthew 11: 28na ah “Na semin vangik pua-in a gim mite khempeuh aw, ka kiangah hong pai ta un. Note tungah lungsim tawldamna ka hong pia ding hi. Keima hakkol zangin kisuan unla, kei kiangah hong kisin dih un. Kei pen kiniamkhiatin neem hithiat ka hih manin ka kiangah na tawl uh a dam ding hi. Banghang hiam cih leh note kong suat ding ka hakkol nuam a, na puak ding uh van zong a zang mah ahi hi, ci-in a gen hi. Pa Pasian pen a tawntungin Pasian hi-a Kha Siangtho Pasian pen a tawntung in Pasian mah ahih mah bangin Tapa zong a tawntungin Pasian mah hi pah hi. Hih universe a piangsak a control pa pen piansak nuntaakna nei khempeuh in a muh theih a tel theihna dingun Khrih pen Pasian ii ahi thei tawp pen aa ong kilaakna a pianzia (form) ahi hi (Heb 1: 3). Bektham lo-in Khrih Jesuh pen a kimu thei lo Pasian ii minthanna a kimuhkhiat theihna ahi hi (Col. 1: 15). Khrih in Pasian tawh a kizakim theihna dingin a hanciam zong a kul hi lo hi. Tua sangsikin Pasian tawh a kizakim ahi kim lai amah kiniam khiat tawm zaw hi. Ama aading bek a ngaihsun lo Jesuh Khrih in midang te nasem ahih ding lungsim puak (a mind-set of service) nei hi. Ama angsung ding bek ngaihsun lo hi (Romans 15: 3). Ama aading sangin midang te’ aading thupi ngaihsut zawin naa sem hi (Phil 2: 3,4).

Tuamah bangin eite in zong huaihamna lungsim le kisialh nopna lungsim tawh bangmah gamta kei ni. Kiniam khiat ciat in, midangte thupi ngaihsut zaw ni. Romans 12: 3na ah “Note tawh kituakzah valin kilian ngaihsutzaw kha kei un” na ci hi.

Nihna ah

Amah ong kiniamkhiat tawmzaw (made himself nothing) cih tehh a Pasian hihna pen Jesuh mihing ong pian ciangin taan lawh hi cih bang hi lo hi. Paul in a genna ah Khrih amah le amah kihawm suah (self-emptying) cihtehh Khrih pen Pasian sang a neuzaw suakin a Pasian hihna mansuah hi ci-in na gen lo hi.

A genna ah hi vantung leinuai (the whole universe) a uk bek hi lo-in a mah tawh a kipiangsak tua Tapa Jesuh pen Pasian’ innkuan (the Godhead) sungah nuam a sa mahmah kim lai mihing te a mawhna uh pan tankhia dingin a Pasian hihna nangawn pan ong ding khia-in Singlamteh tungah sih ding nangawn ong tel suk hi ci-in Paul in a gen nahi zaw hi. 2 Corinthians 8: 9na ah “Banghang hiam cih leh ih Topa Jesuh zong hau mahmah napi-in ama zawn’na tawh note mihau na suah theihna dingun note tangin mizawngin ong kibawl ahih manin ih Topa Jesuh Khrih ong itna bangzah takin lian hiam, cih thu na thei uh hi” na ci hi. Khatvei Mangkang te mihau papi khat pen a niangtui dawn zelna saipa in “Sya aw banghangin nang hitakah niangtui sai tawm man pen te dawn dingin a mun niam pen munah ong pai den-a na tapa pen hua lai-a, niangtui sai tam mat mahmah na mun ah pai tawntung ahi hiam a cih leh, tua papi pa in “Amah a pa hau-in kei ka pa zawng hi” cih san hi. Cihnopna ah eite ih hauhna pen a zawnloh mikhat na om-a tua pen Jesuh Khrih ahi hi. Amah pen zawng nek ngau in thal puk a cih bang lian hi a, a ma thuakna in eite damna ahi hi. Jesuh Khrih eite hangin mizawng suak hi (emptying) cih takteh a Pasian hihna nei nawn lo cihna hi lo-in Pasian pen mihing in ong piang hi cihnopna hi zaw hi. A Pasian hih kawmin mihing zong piang thei cihna hi. A taktakin ci rehang Pasian takpi mihing ong pian keenkeen a kul laizang lo kim lai, eite siathuai na hang aa ih thuakna ding mawhna thaman sihna pan’n nuntaak tawntungna ih ngah kik theihna dingin mihing in ong pian keenkeenna pen amah le amah kihawmsakna (emptying) cihna hi zaw hi. Mihing aa ong pian keenkeenna pen a maa aadingin hawmna na hi hi. Ahih hangin tua bang hawmna (emptiness) in a Pasian hihna mansuah hi, taan hi cihna hi zenzen lo hi.

Ih Topa Jesuh pen midang te aa dingin na sem dingin ong pai hi zaw hi. Matthew 20: 28na ah mihing Tapa zong nasem dingin ong pai hi lo-in, midangte aa ding na semin, mi tampi tatna ding a si dingin a hong pai ahih mah bangin note zong a tua ci ding na hi uh hi na ci hi.

Eimau’ innkuan baangkua khua le tui gam le lei aa dingin naa ih sep tehh sal (servants) sawltaak nasemte bangin (mi’ sila bangin) kibulh aa nasem thei te ih hih ding le, midangte innkuan baangkua khua le tui gam le lei aa dingin naa ih sep sak tehh eimau naa a sem bangin kibulh aa naa ih sep theih ding pen ih Topa Jesuh Khrih ii a hong lah nasep zia ahi hi. A tom in gen rehang eimau naa ih sep tehh mi gam mi’ lei ah sila bang aa naa ih sep bang aa kisila bawl aa ih sep theih ding pen ih Topa Jesuh ii nuntaakna pan kimu thei hi. Tua ciangh a lang khat leuleu ah mite naa ih sep sak tehh eimau naa a sem bang aa ih sep sak theih ding itna le hoihna tawh midangte tungah naa ih sep theih ding pen ih Topa Jesuh Khrih ii nuntaakna pan kimu thei hi. Daupai-in ih khantoh nop leh eimau naa ih sep tehh mi’ sila nasem bang aa sem ding. Mi’ na ih sep tehh eimau naa a sem bang aa sepsak ding.

