Portland Khualzinna (April 10-16, 2010) by Dr JM Ngul Khan Pau

PORTLAND KHUALZINNA

(April 10-16, 2010)

J.M. Ngul Khan Pau

Alaska Airline Flight 2508 tawh April 10 zing nai 7:00 in Portland khuapi lam zuanin ka leng khia uh hi. Tutung ka zi Lucy Engjadim leh ka tapa uh Toshi Thang Lian Mang tawh ka zin khop theih manun ka kithalawp mahmah hi. Nai 2 sung a len zawh ciangin vuk in kum khua-a a khuh Mt. Hood hong kidawk velval hi. Washington state sunga om Mount St. Helen leh a kiim a paam vuk mah tawh na pak zihziah hi. Tua laitakin August 19, 1993 kum a kei kia Western Seminary a Doctor of Missiology sin dinga Portland ka tun lai ka phawk kik hi. Lungdam koh thungetna nei kawmin, “Topa aw, hih khuapi tam veipi nong zinsak zo hi. Ahi zongin tutung Toshi Mang leh ka zi tawh nong tunpih kik manin lungdam thu kong puak hi. Hih khuapi ka tun masak lai-in hih bang hamphatna ka ngah kik ding ka lamen ngei kei hi. Ka nuntakna a na bawl khempeuh hangin ka lungdam hi,” ka ci hi. Vanleng tual ka tun ciangun Pastor Zam King Mang ka phone leh amah leh Zomi pasal thum in hong dawn uh hi. Vanleng tual panin kiho kawmkawmin Sia King Mangte inn lam zuanin ka tai vingveng uh hi. Siapa zi Lunkhek in zing ann lim mahmah tawh hong na vaidawn hi.

Tua nitakin Pa Gin Sian Lalte in Pasian tungah lungdam kohna annkuang bawlin Zomi a inn uh dim phitphetin ka pai khawm uh hi. Tua lai-ah nitak ann limtakin ka nek zawh ciangun thugenna hun ken ka zang a, Zokam thei lo pawl khat om ahih manin Sia King Mang in kawlpau tawh kam phen hi. Lungdam kohna tawh kisai gen ding tampi a om hangin, ka lungsimah Luka 15:8-10 sung siksanin thugen ding hong om ahih manin hih bangin ka gen hi.

Topa Jesu in, “Numei khat in sum peek sawm a neih sung panin khat man’suah leh bangcih ding ahi hiam? Meivak vakin, a innsung teng phiatin, a muh matengin mun khempeuh limtakin zong ding hi. A muh ciangin a lawmte leh a vengte samin amaute kiangah, ‘Ka sum man’suahsa mukik ka hih manin ka nuam mahmah hi. Lungdamna pawi bawl ni,’ ci ding hi. Tua mah bangin mawhnei mi khat a kisikkikna hangin Pasian’ vantung mite lungdam mahmah uh hi,” a ci hi.

Hih sum mangsak thugentehna panin i phawk masak dingin tua sum innsungah mang hi. Sum mang leh tate innsung panin mangsak I hih lam phawkna dingin thugenna-ah point khenkhat ka gente hih a nuaia bang hi. Bang hangin sum mangsak hi ding hiam? (i) A kep hoih loh man hi. Inn sungah kep dinga Pasian in go manpha hong piak i tate hi. I neihsa na dangte lim kep mahmahin i tate i mansuah khak ding patauh huai hi. (ii) Man suah theih ahih lam phawk lo hi. Mi tampite’n tate khalam leh gamtatna lamah mang thei ahih lam phawk vet lo uh hi. Mang ahih lam a theih uh ciangin zekai lua khin zo hi. (iii) Man suah ahih lam zong thei pah lo hi ding hi. Innsung panin kha lamah mang i neih hangin a man lam uh phawk vet lo i hih leh tua inn sung mial mahmah cihna hi.

