Ni Za Sum Thalawhna Lawhcing

By Hau Za Cin, Phuitong Liim

India kumpi in nam niam, khuata leh a khangto nailote ading sum muhna dingin a bawl uh National Rural Employment Guarantee Scheme (NREGS) kici a Zopau in Ni Za Sum Thalawhna pen a kumkhatna ahih hangin lawhcing mahmah a, mipi te in noptuampih in a diakin North East India ah kinoptuampih diak hi. India kumpi tungah lungdam hang.

Hih policy in a ngimna pen nam niamte leh a khangto nailote in kum khat sungin ni 100 sung sum thalawhna pia ding cih hi. Tua a sum thalawhna uh pan nitha sum tawh kipia dinga, inn kimin tua bang sum thalawhna ah kihel teitei dinga, kuamah kipai theilo ding hi, ‘employment guarantee scheme’ ahih manin. Tua banga kum khat ni 365 sungah innkuan khat in Ni 100 sum thalawh a neihleh a nektawm ding antang leh meh kisikzo ding cih lametna hi a, zong nekzon oltuam takpi hihtuak hi. Nisim nektawm ding kisam nawnlo in a om uh ciangin India mipite hong lungnuam dinga, hong cidam in, hong khanto dinga gambup khantohna hong suak ding cih a ngimna uh hi.

India suahtak zawh mualtungmi leh nam niamte dop kangna dinga policy lak pan innkuan kimin a phattuampih pen hilai ding hi.

Hih Ni 100 sum thalawhna lawhcing mahmah hi cih a kitheihna khat pen tu kum Christmas leh Kumthak khua khempeuh ah nopci mahmah hi. Inn kim in Christmas leh Kumthak sumdonna ah kumlui leh kumdang sangin piak pah ding neizaw deuh uh a, mi khempeuh hih Hun Lungdamhuai hun ah lawpciat in nuamtak, aamtak in zangciat uh hi. Khatvei nihvei anlim nekna ding ciangciang nidang banglo in ‘kihta nawnlo’ uh hi. Tua pen sangnaupang genthei taka laisim khat in kumpiza hong ngaha nidanga a nek zawhloh Bawngsa, Ngasa, Voksa hong lei ziahziah tawh kibang hi. Khantohna kidawkna, kilatna khat ahi hi.

Tua ahih manin tu kum Christmas leh Kumthak Pawi te ah khua gamla pen zong, khuata pen zong nopsa in lam ziahziah uh hi.

Topa in India kumpi hih bang mipi khantohna ding nasepna ah (policy making) thupha hong piaksak henla, a limcizaw, a lianzaw leh a thupizaw ah kalsang suan thei lai dingin hong makaihsakta hen. Hih bang policy bawlna ah Zomi ulian bangzah hiam zong kihelkha ahih manin amau zong a limcizaw khantohna program hong gelkhia thei zel dingin Topa mah in hong makaihsakta hen.

Nek leh dawn lungkham nawnloh ciang a nop lam (luxury) kilunggulh thei pan ahih manin ei nam niam leh a zawng mahmah laite zong i nuntak sung tomcik mite bangin a nop nuntakna i ngah theihna dingin hahkat in hih bang kumpi policy hoihtak in zangin kemcingin, puahtoto in thumaan tak leh hoihtakin zat kisin toto ni.

Leitung khantohna ah ei zong mite delhpha dingin hamphatna i ngah sunsunte siamtak, siangtho tak, thudiktak in zang ni.