Thumna-ah

Jesuh Khrih pen Pasian kimlai mihingin hong suak a, mihingin a suak bek hi lo-in sawltaak (servant) sal hihna dinmun la-in a kisia a kihhuai leitung mite lakah nasem dingin hong piang khia hi zen hi. Tua bang aa sal (servant) cih ciang bek hi lo lai-in Pasian thukham khempeuh a thuakna le a nuntaakna tawh paubaang het lo-in thumaan takin a zuih zawhna panin singlamteh tung nangawn ah a sih dong ciangin ong kiniam khiat suk lai sawnsawn hi. Hi zah dong aa thuakna ii thuakna, thuakna te tungah thuakna ahi Singlamteh tung nangawn pan ka Pasian ka Pasian aw banghangin kei ong taisan na hi hiam cih zah dongin Pasian nangawn in a et ngam loh ih mawhna hang aa eite’ thuak ding gimna Jesuh bekin na thuak ahi manin tua thuakna le sisan taakna pen eite Pasian mai-ah ih kilawmna (propitiation) , gal hihna pan tate cihna zaa ih ngah hilhialna thu ahi hi. Hi zahta aa Pasian ong itna pen itna te tungah itna ahi hi. Tua bang itna maan ih neih theihna dingin Jesuh Khrih itna eite tungah hong ki letsong ding kisam masa hi hang (1 John 4: 8-11). Hi Jesuh Khrih ong itna thu hangin Pasian in a lianpenin amah koih a, min lian dang khempeuh sangin a min lianzaw-in a koih hi. Tua ahih manin vantung, leitung, leinuai-a om mi khempeuh in Jesuh pahtawi-in khukdin’ ding uh a, Jesuh in Khrih, Topa ahi hi, ci-in taang ko-in Pa Pasian a min thangsak ding uh hi na ci hi.

Tua ahih manin a thakin hih ih Topa Jesuh Khrih lungsim puakzia en-in, ih lungsim puakzia (motivation) maan lo pawl khat kikhel ding hi hang. Khatna ah ka tu ka ta te a pil a siam ciang bekin USA ah sam ning cih lungsim panin a pil lopi a siam lopi mah sam ning. Pantah ning cih lungsim pua ding hi hangh. Zomi te buaih kipiakna ah Mangpau te niam theih lua lai, maizum huai-lua lai-in ka pau tha dah ci lo zawin a siam lo lak mah ah ka pau ciang etteh tak ka hihna le kei aa dingin zong a angtan huai zaw a hihi cih lungsim puak zia nei ding hi hang. Kawlgam hun hong hoih leh kiciah henla Lai Siangtho Saang kihong leh cih lung sim puak zia panin hun hoih loh laitak mah aa kipat ding hi zaw hi cih lungsim puak zia nei zaw ding hi hang. Banghang hiam cih leh Kawlgam hun hoih khit tehh nang kisam nawn lo hi tehh. Hun hoih loh laitak bekin kisam tehh cih na thei in. Mangpau Kawlpau a siam mahmahsa te lakah nang kisam nawn lo zaw hi tehh. A siam lote lakah na Mangpau na Kawlpau kong kisam uh hi. Na tu na ta a hai a mawl teng mah USA ah samin la pantah in. A pil a siam khin hi uh leh nang sap le pattah kisam nawn lo hi. Ih Topa Jesuh mahmah in zong bang na ci hiam cih leh “kei cidam te le midik te aa dingin a hong pai ka hi kei hi. Ci dam lo te le mimawh te aa ding bekin a hong pai ka hi zaw hi” ci hi.

Hi bangin migina lo, mi dam lo, mi zawng khalte le a kipam paih te tankhia dingin a hong tung ding Jesuh suah lungdamna phawkna (the greatest happy birthday) in eite tawh khatvei a thakin ong kip suak manin ih lungsim puakzia, ih sunglam thupuakzia ahi (motivation) maan a nei thei dingin Topa Kha Siangtho in a thakin ong huh ta hen la, Jesuh pen tanpa bekin nei lo-in Topa in ih neihna tawh ih nuntaakna ah amah a ki-uksak ngiat minam Zomi te ahi dingin thumgawm Pasian Kha Siangtho ong siansuah gupkhiatna in tu le a tawntungin a thakin kip paisuak ta hen. Amen!

Tg Suang Dal
Tawmvei KL

JESU IN A KHANGNO LAI HONG PIA HI

(Lamka Khristian Tuailai Pawl Khoppi, Sept 4-7, 1986 Bungmual Khua-a tawp nitak sermon)

.
Lk 3:23 “Heli’ tapa Josef, Josef’ tapa Jesu in kum sawm thum a phak ciangin nasep a kipan hi”

Topa Jesu in mi honpi lakah nasep a hong pat dingin kum sawmthum hi. Tua in bang hong phawksak hiam cih leh, Jesuh in a khangno thahat lai hun nasep na’ngin zang hi cihna hi. Kum thum sungin a sep dingteng sem khinin, a gen dingteng zong gen khin hi. Cinate damsakin mi bang lote hehpihna tawh a lawng hi. A papi zawh leh a teek zawh, a vuai zawh cianga hong si pan phing cih bang hi lo hi. Ama pumpi thakiam zawh, a ha peuh a tok khin zo, a sam kang khin a, pulh gawp zo cih bang cianga singlamteh tungah hong si hi lo hi. Tangval thahat laitak, a thadim laitak mahin mihingte’ mawh sawp siang nadingin a nuntakna hong pia hi. Singlamteh tungah a kikhai laiin Topa Jesu pen a thahat lai, a khangmoi lai hi kei leh, tua zah gimna do zo loin si pah ding hi. Lai Siangtho siamte’n a gen ciangun Jesuh a hat laitak hi kei leh a singlamteh pua zo lo ding hi ci uh hi.

