Gensiatna Bangci Puaksiam Ding?

Dr. J M Ngul Khan Pau’ laigelh, “ How to handle criticism” pan Zolai tawh a kitei khia sawn hi……… Editor

A teikhia: Sia Zam Khai

“Gensiatna pen pau khol lo-in om hithiatna tawh ol no takin kipeel thei hi” Aristotle. Mi khat aa dingin gensiatna ih cih in, singkung a nuntaakna ding van pan ong kia guahtui tawh kibang a, tua guahtuite in singzungte susia zah dongin khauh lo hi.” – Frank A. Clark

Nang sangin khua a mu nai lote na gensiat ma in, amau a na pantahte phawk in. – Unknown)

Gensiatna, kona, mawhsakna cihte pen mi hai khempeuh in seem thei lel a, mi haite’ nasep hi zaw hi. – Dale Carnegie

Steven Mills in a laigelhna, “We build People” cih thulu tawh a nuai-a bangin puaksiam ding na gen hi.

1. Gensiatna ngah ding kilamen khol in. Makai sepna sung pan kituak hi. Sepna bawlna tawh kisai gensiatna tuamtuam ong piang thei ding cih ngaihsun khol in, mipi zong thei sak khol in, a pian ma hi ta leh a pian saan laitak hi ta leh gamtat luheek zia kidawm in.
2. Nang leh nang kigum kei in. Gensiatna tungtawn in thu theih beh sawm zaw in. Lim kei ta leh na cidamna ding ahih manin, ne teitei in. Ong kigensiatnate lak ah kilambehna na ngah sunsunte ciamteh in.
3. Gensiatna san’ theih ding namte khen siam in. Mi’n ong gensiatnate thusim loh luatna leh thusim luatna pen lauhuai hi. Khuasik natna pen cancer bangin patau in, cancer natna pen awlmawh loh tawh kibang hi. Na lawhcin man in hamphatna a ngah dingte’ lam pan gensiatnate pen sang in.
4. Nang leh nang kikheem ke’n. Ahi takpi mah hiam ci in kisit kik in. A gen siam lote’ gensiatna pen san’ ding haksa hi.
5. Pasian mah kuppih masa in. “ Topa aw, kei nong gen nopna takpi hiam? Hih gensiatna pen ahi takpi mah in ngaihsun phawt in. Pasian in nang ong kep nop zawk man zong hi thei hi.
6. Ong gensianate’ kha-theihsakna pan maw lungsona pan maw cih khen siam in. Kamsanna thupha a ngah khat in hehpihna kha thupha a ngah khat sangin tamvei gensia zaw ding hi. Dam tak a pai a deih khat in, a kinawh nuamte gensia mun hi. Eite in, ih hatna teng leh mite’ hat lohna teng bek ki-en kha den hi.
7. A gensiatna thute a namnam in khen in. Na upna maw, na kalsuan dan maw, nang mahmah ong gensia uh maw cih thei in. Tua hi leh, bang cih ding cih na thei ding hi.
8. Nang’ thu ong kin pih uh lungdam in. Na lawmte hi ta kei leh, lawm bangin tuat in la ong lunghihmawh pihna uh na lungdamna lak in. Tua hi leh, amau muhna ah, kilambeh ding a ut khat in ong mu ding hi.
9. Gensiatna pan khat leh khat a zo ding kidemna suak sak kei in. Mimal kikapna suak baih hi. Ei lam pan ih manna ih lah nop ciangin, a thu tawh sangin a mi peuh kido kha thei hi. Gal zawhna ding pawlkhatte pen kido na ah lelhna pan zong hi thei ahih manin kisin ni.

10.  Gensiatna pen khantohna ding hamphatna hi. A hoih ding deihna tawh gensiatnate la in. David nuntaakna pen, a lawm Nathan in thumaan tawh a gensiat manin kikhel hi.

11.  Gensiatna tawh kiteh in. Gensiatnate na puaksiamnate in na nuntaakna ah Pasian’ hehpihna na san lam ong kilang sak uh ahi hi. Kha lam kitehna vanzat khat ahi hi.

12.  Na khialh leh kiphelh kei in. Nang dik teh, kei khial ing, ci in thuum in.

13.  Thuk kik sawm kei in. Kigensiatna pen na vilvel ahih manin, puak hak hi. Thuk kik sawm lo in, Kha tha tawh kihem in. Ong kigensiatnate mipi mai ah thu nget leh thugen kawmin hem dawn kik se kei in. “Thuk kikna in kei’ aa hi” Pasian in ci ih..

Thu dam tawh bangci gensiat ding:

A zate in nuam a sak loh ding lau in, kua mah a gensia nuam lo mi tampi om hi. Ahi zongin, thu dam tawh gensiatna pen deih huai hi. Hoihna a piang sak gensiantna pen ngaihsut kholhna tawh kiseem thei hi.

1. Huh nuam taktak in. Ong pii muh ding na ut man hi sak kei in.
2. Nang’ tung ah ong kihih leh na deih dan lian in kam pau in la seem in.
3. Hun hoih ngak in. A lungkim loh laitak a buai laitak pen hun hoih hi lo mai thei hi.
4. Phat bawl le cin ong sang siam ding hi.
5. Na huh nop lam thei sak in. Ong deihsakte’ gen pen kisang thei baih hi.
6. Kam siam in. Ahi bang na genna tawh mi heh lo zaw a, na gen siam loh man in kizadah thei hi.
7. Na gen thute na ngaihsun takpi ding hi ci-in khamuang in na om lam, a tawpna ah thei sak in.
8. King’s College ah president a seem Robert Cook in hi bangin na gen hi. Pasian’ nasep a kipat tung lai in, gensiatna pawlkhat ngah hi.

Thu a kup pih ding Laisiangtho a thuuk theih mahmah pawlpi keem lawm khat, Harry A. Ironside, kiang ah pai in dong tangial hi. Cook in a ki gensiatnate bang cih ding cih a dot ciangin, “ Rob, ong gensiatna a hi takpi thu ahih leh kikhel in. Ahi lo pi ahih leh, manggilh in,” ci in a dawng kik hi.

Norman Vincent Peale in, “A tam zaw pen kigensiatna in ong keem a, kiphatna in ong susia zaw citciat hi” ci hi. Pasian in mi hoih zaw, makai hoih zaw dingin ong bawlna hi ci in ih san theih leh gensiatnate puak dan i siam ding hi.