Leitungbup Zomi Innkuan Kipawlna in Siamsin Seminar III Thupha Pia

Leitungbup Zomi Innkuan Kipawlna

USA, Canada , UK , Denmark , Norway , Sweden , Germany , India , Singapore , Malaysia , Philippines , Korea

November 24, 2009

To.

Zomi Siamsin Kipawlna

Universities – Myanmar

Tedim, Zogam

Thupha Puakna

Zogam Tedim khuapi a Zomi Siamsin Kipawlna, Universities – Myanmar in “Post 2010” thulu tawh, Siamsin Seminar – III a bawlna hun sung ah, Leitungbup Zomi Innkuan Kipawlna in thupha puakin hong muak thei ka hih manun, ka angtang mahmah uh a, ka lung uh akim mahmah hi.

Hih Siamsin Seminar – III ah akah kumpi thunei makai uliante, khuanu khuapate, khangnote leh Siamsin Sangnaupang khempeuh tung ah Leitungbup Zomi Innkuan Kipawlna in pahtakna leh zahtakna kahong pia uhhi.

Leitungbup Zomi Innkuan Kipawlna pen muntuam gamtuam a om, tuipi galkaai Zomi-te in minam khat, khua khat tui khat hihna siksan in aphuh Zomi Innkuan kipawlna tuamtuamte a kigawmkhopna phungpi ahi hi. Muntuam gamtuam a om Zomi Innkuan kipawlnate picing takin a dinkhit hangin a kigawmkhopna  Leitungbup Zomi Innkuan Kipawlna pen tu kum sung a kiphut zopan ahih manin, picing takin thu leh la kivaihawm zonailo hi.

Ahi zongin, Zomi Siamsin Kipawlna in kithusimna tawh hong muanbawl in panpihna ahong ngetna tungtawn in, Leitungbup Zomi Innkuan Kipawlna sung a kihel Zomi Innkuan kipawlna tuamtuamte pangkhawm in, ka hih theih zahun panpihna ahong puak kahi uhhi.

Leitungbup Zomi Innkuan Kipawlna’ Ngimna Bulpite sung ah Zogam leh Zolei, leh Zomi-te’ nuntak zia a khantohna dingin pan’khop theihna ding, Zomi minam buppi tawh kisai vaite vaihawmkhop theihna ding cih thute kikhung a, Zomi Siamsin Kipawlna’ mabante leh vaihawmnate tawh kituak ahih manin ka lung uh akim mahmah ahi hi.

Zomi Siamsin Kipawlna in gam leh minam khantohna ding ahi zongin, Siamsinte leh khangthak Zomi-te la’ptohna ding ngimna leh deihsakna tawh, haksatna tampi kawmkaal ah, Siamsin Seminar nabawl zawh manun Zomi-te minam maban lianpi khat a sem, a kalsuan nahi uh a, hih Seminar tungtawn in mailam hun ah Siamsinte in ih gam leh ih minam hong tawisang semsem ding hi uhteh cih teltak in ka thei uhhi.

Seminar thulu “Post 2010” tawh kituak in mailam Zomi-te dinmun ding in akisam mahmah thu leh la manpha tampi kisin ding ahih manin Seminar akah khempeuh hampha kahong sa mahmah uhhi. Hih thu tawh kizui in, thuhilh dingin akicial mipil misiam, minam makaite tung ah lungdamna ka ko uhhi.

Ih gam sung ah 2010 kum ciangin gambuppi tawh kisai vai lianpi khat akihawm ding hita hi. Hih gambup vai hawmna sung a kipanin Siamsinte in dinmun kician khat la-a, ih minam buppi in thudik, thumaan leh thuhoih a muh theihna dingun lam la’h zawhna dingin, Seminar sung panin ahong kithawikhia dingin lam-etna ka nei uhhi.

Seminar thulu “Post 2010” bangmah in, 2010 kum khitciang in tuni a ih minam dinmun tawh a kibang nawnlo, dinmun athak, zia leh tong, vaihawmna leh thu leh la athak tampi hong om ding hi. Tua hun ciangin, Zomi-te kimakaih-khiallo a, taangpi taangta in lam akhialh-lohna dingin Zomi Siamsin Kipawlna in thumaanna leh diktatna tawh thu khensiam a, mipi tung ah suakta takin pulak in, meivak bangin lam la’h tawntung dingin ka hong lunggulh uhhi.

Siamsin Seminar – III lungnopna leh suahtakna tawh lawhcing takin kibawl a, manpha takin taksuak in, Zomi Siamsinte leh ih minam buppi in khantohna leh kipumkhatna in ih neih theihna dingin, Anungta Pasian tung ah lungsim kituak takin thu ka ngen uhhi.

Lungkimna tawh;

Sd. xxx                                                                                     Sd. xxx

(Chin Do Kham, Dr.)                                                               (Go Sawm Khup , Pa )

Chairman                                                                                 Secretary

Board of Trustees                                                                     Board of Trustees