Getsemani huanah a mat khit ciangun Siampi liante kiangah paipihin zanhahpih uh hi. A zingsang khuavak tungin Herod kiang paipih uh a, Herod in nalamdang bawl ding bekin na kimawlpih sawm hi. Herod in bawlsiain puansan silhsak a, Pilat kiangah sawl hi. Pilat in a galkapte tawh Gabbatha munah bawlsiain sat uh a, ling lukhu khusak hi. Pilat in singlamteh a piakna mun panin a kikhaina mun dong sawm leh li vei kipuk hi, na ci uh hi. Bang zah vei kipuk hiam cih Lai Siangtho in a gen loh hangin gimna khempeuh a kipiak zawh ciangin a kikhai nading Singlamteh pua-a pai zo lai i cih ciangin a thahat lai hi ngel hi. Topa’n a khangno hun hoih laitak nang adingin hong pia hi.

Tu nitakin khangnote tungaa thugen i hih mah bangin khangnote’n i theih dinga kilawm, i zuih ding Lai Siangtho sungah mi tampi om hi. David bang a neu laia kipanin a pa tuucing ahi hi. A tuucin na munah tumging tawh la sa theiin, tua munte mahah la tampi a puak hi. Kumpi hong suah zawh ciangin a phuah, galtai laia a phuah cih bangin la tampi om hi. I phawk diak dinga i deih in bang hiam cih leh leh a tangval lai a kipanin Pasian tawh a kikhawl mi a hih thu hi. Tua mah bangin Josef kici zong a tangval laitak mahin a theih ngei loh gam Izipt gam na tung a, tua munah zong a kizang thei mahmah mi khatin na om hi. Daniel leh a lawmte tua bang mahin a khangno laiun zat theihin na om uh hi. Moses zong Izipt gam pilna khempeuh a sin zawh ciangin a tha neih khempeuh tawh Pasian mite makaiin na pang hi. Tua mah bangin Thuciam Thak sungah Timoti, Titu leh mi khangno tampi zat theih tampi na om uh hi. Tua hi a, tuni-in nang leh kei zong i hat laitak mahin i kipiak ding, ka thahat lai tak mahin bang ci leng Topa gam nasepnaah ka kizang thei ding hiam cih thu i ngaihsut ding thupi hi. Tua bang lungsim tawh pua kawmin tunitakin thu i ngaih ding i deih hi. Mission thu tua zah i gen khit zawh ciangin tuin i tha neihteng tawh bang sep sawm i hi hiam?

Tu nitakin khangnote in I theih ding kisam pha diak thu thum gen lehang ka ci hi. Khatna ah, Tu laitak na khangno hun pen mah na hoih penpen hun ahi hi. Na pumpi a hoih pen hun, na ngaihsutna a kicin pen hun tu laitak hi. Mite’n zong hong et nop hun, hong ngaih hun, pawlpi in hong deih hun, kumpite in hong deih hun, thupi hong kisak hun uh tuhun mah ahi hi. Tu zawh kum bang zah hiam ciangin kuamahpi in hong kinbawl nawn khol lo ding hi. Topa in zong hih hun tektek mah, na hoih penpen hun mahin hong deih hi. Satan in zong tua hun sung mah hong deih diak ding a, hong lim zat sawm mahmah ding hi. Tua a hih manin tua i khangno hun, i thahat laitak, I ngaihsutna zong a kicin laitak, tua hun nang zong a zang lai na hih manin a hampha na hi hi. Tua zaha hun manpha sungah na om laitak a hih manin tu hun pen na zat siam leh na mailam zong hong tang ding a, na zat khialh peuhmah leh mailam hun zong mial mahmah ding hi. Lawm leh gual leh mite tawh nop taka i kikholh theih hun zong tu hun bek mah hi. Sep leh bawl sep zawh na’ng tha leh ngal a hat hun, mualtung kah nuam leteh kah zawh hun, zanhak nuam lecin na hah zawh hun laitak pen tu hun bek mah hi. Ni dang ciangin tua bangte na hih zo nawn kei ding hi. Tua ahih manin tu ka thahat laitakin bang ci kizat ding ka hi hiam ci-a kingaihsut kisam hi. Pawlkhatte in a thahat laitakun nu leh pate dah nadingin peuhin na kizang kha uh hi. A sia lam sep ding a manlah mahmah bang phial uh hi. I gamtat a hoih kei leh kum nih, kum thum zawh ciangin second hand puan zuak tawh i kibang ding hi. Na hoihpen laitak, na manphatpen laitak tu hun zangkhial kei in. Na kizat khial leh zong hiam pha diak a, a hoih lam na sep leh zong na bun pha diak ding hi. Na pha zong tam semkhia zoin, a sia zong tam na sem kha diak ding hi. Mission 1986 i cih laitakin hih nang bang ci zat ding na sawm giugiau hiam?

Khangno lai, tangval lai cih ciangin laikhak bang hong tung ziahziah a, a khutlam a hoih phat khol loh hangin I lungkim mahmah lel hi. Ip sungah guang suk ziau, damdama lupna tungah tam veipi mah sim phapha. Lukham nuaiah koih suk, ihmut bang noptuam mahmah. Eima tum taka lungkim lua hi mai. Tua hun pen a manpha lua hi. Communist-te bang ci-in kipantah uh hiam i cih leh, “Khangmoi ahih laiun thuzawh un” kici uh hi. Red Communist hong khankhiat lain zong khang note na zang uh hi. Amau in bang ci uh hiam cih leh, “Khangnote sung ah vangliatna (power) om hi,” na ci uh hi. Gamvaihawmna a kilaih nadingin khangnote’ thahatna kizang a, galdo nadingin khangnote tha kizang hi. Tua ahih manin Pasian Gam in zong nang hong deih a, Mission nasepna in zong nang hong deih hi. Tu laitak hun pen Pasian in nang hong lim zat theih hun hi a, hong zat theih phat diak hun zong a hi hi cih I theih ding hi. Mikangte’n, “Kei kum sawm leh guk ka hi hi, acih ciangin “I am sweet sixteen” na ci se uh hi. Pak bang hi lecin na pak saan laitak, na gim namtui laitak, khuai in na zu hong bop nop laitak hun hi. Tua bang lian laitak mah Pasian nasep na’ngin zong na kilawm laitak, na hoih laitak mah ahi hi.

