Food Aid Concert for Chin State Florida Ah

January 29, 2010 nitakin Florida state Hollywood khua-a Performing Arts Center ah Zo gam tawh kisai kial a tuak Zomite huhna ding sum zonna in Concert lianpi khat kibawl hi. Hih vai tawh USA lam ah a kaikhawm Salai Elijah (?) ong pai in, United Nationals Organization Burma USA( www.unobusa.org ) kici Kawl gam pan Kawlte’ makaihna tawh minam leh biakna deidan lo ni haksatna a tuakte huhna dingin kipawlna in innteek seem in, Florida Zomi Innkuan tawh vaihawm khawm uh hi.

Kawl gam pan lasiam minthang Sung Tin Par, Kabya Bwe Moo, Me Me Khel+Htoo L Linn leh Lashio Thein Aung-te in lasak man sum la lo in a siamna uh pia khia hi. Music tumte pen, Pa Suanmang (Keyboard), E.Tuang(Lead), Sangpi( Drum), Thangbawi(Rythm) leh Tg Nungbawi(Bass) ahi uh hi. Tickets $ 40 man leh $ 30 man in kizuak a, naupang kum 12 pan a nuai siah a mawkna in kilut sak hi. Kipat ma in hih sum zonna thu, Zo gam ah kial tunna thu, a huh huaina thu gen hi. Tua khit ciangin Music tumte in a siamna uh tawh mipite ong muak uh hi.

A lungdam huai khat ah, hih pawi pen Zomi Innkuan zong innteek a sepna ahih manin, Florida Zomi Innkuan min a nung ah kician kisuak sak hi. Music tumte in zong Zopuan mah silh uh in, vaang om mahmah hi.

UNOB makaipa in huhna kingah sum $ 2000 Salai Elijah tung ah pia a, a ma’n zong lungdamna thu leh sumte koi cih kizat cih tawm gen hi. “Hih huhna pen, haksatna tuak Zo gam ah om Zomite‘ tung ah kipuak ding a, a kizat dan pen, a kizat khit ciang khat vei ong kiza sak kik ding hi”, ci hi.

Lasate in, la dawng 5 ta bang kizom in sa uh a, a tawpna ah, nidang la siam minthang Lashio Thein Aung in sa hi.

Hih sum zonna ding lasak pawi ah Kawlte in Zo gam aa ding huhnopna tawh makai in seem uh ahih manin lungdam huai mahmah hi. Zomi innkuan leh Zomi khangnote zong tum theih tumna leh sep ding bawl ding nengneng tawh kipia khia uh hi.

Ahi zongin, Zomi’ pawlkhatte in, hih huhna sum kingahte pen, khamtung ah a kipuak takpi mah diam, a kipuak takpi mah leh zong Tedim gam lam ah a kipuak takpi mah diam, cih muan mawhna tawh hih pawi tha pia lo uh hi. Pawi ah a kihel, Zomi khat in, ” Bangbang ahi zongin, mite’n a theih ngei loh uh Haiti zinling vai ah zong sum mawk piak buang uh hi ven, ei zong Tedim gam sung ah a lut lian kei zongin Zo gam sung ah a lut ding khat suak ahih ciang, hih bang vai om mengmeng lo ahih ciang, tha piak huai lel ee” ci hi.

Thupuak, Neng Pau, Miami