Sia Do Kham Denmark Ah Zin

Khazih Sung a Sanggam te:

Rev Dr Chin Do Kham ( Sia Do Kham ) 23-30/ 4/ 09 sungteng Denmark a hongzin in, tutung a tawh a nih vei na DK a om Zomi te kiang a hongzin na a hihi, hongpai masak pen, September 2008 kum sung hi in, England. Germany.Denmark gam te a om Zomi Innkuan te tawh holimkhawm ding a hongzin kawikawi a hihi.

Tutung a Denmark hongzin kik na pen, Esbjerg Khuapi sung a om,Danish Pentecostal Pawlpi te in Gospel a ahsap hi-in hih khuapi sung leh a kimteng a Kawlgam mi,mi 500 ki om ki om hi,tuasung a Tapidaw thu um mi, mi 300 kim ka na om uh a,pawlpi thu ka om uh hi,Pentecostal Pawlpi thusiam na leh deihsak na tawh, Sia pa in Sat,25/ 4/ 09 ni,10.00 am pan 4.30 pm ciang nikhatbup ZCF. CEC. CLC Pawlpi thum ki gawmkhawm in Laisiang tho thusin na hong neihpih in,dotna dawnna cih bangkinei in thakingah nuamkisa lua in ni khatsung hunhong beiziau lel hi.

Sia pa hun ngahsung nitak 6.00pm pan 11.30pm ciang ZIDK te tawh an kuang umkhop na leh holim khopna zong ka naneithei uh a, Sia Pipa in hanthot na tampi a hong neihkhit ciang in, dotna leh dawn na te zong ka neithei uh hi,holim nuamsan laitak mah in zan nai 11.30 bang hong cingtopaakzel a hih man in, ut nai lo pipi in tua nitak ka na kikhen phot uh hi.

A zingciang Sun,26/ 4/ 09 ni Danish Pentecostal Church a,10.00am pan 12.30pm ciang,hunzang kik in Khasiangtho in Sia pa ompih a hihman in Danish ten zong Sia pa thugen na thangah mahmah uh a,mailam a hun na ngahciang in Denmark a Gospel hongpai zel in ci-in vaikhak uh hi.

Sun, 26/ 4/ 09. 2.00pm pan 4.30pm ciangmah ZCF. CEC. CLC pawlpi thummah ki gawmkhawm in Pentecostal Church mah a biakpiak na ki neikik in,tua hunsung a Sia Pipa mah in, hanthot na hong neitheikik a tha kingah mahmah in,khitui naptui tawh lungdam sa in innlam a zuan mitampi ki om hi. A nitak lam 6.00pm pan 11.00pm ciang ZIDK te tawh holim khawm na ka nanei theikik uh a,Sia Pipa in USA a om ih Zomi pihte pilna sinna sumzon paizon na cih te akipan kumpi in, USA a om gamdang mi te akep ahuh na panpih na cihbang te leh, Kawlgam a vaciah lai a ihmi pih te tawh a ki muh na holimkhawm na cih te,tulai tak ei Zomi te nuntak kalsuandan a kipan, theihuai phawkhuai thu tampi tak honggen hi.

ZIDK lampan in zong Denmark kumpi in,Zomi te bangci hong huh,hongpanpih ci te Sia pa tung a ka nagen uh hi, DK kumpi in gamdangmite a honghuh hongkep na in, nasepnei, neilo, semzo, semzolo,ih hihhang in anneek tuidawnding leh om na ding inn, lungkham om lo in kumpi in hong huh hong en in,damloh na khatpeuh ih nei a lehzong,nat na thupi thupilo,Zato pai na sumbei na om lo,a beithemepeuh kumpi hongpiak sak hi,nasep sumthalawh na lam a,USA lambang in sum tampipi lawh zawh ding hamsa hi,a hizong in anneektui dawn om na inn cihbangte khangtawn in kumpi in honghuh zongding hi,pilnazong pilna sinnuam ta ding in, Ph.D lakciang dong sumbei na om lo hi,sangkah sungteng khasum ki ngah lai cih te a ki pan ka gen uh a, Sia Pipa in hi maw hong ci hi, zanlam nai 11.00 hongcing to zel a hih man in,zingciang Sangkahdingtawh na semdingtawh ki om a hih man in,holimnuam kim laipi mah ka na ki khen kikzel uh hi.

28/ 4/ 09.ni-in Sia Pipa in Danish Pentecostal Bibble College Sang naupang te kiang a zong nikhat bupsungmah lai hialh na va neithei hi, a hunngah sunsun in zong. Danish te biak na lam makai siapi te zongtawh ki mu khawm holimkhawm na nei thei uh hi.Tutung a Sia Do Kham DK ah Gospel hongpan na pen, Danish te bek hi lo in,DK sung a om Kawlgam mi thempeuh in zong khathu,tak sa thu, te a ki lamthak na tampitak na nei ka hih man un,ka lungdam na te uh Khazih sung aa sanggam a kua mah peuh tung a hongtang ko sawn ka hi uh hi..

Sia Pipa pen tu-ni 30/ 4/ 09 ni-in DK pan USA ciah ding in, London lamtawn in ciah ta a azi ata te kiang cidam in a na tunciang dong Pasian in na makaih hen la, mailam a zong Khazih sung leh,ih minam sung a Pasian in sia pa thupha hong piak sak tawn tung ta hen.

Khen Za Muan Thang
ZCF Chairman
Denmark