Tunai diakin Shillong a Pasian thugen mi khat in pulpit len kawmin hih bangin hong gen hi. “Kum sawm leh khat ka phak panin ka suakkik hi. Ka khangno hun sung khempeuh zong Topa gam adingin ka hih theih bangbangin ka kizang hi. Tuin ka tek ta hi. Ka thahat lai hun khempeuh Topa tungah ap khin ka hih manin tu’n kisuanlah nading ka nei kei hi,” ci hi. Tua bang mite in hat ni, zawm ni a neih hangun Topa adingin a kizang mi ahih manun lungkim uh hi. Nang na khangno lai hun kua adingin na zat sawm hiam? Ama sisan tawh hong tanpa adingin na kiphal ding hiam? Pammaih na kisa hiam? Tangval khat in a pa kiangah, “Pa, Pasian gam adingin kipiak ding pen hoih ka sa hi, ahi zongin tawmkhat hamzaw laiin tha tual zek leng hoih ka sa hi,” a ci hi. Ni khat ni-in a pa in sumbuk panin hai minsa hong puak hi. Tua hai min pen a khut tawh a mekmek leh a sunga teng tuisuak khin hi. Tuate a tawp khiat zawh ciangin puaksak kik leuleuin refrigerator sungah a koih hi. A tapa kiangah a pa in, “Hai min na duh hiam?” a cih leh, “Duh mah ing,” ci hi. “Refrigerator sungah om hi, na duh leh ne in,” a ci hi. Tua hai a nek sawm ciangin a sung hawmpi na hi a, a pa kiangah, “Bang ci na hai min cih a tang bek om hi lo maw?,” a cih leh a pa’n zong, “Nang zong na thahat laiteng Satan piak sawmin, a hoih loteng Jesuh piak sawm hi lo na maw?” na cih san hi. Hai min ne kha lo tangvalpa a lungkim loh mah bangin nang zong Pasian adingin kizang kei leteh na lungkim ding hiam?

Ka pilnate, ka siamnate, ka thahat lai hunte Satan adingin zang ning in, ka siatgawp zawh ciangin Pasian adingin kizang ning a ci pawl na hih zezen leh, na Topa lungkim ngel dingin na um hiam? Thugen minthang Spurgeon in , “Pasian adingin a tee (a na man nawn lo) pia kei in,” ci ngiat hi. Tua bang a khumteng tawpkhiat khitnasa, a kizang thei nawn lo a teeteng Topa gama dingin piak a sawm i hi hiam? Cik ciangin Topa tungah ki-ap sawm na hi hiam? Nupi na hih zawh,papi na hih zawh ciang peuha a ki-ap sawm pan na hi hiam? Nungak tangval laia kipia nuam lo, ki-ap ngam lote pen ta leh nau neih zawh ciangin zong na kipiak nop tuan ding upmawhhuai taktak lo hi. Tua hun ciangin na ki-ap phingsan a hi zongin Topa aa dingin na manphatna tam nawn peuhmah lo ding hi. Na manphat pen hun laia a ki-ap nuam lo nupi leh papi pen Pasian in zong santaak hong sa lai ding hiam? Pasian pen zuau tawh khem theih ding hi lo hi. Mi zattaak leh Pasian gam adinga minthangte nuntakna i et ciangin a khangno lai mahmah vivein na minthang zo uh hi. Khangno tam semsem, innkuan sung buai semsem ci lehang, cik ciangin tuate mission adingin paikhia peuhmah ding i hi hiam? “Topa leh a gam ading” cih la i saksak niloh pen cik ciangin taksuaksak ding i hi hiam?

A nihna ah, tua zah taka manpha na hih ciangin tuhun a thu khentatna na neih pen hong thupi diak hi. Tu huna na thu khentatna in mailam na nuntak sung na khom ding thu a hi hi. Tu nitaka “hi hen” na cih pen na khan tawntunga na kisik ding thu hi thei hi. Tu nitak maha “hi lo ding” na cih pen zong na khang khom ding thu mah suak thei hi. Ngaihsutna a hat mahmah khangno khat in thu khat peuhpeuh khentatna i neih pen thu neu lo hi. Nupi pai hih zawh cianga thu khentat khawng pen tua zah takin thupi zo nawn lo hi. Khangno i hih laia deih taka thu khentatna i neih pen manpha hi. Khangno tampi in tua bangin thu khentat khial kha a hih manun a khantawnun mai bing uh hi. 1978 kumin North East India, Evangelical Union Training Camp Aizawlah a kizat lain kei zong ka kihel thei hi. Numei khat in a testimony hih bang a gen hi. Amah pen a beisa hun laiin a cidam, a kizang thei mahmah nungak khat ahi hi. Ahi zongin ni khat thu khentatna a neih pen khial kha a hih manin tua-a kipan gimna a tuah thu hong gen hi. Tua in bang thu hiam cih leh, tangval khat in ngai a, tua tangvalpa in Lai Siangtho tawi kawmin hawh zel a hih ciangin Pasian thu a hahkat dingin ngaihsun hi. Tuapa pen sum nei khat zong na hi lai a hih manin a dot ciangin “Hi hen” na ci kha hi. A kiten nitak mahun a lawmpa in, “Lai Siangtho in ‘Numei lutang pen pasal hi’ ci a hih ciangin kei thuthu nong man kul ding hi. Nitak ciangin lawmte tawh zu dawn nuam ka hih ciangin zu va lei in ci-in hong sawl hi. Tua nitak pen ka gentheih kipatna hong suak pah lian hi,” a ci hi. Tua nu in a thu khentatna puahphat theih kik hi leh ut lua hi. Nungak kik thei hi leh bang zahin ut ding hiam! Na thu khentatna in na nuntak sungteng bek hi loin tawnung hell sung tun leh tawntung nopna vantung tun ding dong tawh kisai thei hi. Tua hi a, pai ding maw pai lo ding, gen ding maw gen lo ding cih thute lungngai detdeta thu i khen ding kisam hi. Pasian in a hong hehpih mana tu-a a nungak lai, a tangval lai zong na hi kha ding hi. Pasian in hong hehpih mana tu ni-a lapawlah hong ding a, ama hehpihna lampi zuia tu ni-a hih kikhopnaah hong kihel zong na hi ding hi. Nang sanga a ithuaizaw, eiteng sanga zong a thumangzaw hi napi a si khin mi tampi om ding hi. Tu ni-a hih bang hehpihna lian a hong piakna pen a man thu khenna na neih ding a hong deihsakna hang hi ding hi.