Bangci a cih leh a sum mang mu kik hiam? (i) Meivak vak hi. Hih numei nu inn sung khuamial mahmah hi ding hi. Sum mang a zawn ding ciangin meivak vaak hi. Eite’n zong i ta mangte i muh kik theihna dingin i innsungah meivak i vak ding kisam hi. (ii) Mun phiah tawh phiat hi. Sum mang muh kikna dingin inn sung phiat siang hi. Tua inn zong nin cihna hi. Bang in innsung ninsak hiam? Nin a tam luat ciangin innsungah manna om hi. (iii) A muh mateng limtakin zong hi. Leitungah i muh mateng thungetna tawh i tate i zon ding ahi hi. Pasian thu khuavak tawh zon ding hi. Pasian thu hangin kisiangthosak nuntakna tawh zon’ ding hi. A tamzaw Nupi naunen nei vive ahih manun tua nitak hun hawm thawh mahmahin ka zo uh hi.

April 11, Nipi Ni in nitak lam nai 4:00-6:00 dong Burmese Christian Fellowshipah ka kikhawm uh hi. Portland a Kawlgam pan hong paite adingin kikhopna ding a kilem penpen hih lai hih pah hi. Sia King Mangte innkuan in a kikhawm ding mite mawtaw tawh bang zah vei hiam hong nawn uh hi. Pastor nasepna nei ciatciat dingin siapate innkuan kipia zo leh pahtaakhuai ka sa mahmah hi. Bang hang hiam cih leh Pawlpi mite amau nupa in telephone tawh hopihin biakinn dong hong tun theihna dingun amau mawtaw zangh uh hi. Tuucing hoih in a tuute kaikhawmin tua zawh ciangin ann a piak tawh kibang kasa hi. Biakna leh Phatna Tg. Hau Mung leh a lawmte’n hong makaih ziahziah uh hi. Kei adingin thugenna hun ka ngah nih veina ahi hi.

“Jesu amaute laizangah” (John 20:19-23) sung siksanin thugenna hun ka zang hi. Jesu eite laizangah hong om ciangin thu lian mahmah 4 piang ding hi: (i) Jesu eite laizangah hong om leh nopna (khamuanna) om ding hi (Aneu 19). Nopna kumpipa (Isaiah 9:6) ahih manin Ama omna peuhpeuhah lungnopna tawldamna om hi (Isaiah 26:3, Late 46:10, Phil 4:6-7) (ii) Jesu eite laizangah hong om leh lungdamna om ding hi (Aneu 20). A nungzuite in ama liamna mate a muh ciangun lungdam uh hi. Bang hangin Jesu bek in lungdamna hong pia thei hiam cih leh, (a) Amah bek in a beisa hun a i mawhna hong maisak thei hi (Matt 9:2). A beisa hun a i mawhnate eite’n bang mah i lawh theih loh laitakin Topa Jesu in maisak, siangsak thei hi. Tua hangin Ama tung panin lungdamna kingah hi. (b) Tuhun mahmahin zong hong om khawmpihna hangin lungdamna kinei hi (Matt 14:27). Huihpi hat mahmahin nungzuite a nuai gawp laitakin Jesu amau kiangah va pai a, “Lau kei un, kei ka hi hi” ci-in huihpi daisak hi. Tulaitak na thuak huihpi sungah na Gumpa in hong ompih lam tel leteh lungdamna na nei ding hi. (c) Mailam gualzawhna hong ciamna hangin lungdamna (John 16:33). Hih leitung leh haksatnate in a zawh loh Topa i nei hi. Amah bek in leitung a zozo hi. Tua zawhna a koppihte’n lungdamna, lungnopna nei uh hi. (iii) Jesu eite laizangah hong om leh a manpha mite i hi ding uh hi (Aneu 22). Ama khut leh khete i hi ding uh hi. Jesu min tawh kalsuanin a sem khia mite i hi ding uh hi. Topa in nang leh kei zangin Ama gam hong khangsak ding hi. Jesu adingin taangmi i hi uh hi. (iv) Jesu eite laizangah hong om leh vangliatna i nei ding uh hi (Aneu 22-23). Jesu in, “A nungzuite lutungah a hu sang hi” kici hi. Pasian hu tawh mihingte hong kipiangsak hi (Piancil 2:7). Pasian husan’na tawh hih leitung nate khempeuh kipiangsak hi (Late 33:6). Kamsangpa Ezekiel in guh hawmpi lakah dingin Pasian huih a sap ciangin tua guh keute galkap honpi hong suak hi (Eze 37:9-10). Pasian Kha Siangtho hangin vangliatna nei uh hi (Sawl. 1:8, 2:1-4). Thugen zawhna dingah Topa tungah ki-ap nuamte sapna kibawl a, mi tampi mahmah dingin Topa tungah kipiakna nei uh hi.

