Lai Tawh Nasepna

Lai Tawh Nasepna By Rev Khup Za Go
(Lungdamna Aw, Vol. VIII, No. 10 & 11 Oct.-Nov., 1983 laimai 9-14 pana kiteikhia)
Lai lam khantohna leh nasepna i cih ciangin laibu leh thukizakna lai tampi bawl ding cihna bangin i bilah hong ging pahpah hi. A deihna bulpi pen tua hi masa loin pawlpi khantohna, gam khantohna leh gam mite noptuamna’ng lai tawh gen ding, pulak ding, hilh ding cihna hi zaw hi.

Lai tawh nasepna-ah a kisam thu lian li om hi.

A masain lai gelh siam mi kisam hi. Lai gelh siam mi hi dingin mi dang lai gelh siam minthangte laibu a sim ngei mi, leitung thupiang, gam sung thupiangte a thei, tua a theih leh a muh thute gam mite a hilh sawn nuam, gam mite a puah nuam mi hi ding hi.
Tua banga lai a gelh, lai a bawl siamte pen Mikang pau in writer ahi zong, Author a hi zong kici hi.

Thu gelh lai gelh siamte in lai bawlzia leh khet zia thei pah kim lo hi. Tua ahih manin sum nei, laibu bawlzia a thei khat in Writer pa pen a thaman ding a kilawm pia-in tua lai pen khenin hawmkhia hi. Tuapa pen publisher kici hi. Publisher-te in lai puah siam
laizek siam Editor kici tampi khasum pia-in nei uh hi.

Tua banga khet dinga a man ciangin publisher pa-in lai khetna setpi nei pah loin, set vai zong a thei khol lo lai a hih manin Laikhetna set neite kiangah thaman piak dingin khensak leuleu hi. Tua set neipa pen printer kici hi.

Printer in a khet zawh peuh ciangin a zuak pah dingin laibu sai khat a om kul hi. A zuak thaman a kipia ding hi a, ama tung panin mite in zuak thalawh sawn thei lai hi. Tua banga laibu saipa pen Bookseller hiam Salesman hiam kici hi. Laibu pen kigelhin, kikhenin a mansain a om hangin a kizuak khiat kei a, a kisim kei a, tangpite khut sung a tun kei leh, Writer-te, Publisher-te, Printerte in hahkatin phatakpi a sep hangun a mawkna suak thei lai veve hi. Sum khempeuh zong a mawkna suak thei hi. Tua ahih manin laibu zuakte tavuan a lian mahmah suak hi. Tua bangin laitui laidal man banah lungsim, thatang leh hun tampi beia a kisep zawh ciangin laibu kingah zo pan ahih manin laibu man zong tampipi hong tung thei hi.

Thuphuah siam, lai gelh siam kisam hi cih thu i gen zo hi. Tu-in i gen nop, i pulak nop leh tangpite i theihsak nop thute a hilh zia, a gelh zia (style) nam tuamtuam i gen ding hi.

Numei naupangte bek hi loin nupi papi dongin tangthu pen kingai nuam ciat a, ciapteh zong baih se ahih manin tangthu bangin kigen thei hi. Tapa taimang tangthute, Samari mi hoih tangthute zangin Jesuh in thu a hilh ciangin mite in tel nop sa-in, tu dongin tul thei lo hi. Hih banga gentehna thu, tangthu leh phuahtawm thute pen Mikang pau-in Short Story, Fiction, Novel ci-in nam tampi om thei hi.

I gen nop thute la-in kiphuak thei a, la tawh kipulak thei hi. Khangluite in ‘La i cih thu hi,’ a cih pen uh a man hi a, mi’n thu a gen nop pen uh la tawh a phuah ciangun mite lungsim bun zaw thei hi. Dahna, nopna, lungzuan thu cihte bek la tawh phuah theih hi
loin gam sung nuntakna thu, khangnote hansuahna thu leh Pasian thu thukte zong la tawh kigen thei hi. Ei Zomite in la i cih ciangin sak theih, lampih theih dingte bek i sa kha hi. Sak ding, ciin ding, ngaihsut ding la om thei hi. Lai Siangtho sungah David phuah Late a kici pen i sak theih a om phat loh hangin i simkhiat mun pen, biakna ah tha hong guan pen bu khat ahi hi. Sia Hau Go in, “Bang i ci Gamtat Ding Hiam?” cih Chin Magazine, 1971-72, Mandalay laimai 102 sunga leh Sia Gin Khat Suan in, “Mihingte Nam Li Lian Pha,” cih Zomi Magazine, 1975 laimai 19 sungate pen la hi a, ahih hangin kuamahin sa ngei lo napi kideih mahmah hi.

Na deih thute pen a lim tawh lah theih ding zia-in na gelh thei hi. Tuate pen Drama hiam, Play hiam kici a, tuate panin Cinema i cih dong hong suak thei ahi hi. A thu bek hi loin mit tawh gamtatna muh pah ding om ahih manin mite kilawp hi. Lai sim thei tam nai
lohna munte leh gamah kisam diak hi.

A gen nop thute a lim tawh laibu sungah lak pah zaw in sim ding tawm khat bek tawh laibu na bawl thei hi. Tuate pen Cartoon hiam, Comics hiam kici a, Kawlte bang siam mahmah hi. Zomite zong a siam kiukiu om kha ding hi napi’n tua bang laibu hong kibawl ngei nai lo hi. Lamka Khua Sudden Muanga kici in a bawl leh mi’n pakta mahmah hi.

Na hilh nop mite tungah laikhak bangin na gelh thei hi. Mipil sitni minthang Sawltak Paul in tua bangin Pawlpi mite a hilh leh, a laikhak a tul thei lo Pasian thu kihilhna a suak hi.

Na gen nop thu pen mi nih leh thum kiho bangin na gelh thei hi. Tua pen Dialogue kici hi. Mi khat in donga khat in a hilh, a dawng (Question and Answer) bangin zong kigelh thei hi. Hih teng banah nang ngaihsut tawmna tawh na gelh theih pah kei leh, Mikang lai
leh Kawl lai a kigelh, Zomite theih ding leh zak dinga kilawm na sak laibu khat teikhia leteh tua zong a piang thei lai hi. A tak takin tu ciang dong Zo paua lai kibawl a tam zaw pen ei pilna tawh ki-at hi loin midangte in a at uh, a khet uh, tua pen ei pau tawh a
kibawl tam zaw tham lai hi. Tua pen Zomite bek hi loin lai lama khangto nai lo mi nam khempeuh in a kipat zia uh hi kici hi.

Lai gelh zia pen a nam tuamtuam om thei a, tuate sung panin koi pen i siamna lam ahi hiam cih leh, koi pen tawh i thu deih pen gelh leeng a sim ding, a lei dingte deih dan tawh hong kituak kha thei pen ding hiam cih teel siam ding kisam lai hi.

Tui siam dingin laibu a sim tawh kisiam ngei lo hi. Tua mah bangin i laikung, laidal la a, sabuai ah dai dide a i tut nop matengin lai bawl siam kihi ngei lo ding hi. The Old Man and the Sea kici tangthu a gelh Hemmingway in 80 vei a puah phat zawh ciangin kikhen pan hi ci uh hi. Madras Christian Literature Service thuvanpi Dr. D. Francis in Johan bu pen la tawh bawl a, “Sawmnih vei ka puah phat zawh ciangin ka khensak pan hi,” ci hi.

Zomi graduate tampi sung panin lai gelh siam peel lo hong om ding hi ci-in lamen hang.