Athumna leh a nunungpen inah, hih bang khangno hun hoih, hun pha i neih laitak mahin i tup i sawmna ciangciang tun pah ding hi. Na thahat laitak mahin nek leh tak zong in. Sum leh pai, pilna siamna, tua bang vai khempeuh sep ding bawl ding na cih khempeuh sem pah in. Hih bang hun hoih na ngah laitak mahin na sawmna ciangciang tun sawm pah in. A kisam pha mahmah i kidot lai ding khat pen ngim leh sawm na nei hiam? Ngim leh tup nei mel lopi-a sang kahkah pong i hi hiam? Pilna zongte in zong B.A., M.A. cih vive hi loin pilna nam tuamtuam, a hiang tuamah i kah ding kisam hi. Sangkah pilna zongte in tun sawmna kung i neih ding kisam hi. Sang lah kah ngei lo, scholarship san ding ni cianga lah gual masapenah kigual zo bilbel, sang kah ni sunsun zong tutna gual masa lamah tu nuam lo a, siate muh loh na’ng tutphah gual nunung lam khawngah tu citciat i cihte in bang pilna zong taktak i kici hi ding hiam? Tua bang i hih manin lai pilna dikri a ngah tampite pen sepna piak taak lo tampi mah i om khin hi. Nasema zat theih loh dikri ngahsa (unemployable graduates) tampi om om khin zo hi. Tuni-in eite in tua bang bek mah tawh lungkim maw? Khuak hoih mahmah, lungtang hoih mahmah tawh tua bang ciang bek mah tum ding maw? Mite in, Pasian tungah, “Topa aw, na manpha tampi ka sep zawh nadingin ka khangno lai hun hong sauveisak in. Ka khangno lai ni hong zang siamsak in,” ci-in thu ngen uh hi. Eite in zong tua bangin thu i ngen ngam ding hiam cih kingaihsun ni.

Topa gam adingin tup leh sawm i nei hiam? I zi ding, i pasal ding bekbek mah a lunghimawh den pawl i hih khak leh gamla kitung zo lo ding hi. Pasian in i kituahpih ding hong hawisak lua mahmah ding hi. Lungkham luat masak ding hi lo hi. A masa ding na masasak lehang a zom dingin hong zui lel ding hi. Papi hih ngam sawm na hih leh tu-a ciang bek mah sawm ding maw? Mi inn sungah mo dinga lut ngam a sawm, mi tanu zi dinga la-a papi suah sawm taktak na hih leh tu-a na phatan ciang bek mah maw na lungkim sawm? Mailam nuntakna tawh kisai kalsuan ding na hih leh tua thu Topa tungah na ap nai hiam? Ka khangno lai hun, ka hat lai hun hih bangin zang nuam ing, hong huh in ci-in Topa na ko nai hiam? Tangval khat in, “Topa aw, na nasemte genthei lua ahih manin kumpi nasepna gina khat hong pia in, amaute ka huh nuam hi,” ci-in thu ka ngen hi ci-in hong gen ngei hi. Pawlkhatte leuleu in, “Topa aw, nangmah kong muanna tawh tua na ka sep sawm hi,” ci-in thu ngen uh hi. Tua banga Topa mah ko a, Topa mah donga thu ngen kawma a kalsuan mite mah Topa in zong thupha pia a hi ve. Tup leh ngim bangmah a nei se lote pen i khantoh loh mah ding hi. Tup leh ngim kician nei a, khauh taka kalsuante mah in ma hong telh hi. I gam sung, Lamka gam sungah sep ding, bawl ding hih zah taka tam a om laiin eite in tu ni donga sep ding, bawl ding ngim mel nei lopi maha om lailai ding i hi hiam?

I maiah kongkhak tampi a kihon laiin, Pasian gam nasep nadingah lam tampi hong kihon laiin hih ciang bek mahah khawl sawm na hi hiam? Tu nitak i thu gen hun sung mahmahin thu khentatna nei dingin kong ngen khol hi. Tu tunitaka lapawlah hong dingte pen tu zawh kum sawm main mo-a lut ding, mi tanu zia-a pi ding na hi khin uh hi. Tu zawh kum sawm sunga zi leh pasal nei lote pen “akul” kicite na hi pelmawh ding uh hi. A beisa hunah na nuntakna a zang khial kha khat na hi zongin tu nitak mahmahin Topa tungah ki-ap lecin ziakai lua nai lo hi. A beisa mawk bei kumte tawh mailam hun zong zang to lai ding ci na hi hiam, a hih kei leh na nuntakna hun a om laiteng manpha taka a hong zangsak thei Topa tungah pia lo ding na hiam? Topa Jesuh in a khangno hun hoih laitak hong pia hi. Missionaryte in amau hun manphapenpen hong pia uh hi. Eite in zong bang hangin pia ngam lo tuan ding i hi hiam?

Jim Elliot leh a lawmte in Lai Siangtho sang ah a kah lai-un “Topa aw, pilna siamna hong pia in, tua pilna siamna na gam adingin ka zang ding uh hi,” ci-in thu ngen uh hi. Lai Siangtho sang pan a tuah ciangun Aucus kici minamte kiangah Pasian sapna ngahin pai uh a, tua minamte in that uh hi. Kawlgam sunga missionary hong pai masapenpen Adoniram Judson in Lai Siangtho sang a kah laiin sakol an dinga kikhol buhtu lakah a lawmte tawh thu ngen hi. Tua panin a vekun mission pai dingin khentat uh a, a nuntakna uh zang khin uh hi. Tua banga college kah lai maha thungena ki-ap khangnote hangin Pasian in Kawlgam leh gamdang tampi nuntakna tangthu na kilamdangsak hi. Tu nitakin khangnote aw, tu-a na tutna mun pen Judson leh a lawmte tutna buhtu mah bangin Topa Pasian in hong zat sak thei hi. Tu ni-in Topa tungah ka khangno hun sau vei lo ding ahih manin ka nuntakna a hoih pen, a limcit pen hun kong pia nuam hi ci lo ding na hi uh hiam? Tu laitaka Zomi Baptist Convention ah numei laiat a sem Siamah Man Khan Niang in hong laikhak sung ah hih bangin ci hi, “Mi dangte a missionarite un inn hoih pipi, van hoih pipi na nusiat uh a, ahi zongin Zogam sung missionarite in amau luguh hawm hong nusiat uh hi,” ci hi. A hialna ah, “Lawm Pau aw, missionarite in amau luguh hong nusiat uh ahih manin Zomite’n Pasian na i sep dingzia pen luguh piak mah ding hi kha ding hi,” hong ci ngei hi.