Kikhop tawp ciangin Indian Restaurant Namaste kici-ah mi 36 ann ne dingin ka paikhawm ngeeingaai uh hi. Zomi nungak tangval a kipan nupi papite in tawl khat sung thudotna hun annek zawh ciangin hong nei uh hi. America gama Zomi khangnote in zi leh pasal ding tawh kisai dotna hong dong hamtang uh hi. Amau zong hi thei hi leh Zomi mah koppih dingin deih uh a, ahi zongin kimuhna om lopi-in kingaih theih loh ahih manin US gambup Zomi khangnote kimuh khopna bang om leh hoih dingin ka ngaihsun hi. Portland Zomite in hih bangin koh innkuan minin ann hong nekpih uh ciangin hong beisan khin Sia Lalneihthang in, “Zomi i hih nuam ei maw” a cih ka lungsimah hong ging kik hi. Hih bangin khat leh khat i kipahtawi ciangin Zomite khantoh gim nam kasa hi.

Sia King Mang nu S.B.Niang Go Cing pen kum 81 pha zo hi. Pasian thu sunga Kha Siangtho lawnna leh thapiakna tangmi ahih manin amah tawh kamkumna ka neih ciangun ka khawl thei pahpah kei uh hi. Pasian min tawh a khualzinna a kipan teci pannate hong gen ciangin ko a ngai khia mite zong tha hong pia mahmah hi. Tutungin amah zong Asian Reporter of Portlandte’n “Most Honorable Elder Citizen of 2010” dingin na teel uh a, tu Friday April 23 ni-in pahtawina laipi a ngah ding ahi hi. Amah Zomi nupi thusiam ahih bangin nisimin annek ding vaimim leh be huansa nei denin, bawngsa kankeu tawh i mehsuk mawk pen khawl hun ding kithei pha lo hi. Mite deihsakin maitai mahmah a, a kum a tam hangin a lungsim khangno mahmah lai hi. Pasian min tawh America khuapite-ah Gospel pai ding hanciam lai hi. Sia King Mang, Hau Pau leh Ngaih Lamte hih bang nu a neih uh hampha kasa mahmah hi. Pasian tawh a kikhawl thei nu a neih manun amau zong tu ni-in hih bangin Pasian in domto hi ding hi ci-in ka ngaihsun hi.

April 12, Pizing Ni in 1993 kum pana Western Seminaryah ka sangkahpih Bruce leh Anita Paden, tuni dong Congo a missionary sem lai amau innah ka hawh uh hi. A zi Anita pen Sweden mi hi a, a nu leh pate Africa gama missionary ahih manin amah zong Africa gama piang ahi hi. A tapa uh Samuel Paden,  Faith Baptist Church-ah ka kikhop lai (1993-1995) sungin ka Sunday school naupang hi a, mi hoih leh Pasian it mi hi. Tu’n ama’n New Yorkah painting company khatah nasem hi. A tanu uh Amy Paden zong lasiam mahmah ahih manin music scholarship ngah in Seattle-ah college kah hi. Tua panin law tawh kisai lunglutna lianpi hong neih ciangin a college kahna khekin tu’n Bachelor of Law, San Francisco khuapi-ah sin hi. Tua nitak lamin Dr. Donald leh Faye Smith (ka mentor leh professor) amau tawh hun ka zang khawm uh hi.

