Meiteite – Zomite’ Thupha!

Meiteite? Zomite‘ thupha?  Na ci kha ding hi.

Bang hang in Zogam hong buaisak, Zomite hong buaisakte peuh i thupha suak thei ding hiam na ci kha ding hi.

Meiteite Zomite’ thupha a hih dan ensuk ni.

• Zomite Zogam manphat zia hong phawk sak uhi: Zomite pen a tangpi in Zogam manphat zia a phawk kitamlo hi.  I neihsa nate sang in i neih nailoh nate ki lunggulh hi.  Tua bang in naupang lungsim ki pai lai hi.  Minam naupang cihna zong hipah mai hi.  “Zogam aw, hong taisan kei ning!”, ci-in la i sak ngaungau hang in, “US na pai nuam hiam?” kici leng a ut vive kihi vanglak ding hi! Meiteite in Zogam manphat zia thei uh a, a lom a tang in Kawlzang sung leh Cikha myone sung ah hong hon lut uhi.  Tua man in Zogam galkapte tawh January 13, 2010 ni in kikap tuah uhi.  Minam dang khat in i Zogam hong eng in, hong deihgawh na hi mawk hi.  En i it zo hiam?
• Zomite Common issue khat leh common enemy khat hong pia:  Zomite pen gam nih – Kawlgam le India – ah kiom hi – gam thum zong ci nuam lai kha niteh!  Ahizong in, i thu i la kituak theilo hi.  I buaipih kibanglo in, i sunmang, i tup i ngim kibanglo hi.  Tua bang kawmkal lak ah Meiteite in Zogam kepbit a kisapzia leh gal kibang khat (common enemy/isssue) hong pia uhi.  Hih (common enemy/issue) pen minam kipumkhatna ding leh kithutuakna ding a kisam mahmah khat ahihi.  I gal a kibatloh man in kum 50 val a tuam tek in ki kalsuan a, kuamah a suakta zo i om nai kei hi.  Ei gamsung mahmah ah namdangte in ei hong uk uh hi.
• Zomite hong ki pumkhat sak: Meiteite i common enemy hong suah uh ciang in Zomite leitungbup ah hong kipumkhat sak hi.  Saklamte, khanglamte kicicilo in Zomite hong gawm hi.  India Zomite’n Kawlgam sung Zomite loin Meiteite do theilo ding uh a, Kawlgam Zomite’n Meiteite leh Kawl galkapte India Zomite lo in do theilo ding uhi.  ZRAte sung ah Kawlpau leh Kawlgam sung thu a thei, a siam tam leh Kawlgam sung ah tangthei zaw deuh ding uhi.  Nung a kikapna zong kisamlo kha ding hi.
• I tangthu leh i tunna ding mun uh kibang hi – Zomi have a common destiny: India Zomite leh Kawlgam Zomite i ut in i ut kei zong i tangthu uh kibang ding a, i tunna uh zong kibang ding hi.  Khat khangto in, khat kiam theilo ding hi.  Khat hing in, khat si lo ding hi.  Khat pil in, khat hai theilo hi.  Khat mangthang in, khat in Zogam uk/kem zolo ding hi.  Khat vah in, khat kiallo ding hi.  Khat gualzo in, khat guallel theilo ding hi.

Meiteite Zomite’ thupha taktak hi!