Tua hong thu gen tawh kituakin Chin For Christ in One Century mission field ah 1985 kumin Tg Cin Khaw Thawn, Tungtuang khua mi April 17, 1985 ni-in Paletwa ah si hi. Tg Bual Cung, Thantlang khua mi October 30, 1985 ni-in Matupi gamah si a, Tg Vung Khan Kham, Tedim Khua mi January 20, 1986 ni-in Kanpatlet ah si hi. Amaute in a tangval hoih pen hun uh amau Honpa adingin na pia uh hi. Eite in nambat 4 zatui adingin pia ding maw, zu zuakte adingin piak sawm? A hong it mahmah i pianna, i suahna nu leh pa lungkham nadingin i khangno lai hun zang ding i hi hiam? I Zomipih khangno pawlkhat in Jesuh adingin a lutang uh na pia khin uh ahih leh eite in bang tungah i lungtang i pia ding hiam? Hih tawh kisaiin bang thu khentatna na nei hiam?

Galkaap hangsan Napoleon Bonaparte kici pen lau ngei lo hi ci-in kigen hi. Thakhatin kiphawng vat leh bang a ci peuhmah ding hiam cih theih nadingin galkap mangte tawh niangtui a dawn laitakin ama theih loh kalin mepi khat a lot vat uh leh, a theih kholsa galkap mangte in a niang uh buak suah khin a, tawm beek a kiging khol lo Nepoleon in tang loin a niangtui mah dawn hithiat lel hi kici hi. Thuciapteh mite in Napoleon a kah ni peuhpeuh pen midangte zong a kah uh phamawh ding hi ci uh hi. Bang thu tawh kisaiin Napoleon na kap ngei hiam i cih leh, a galkapte tawh Russia sim dingin kuan hi. Phalbi khuadamsan laitak tawh kituak citciat a hih manin kileh kik ding lungngai uh hi. A kik nading uh lampi-a lei khat Russiate’n na susia zo uh hi. Napoleon in,”Lei kisia khin ahih manin lei khuama zat ding galkap muanhuai hong kipia ding na om uh hiam?” a cih ciangin a deih zah val kipia uh hi. Tuate liangko tungah leizawl khung uh a, tua tungah sikpek phah uh a, tua tung tawnin galkap khempeuh lui gal kai uh hi kici hi. Tua tak ciangin Napoleon in, “Mi khempeuh galkai zo hi, ka galkap hangsante aw, hong paikhia ta un,” a ci hi. Ahih hangin galkapte khat beek pau lo, tang loin om uh hi. Napoleon in, “Kigalkai khin zo hi, galhangte aw, hong pai khia un,” a ci kik hi. Kuamah pau lo ham loin dai dide lai hi. Tua ciangin amah in zong bang hanga pau lo, taang lo-a hi ci om uh hi mawk hiam ci-in tui sunga ding gega a masapenpa a khut tawh a va lawn uh leh, vuk tui sungah ding ahih manun, a sisan uh na khal khin zo-in na si khin uh hi. Tua zaha a kipumpiakna uh a muh ciangin Napoleon kap hi ci-in kiciamteh hi. Tu ni-in Pasian nasepnaah zong tua banga a kipia ngam mi kisam hi. Pasian gam adingin khuama pang ding, Jesuh adingin galkap hangsan na hi ding hiam? Jesuh in nang tektek hong deih a, nang tektek hong sam hi. Ama khangno lai nuntakna a hong pia Jesuh adingin nang zong na nuntakna na pia ding hiam? Pasian adingin a hoih pen na piak kei leh nang zong Ama tung panin a hoihpen, amanphapen na ngah kei ding hi. Ahi zongin ahoih pen a piate tungah Topa in a zah tampiin thuh kik ding hong kamciam hi. Topa in nang hong sam hi, na dawng ding hiam? Topa in Ama thu i gente thupha hong piaksak ta hen. Amen.

]]> http://vaphual.net/jesu-in-a-khangno-lai-hong-pia-hi/feed/ 0 http://vaphual.net/gupkhiatna-tawh-kisai-thu-thum/ http://vaphual.net/gupkhiatna-tawh-kisai-thu-thum/#comments Sat, 31 Oct 2009 05:38:10 +0000 Carey Suante http://vaphual.net/2/biakna-2/gupkhiatna-tawh-kisai-thu-thum/

by Min Lian Naula, Delhi

Johan in a gen Lungdamna thu sungah bang na ci gen hiam en pak leng-(Johan-3:3)

I Suahkik khit teh I teelsiam(choose)ding lampi nih om a,Tua in Siatna leh Hoihna ahi hi.Suahkik na kici atel pha lo zong na om thei a,suakkik I cih ciangin,Nu sung a lut kik a suakkik/piangkik hi zaw lo in,”Jesu” gumpa leh honpa a na saan khit a,Gupkhiatna na ngah khit teh a suakkik bek na kici thei pan hi,Kha sungah suakkik icih kik leu leu ciang in gupkhiatna ngah khin na pi, “Pasian” I thukham te i zuih kim zawh loh teh a nungtolh ki hi pah hi,Satan zong tua ding in pan na hah lak mah mah a,“Pasian” tawh iki gamlat a ipial khiat khak ciang bang a na nuam lua dep hi,Tua ahih man in i suahkik khit teh i theih ding khat in, Ze-etna in hong tuam pah a tua Ze-etna thuak zo ding leh a tuak ding in mansa a i om kul hi,hih Ze-etna i zawh zawh na ding in,Laisiangtho sim,nisim in thungen leng kha lam ah ki khang to to a satan zong acih nang theilo ahihman in ong ngak zo lo in,ong paikhiat san ta ding hi.tua in i gualzawh na ahi hi.