Zomi Association of USA-te (ZAUSA) makaihna tawh kum khat cin hungeelna Metro East Community Media Centerah nitak nai 7:00-10:00 in kizang hi. Hungeelna khempeuh video camera thum tawh kizaih ziahziah a, Nu Nian Khan Lun in hun hong uksak hi. Hun pat thungetna Pa Thang Suan Khup, President Zomi Innkuan Portland in a neih zawh ciangin USA dial paaina Lia Cing It Zam in hong nei hi. Zogam itna lasakna Lia Cing San Dim, Khup Tuang leh Kap Haute in hong awi ziahziah uh a, ZAUS thuvanpi William Kimpu in kum khat sung sep leh bawl mualsuahte pulakna hong nei hi. Pahtawina piakna hunah Pi S.B. Niang Go Cing, “Most Honorable Elder Citizen of 2010” by Asian Reporter for her testimonial book “Jesus Changed My Life” leh Rev. Dr. J.M. Ngul Khan Pau in “Zomi in Diaspora for World Evangelism” lungdampihna letsong kipia hi. Tua zawh ciangin ZAUS hanciamna tawh a kibawl Zolai Sinna (Learn Zolai) Pa G. Thang Khan Mung pulakna leh khahkhiatna hong nei hi. Zolai Sinna a kuama peuh in internet panin ki-en thei-in kisin thei dingin hong kikhahkhia pah ta ding hi. Thapiakna leh hanthotna Rev. Dr. J.M. Ngul Khan Pau in zang a, By-laws and Articles of Incorporation of ZAUS kipsakna leh lungdam kohna chairman Sia Zam King Mang in hong nei hi. Lamvui, lasakna leh khattang lasakna a kizat zawh ciangin Sianu Lucy Engjadim in hunkhak thungetna hong neihsak hi. Tua tawh ZAUSA kum khat cin hungeelna kizo hi. Hih vai khempeuh a sawt loin internet ah hong kikhah khia ding hi.

April 13, Pithai Ni in Tg. Hau Mung thusiamna tawh Sia G. Thang Khan Mung leh ko innkuan George Fox University, Newberg-ah ka pha uh hi. A mun ka tun uh ciangin palikte a campus na dim uh a, gas bomb (Chemistry laboratory panin) puak khap ding lauhna hangin mi khempeuh tua huang sung panin na kihem khia uh hi. Ko zong a university ka galmuh bek uh hi. Ka lungsimah bang hong suak masa pen hiam cih leh Pasian kiangah thungetna tawh ka phawk den uh hih university ko pai ni citciat in hih bang hong om sese deihna khat om hi dingin ka um hi. Tua mun panin kik vingvengin Pittock Mansionah ka pai uh hi. Hih innpi Henry Pittock in a lam hi a, amah Pennsylvania panin Oregonah 1853 kumin hong pem hi. Kum 19 a pha Pittock, sum leh pai bang mah nei loin Oregonian Newspaperah nasem hi. Kum 26 a phak ciangin Missouri pan a hong pai Georgiana Martin Burton, mi hau mahmah tanu tawh kiteng hi. Kum 1860 panin Oregonian Newspaper amah in nisimin suaksak a, sum leh pai hong nei-in midangte huh theih bangbangin huh uh hi. Tua Pittock Mansion innpi 1909 panin lam kipan a, 1914 kumin kizo hi. Hih inn sungah room 22 om in a huang acres 46 a lian leh Portland khuapi sangin pi 1000 a sangzaw hi. Hih innpi tuni in mi khempeuh et theih dingin om hi. Portland Khuapi Vaihawmte in kum 1964 in Pittock innkuante panin $ 225,000 tawh na lei uh hi. Portland khuapi na phak leh hih mun na hawh loh phamawh hi.