Suahkik na ah,na kitel peuh leh huaihamna/gensiatna/een-nate leh siatna khempeuh ahih kei leh Vantung ah a om Pa “Pasian” deih loh lam nagen,nasem kei pah ding hi.

Suahkikna na ngahtheih na ding in,amah tawh na sih khop a,na thawh kik ki phamawh hi,Tua ding in na tot ding lampi/tavuan/mawhpuakna lian mah mah a,a tungah tam lo I gen tak mah bang leh hibang om lai hi:-

Singlamteh puakna,Sihna pan nuntakna hibang teng khempeuh I zawh zawh ciang, I “Topa’n I ngah ding Thaman hong bawlsak a tua in Nuntak tawntung na thaman ahi hi.

Singlamteh puakna

Matthai gen Lungdamna thu sung sim ni (Matthai-16:24)

Singlamteh puak, na kisin kul a,tua singlamteh pua ding in mansa in na om na hiam/ka om na hiam/I om na hiam limtak kingaihsut kul hi,Singlamteh puak zong na baih lo hi.Bang hang hiam icih leh “Topa” tawh na ton khop khit teh na zuih ding leh zuih loh ding bang na om pah hi,sep ding leh seploh ding zong na om leu leu hi, tua bang “Topa” thukham zui zo ding a mansa ana om ma singlamtah puak ding na kisin sin hang bang mah tan tung lo ding hiteh, hih ka gennop na in mi(Singtum,suangtum a bia te)mit muhna ah Juda iskariot banga I “Topa” a zuak ihih khak ding lau huai kasa mah mah hi,bek tham lo in,a pua tham a “Pasian” a bia te ihih khak ding kisit huai ka sa mah mah hi. Eite pen I kikhop sung bek “Pasian” thu-um in Biak-inn sung pan a I pusuah ciang ahih kei leh I kikhop tawp ciang,i ut I deih bang a gamtang,thu kigen teng I zak sung bek thei a zuih ding ki haanciam lo hi in ka mu thei mawk hi lungkham huai lua sa ing… Ei tapidaw(Kristian)te om ding dan leh zia hilo hi.

A et ton huai mahmah khat in amaute’n bawltawm “Pasian” a biak zen zen hang un limtak leh siangtho tak in ana bia zo uh ahih man un,a upna uh tawh lawhcinna na ngah takpi uhi,hithu ka gen zen zen hangin amau biak bang va bia ni ka cih na hi pah sam lo hi,Singtum,Suangtum a bia te lel tak in hibang nopna leh hauhna a neih theih uh leh Bang hang in ei “Pasian” hing a bia te in zong ngah thei lo ding? I upna uh aneu luat man zong na hi kha thei hi.

Hibang nuntakna I na zat khak zen zen leh zong,Kikhel nai lo hi tu in zong I “Topa”’n nang leh kei hong na ngak a,Kata te bang cik ciang in hong ki hei zo tam uh aci ci na hi zaw hi,eite’n thu don lo ki hi zaw hi,Siatna nam kim I sem, I bawl kha phial ta zongin I “Topa”’n lamet na tawh hong na ngak veve hi.“Topa” hoih hi(Halleluiah).

Tulai I leitung thuthang te leh nuntak zia te ki lamdang hiai hiai ta hi,Hunsim/naisim/nisim/kaalsim/Khasim/kumsim in alamdang nate muh theih leh zak theih in omta a,I Laisiangtho sungah bang na ci gen hiam icih leh “Ka hun a nai ciang” cih na om hi,a ki gelh mah bang in hong tangtung hiai hiai ta hi.

Tua ahihman in Tu’in zong,Leitung nopsakna leh hauhna te tel zaw ding maw,I “Topa”?

Laisiangtho sungah bang na gen hiam icih ciang Luka-9:24.Sung en pak ni,Sanggam ,U leh nau,Nu leh pa ei te’n zaw Leitung na te sang in,thudang dang khempeuh sang in “Jesu” Kumpi I “Topa” Gumpa leh Honpa a I saan ding hoih zaw hi,a hun lai in delh pah ni,zuan pahni…………

“Den ciang ci se ken zekai ni teh”kum bang zah hiam pai ta a Liani Parte in ana sak aphuak zong kua ma dang hilo in Ka pianna ka pa phuah na hi se se hi Lungdam huai kasa mah mah hi ka ki nei sak mah mah zaw mah lai hi,hih la bek tham lo in,I thugen siam te Sia,Kamhau,Sia Khup te gen na tung tawn a kipat in zong na ki bawl hoih sawm leng tu in mi tam zaw,kha thu a buai buai ngai nawn lo kha ding a,mansa a I “Topa” tuak ding a, om hun hi ta hi napi in, eite pen za za na pi,I bil lang khat a pu suak kik a hi diam ah ahi kei leh zong a zui ut lo, ihih khak ding lau huai kasa hi,a zak bek a hun sa lo in, a sak bek siam hi zaw lo in,I zuih zawh kipha mawh hi.

Den ciang ci nawn se se kei ni zekai takpi kha ding hi hang,upate’n vai nunung guah sia lap acih bang uh ki hi kha thei hi,Zekai luat man in Vantung pan in Pengkul hong ging man kha ding hi,Tua hun ciang lawm aw nang koi ah na om zen tam maw,kiging man nawn lo ding hi teh ahun lai in kibawl pha ni.hi bang teng a tuak ngam ding leh a puak Singlamteh a pua ngam ding in “Topa”’n nang leh kei hong teel hi.

Kei ka hoih in ka zui zo ka cih na hi zaw lo in,ka lungsim sung ah vei mah mah na khat ka neih banah ka na patauh na khat ahihman in bek tham lo in “Topa” hong piak hi ding in um ing.

Nang na suahkik zen zen hang in na innkuanpih te om lai hi, na nasep ding omlai hi tawl ngak mai mai hun hi nawn lo hi. Suun khua vaak a omlai in sem meng meng ni, Zan khua hong mial pah ta ding hi. Tu-hun pen eite a dingin hehpihna hun a kihon laitak na hi kha thei ding hi…Kong a kikhak ma in, a lutkim thei ding in nang leh kei mansa in I om na hiam?