April 14, Nilai Ni in Institute of Intercultural Christian Communication (IICC) Executive Committee World View Centerah ka nei uh a, tua laiah devotional talk hun ka zang hi. Dimnu leh Toshi Mang nitak lamin Zomite kikhopna Pa Thang Suan Khupte innah va kihel uh a, Dimnu in Paunak 31 sung siksanin Numei Hoih Thu hansuahna va nei hi. Toshi Mang in pasal khangno paikhawmte Sia King Mangte innah kikholhpih hi. Amau nuta Zomite’n buhman leh bawngsa kankeu a kipan meh tuamtuam hong tawisak uh a, tuate a zing ciangin ko innkuanin ka ne uh hi. Zomite ki-itzia mawk pen, ann nangawn kitun vanvan hi mawk hi ve hang aw, ka ci uh hi. Hih banga i kigawlngaih i kideihsak ciangin khantoh gim nam kasa hi.

April 15, Laizing Ni in IICC Board Meeting kinei to lai hi. Mikangte tawh meeting i kah khop ciangin agenda tampi om leh zong kizo ziahziah in gen ding kisam mahmah bek kigen ciat ahih manin ei lak hi leh ni thum ni li khawng a zawh ding amau ni khat leh a langin hong zawhpih uh hi. Nitak lam nai 4 in Western Seminary lamah ka innkuanun ka paisuk uh a, nidanga lungleng mahmah kawma ka nasepna Milliken Hall khawng kava en uh hi. Tua ciangin July 1994- June 1995 dong ka omna inn zong ka va en uh a, a teng mite’n hong theih nawn loh hangun a inn kianga singkungte ka et ciangin kum 15 lai a maan (photo) ka kilakpih lai khawng mitkha-ah hong dawk kik hi. “Topa aw, hih bang hamphatna ka ngahna dingin kei kua hi a, ka pa innsungin kua ahi hiam” ci-in lungsim thungetna ka nei hi. Tua nitak nai 7 in Hau Paute innah annek khopna leh kikhopna hun ka zang uh a, Innkuan Cidam cih thu ka gen hi. Pasian ompihna hangin hih hunah thunget khopna leh lasak khopnate nuam mahmah hi. Tua zanin innkuan cidam hi thei dingin koh a paikhawm tengin thungetna leh thupha kipiak tuahna tawh hun ka zo uh hi.

April 16, Laithai Ni in Pa Thang Suan Khupte nupa leh Cing Tul Dim in ko innkuan Multnomah Falls-ah hong paipih uh hi. Hih water falls pen pi (feet) 620 panin hong kia-suk hi a, USA gambupah a nihna ahi hi. Kum simin mi million nih bangin hih mun pha thei tawntung uh hi. Tua ahih manin Oregon state adingin mite’n etnop a sak lakah nambat khatna ahi hi. Ko zong hih munah maan (photo) kizaih in tawl khat ka om zawh uh ciangin Crown Point lamah ka pai to uh hi. Hih mun pen Columbia kuampi etna dingin a hoih penpen mun hi a, Columbia luipi panin pi (feet) 733 a sang hi. A kuampi I etsuk ciangin vanleng tung pan a mualkuam et tawh kibatna om hi. Hih laiah inn Vista House, 1916 kum a kilam hi-in, Portland a hawhte adingin hih mun zong phak teitei ding a hoih khat hi. Tua panin ka ciah uh ciangin Thein Hong restaurant ah sun-ann lim mahmah hong nekpih lai uh hi. Hih restaurant ah June kha 1995 in Dimnu Portlandah hong tun tu’ngin ka lawmte Steve Tung leh Steve Kangte’n hong paipih masak na mun ahih manin lungsimah nunlui thu zong hong phawksak hi. Pa Thang Suan Khup tawh a pa Rev. Dr. Kam Khaw Thang tawh kisai thu kiho thei ka hih manun manpha kasa mahmah hi. Tua nitak lam nai 7:00 Alaska Airline 2599 tawh Portland nusia in Pasadena ka tung kik uh hi. Tutung khualzinna nek leh tak a kipan sum leh pai leh deihsakna thupha hong pia khempeuhte tungah Topa Pasian minin lungdam thu ka puak hi.