Sihna pan nuntakna

Lungdamna thu sungah en leu leu ni Rom khuamite tung ah Sawltak.Paul I laikhak (Rom-6:4&5)

I “Topa” tawh Singlamteh na puak khop khit nungsang,a vangliat na in hong tuam ta ahihman,nuam na leh Lungnop na bek tham lo in a Khasiangtho in hong tuam ta ahih manin,asia a pha khen tel theihna hong guan zo ahihman in ah,kitot,kisel,thusia,lasia te khempeuh a pha kisuah ta ding ahih manin,Satan in a et na ding mun awng om nawn lo ahih manin hong bye bye ngai ta hi.

I “Topa”’n eite ading in Singlamteh hong pua a,Singlamteh tung mah a eite a ding in sihna hong thuak zo hi,ahi zong in amah thokik hi,tua asih na leh a thohkik na na up nak a,amah na gumpa na honpa a na saan nak peuh leh…Na si zong in na thokik ding hi.Bek tham loin amah tawh na tho khia khawm ding a nuntak tawntung na na ngah thuah lai ding hi.

I Thugen siam leh la phuah siamte’n bang na ci hiam icih leh ““Topa” tawh ton khawm leng nuam e” ana ci uhi ahih tak pi mah na hihi.

Ei “Topa” a I om a, “Topa” ei ah hong om ciangin a nuamlo khat beek omlo ding a,Nopna vive leh tha nopna in kipum dim ta ding hi,Eite’n tua thu telsiam lo in ei nopsak na pen atung a I gente na bang lo deuh in Pianthakna ngah na pi. mi gensiat,thuman loh leh “Pasian” min phat phat toh kithuah cih bang ahih kei leh zuau bang gen gen cih khong i lak a a om khak ding lau huai mah mah hi.ki-en cian ni,“Pasian” mit muh na ah kilawm lo bek tham lo in kihuai a,tua in vangam hong tun lo ding hi,Ka cih nop na in,Pianthak na ai’h kei leh Gupkhiatna ngah na pi hi bang na hoih lo te I ciin laiteng peuh mah na din mun na ki et tel kul kha ding hi,A lim cing cing khong ihih khak ding lau huai ka sa mah mah hi.

Tulai Satan, zong na pil lua leu leu ahih manin a nasep dan ki thei zo nawn lo hi,Piangthak nai lopi piangthak kisak na lungsim hong pia thei ci’n ka Pa in ong na genpih zel ka thei hi,hibang om takpi kha ding in ka ngaih sun hi,A pualam bek a hoih,mite mitmuh na bek ah “Pasian” a um mah mah bang napi in asung lam tua bang na hi het lo,Mibang tua nu,tuapa tua ci hi, ci in gen gen keei,eima nuntak na ikitel masak kul hi,Den ciang zawng in a ma taw kheng thei lo in ngau taw a ko sak bang ihih khak leh bel direct “Hell” khuk sung na tawntung inn ding himai.

Tua ahihman in,I suahkik na ding in hibang a tung a i gen bang tam lo hi a.kei sang atel zaw leh athei zaw zong om kha mah ni ahi zong in ki-vel pha kik ni.

A tawpna ding in,hiteng khempeuh I zawhzawh ciangin,Thaman khat in hong ngak lai hi tua in Nuntak tawntung na thaman ahi hi.

Laisiangtho Lungdamna thu sungah en leu leu ni Rom khuamite tung ah Sawltak.Paul I laikhak (Rom-6:23) tua ah bang gen hiam?

Nuntak tawntung na thaman hong pia ding hi,tua teng banah hong piak thuah lai ding khat in “Khut tawh bawl loh kham innpi” hong tun ding hi.tua mun ah sihna,lu-suuna leh haksatna leh adang dang leitung a ina tuah/thuaksa khempeuh tua mun ah om nawnlo ding a,Lungdam in sisan phatna la sa in,atatsa misiang honpi te tawh khawl ngeilo in “Tunno” gualzawh na lapi kisa denta ding hi.nak nop tuak maw …ahizong in cih khat om hi tua in Sanggam,U leh nau,Nu leh pa aw nang zong tua mun ah na kihel kha tam maw.

Tulai in a kua kua hita leh ka muh dan taang pi’in pawl khat Nu leh Pa ahih kei leh Innkuanpihte’n Pasian thu ong gen pih ciang bang un, Ki-ngaigsak utlo hi leh kilawm khat in om mawk hi in ka thei hi ,bang hang hiam icih leh,hibang ngaihsut na khat hong pia hi,Eite’n thugen siam te bek ki ci hi kha thei ding hi.Hi hun ahi Satan pan lak ki pat pilvang ni,

I Missionary,Evangelist leh Thugen siam tuam tuamte hong pai gige thei lo ding ahih man un,Khawmpi cih te leh ‘Camp’ cih bang na deih hun hun in hong om pak thei gige loh hun hong tung ding hi,Hong hilh thei ding na neih lai in ki bawl phat sawm ni Sanggam U leh Nau, Nu leh Pate tu hun hi kha ding hi,hehpih na hun a ki hon lai in zuan thei ciat leng ut huai ka sa hi,Na Innkuanpihte a ding in zong pan la in nang tavuan ahi hi,hi thu na zak nak leh……

Awle! Hih bang teng ikikup theih “Pasian” hong letsong hi a, kei ngaihsutna tawh a gen ding hileng bangmah baan lo ding a,zong hong ding lo ding hing.

Lungdam ing,I “Topa” “Pasian” in gen khelh,sakkhelh,khengval mawh mai na hong pia hen la I genkhak,I lohkhak mal khat leh nih aom sun sun te Topa’n eite tungah hibang Singlamteh pua khawm ding, Suahkikna a ngah ding leh tawntung nuntakna a ngah ding in thupha khat tek hong pia ta hen

Pianthakna/Gupkhiatna ah na kitel leh telloh na ki theih na ding in Rom khuamite tung ah Sawltak.Paul I laikhak (Rom 12:9-21) sung na en leu leu in, hih a nuai abang na zui zo takpi diam?