DHCS Degree Lakna Leh ITI Thu

DHCS DEGREE LAKNA LEH ITI THU

DHCS Doctor of Humane Christian Service hi a, Christiante in Mihingte aadingin nahoih asemte pahtawina Honourary Doctorate degree ahi hi. Hih DHCS apai Sangmin ITI= Immanuel Theological Institute hi a, Yangon khuasung laizang a om Kawlgam Tuiphum Pawlpi lianpen ahi Immanuel Baptist Church pawlpite phuat Lai Siangtho Sang ahi hi. Hih pawlpipen Kumpi theihpih masapen Tuiphum Biakinn hi a, Kawlpi Biakinn minthang Sule Pagoda mai ah omin Christian akici mite angtanpih, kisaktheihna leh Christian min cih hangsan tak a ilawh ngamna Biakinn ahi hi. Judson Topa akipia Biakinn masapen ahih manin Kawlgam sunga Biakinn om masapen cileng kikhiallo ding hi. Eimite theih U Naw Biakinn pen Kawlgam Christian masa kayin mi U Naw phawkna biakinn hi a, tua Biakinn sangin IBC pen Yangon khuapi laizang a a om, amin nei mahmah ahi hi.

ITI min DHCS leh DHSS degree apiak masakna uh hi a, DHCS pen Christiante lak ah Biakna lam leh Leitunglam(kumpi, Social development) asemte kipia thei hiin DHSS=Doctor of Humane Social Service hi a, Christian ahilo, mihingte phattuam nadingin nahoih khatpeuh asemte kipia ahi hi. Tutungin DHCS degree ngah ei 5 lak ah Lai Siangtho Sang phuante panin 1.Rev.Dr. Huat Cin Thang(Founder, Gideon Mynamar Bible College + MICM-Kalaymyo) ; 2. Rev.Dr. On Za Dal(Founder, Rhema Bible College for Mission & Seminary-Kalaymyo) ; 3. Rev.Dr.Cing Khan Mung( Founder, South East Asia Mission College & Church of God Prophecy-Yangon) hi a; 4. Ministry + Sang aphuan Dr.Lang Khai Thawmte(Founder, GNI Ministries-Kalaymyo ) ; 5.Christiante makaihna ahi World Vision Social Development panin Dr. Suan Khan Mang( Manager, World Vision-Tedim) leh Kawlte 2 kipia hi. Alamdang takin tukumin Christian ahilote nangawn kipia a, DHSS akipia mi 2 te: Dr. Percy Lao(Kayin mi) – Datsi(petrol) 10% leh tui 90% tawh mawtaw ataisak theipa hi-in lamdang zong kisa hi. Adang khatpen Dr.Aye Lwin hi a, College Professor lui khat ahi hi. MA/MMin 2 leh BTh 11 kipia hi. MICM tawh Joint Degree kipia khawm a, MICM ah MA/MMin/MRE 70 leh DD 2 kipia hi.

Immanuel pawlpi leh ITI Siapipapen Rev.Dr. Paul F. Johns, BSc, BA, DPhys (Med.), MDiv, DD, DMin, DTh, DHLitt, PhD hi a, Assistant pastorte- Rev.Dr. Christie Mawia(Mizo), Rev.Dr. Yawlah(Kayin) , Rev.Dr.Samson Din(Mivom) hiin ITI Siate lakah Doctor ngah 9 om hi. ITI in UBS-Yangon leh MICM-Kalaymyo tawh Joint Degree Program neiin degree piakhawm uh a, kumsimin degree ngah 50 tungsiah phaden a, thupi mahmah hi.

Dec.4,2009 ni zingsang nai1000 hunin Degree piiakna kipan a, sun 1200 pawlin kizo hi. Hih Degree piakna ah Rev.Dr.Pau Khan En, Rev.Dr.Pum Suan Mung, Rev.Dr. Thawng Za Mung, Dr.Gin En Cin, Professor Dr. Nang Suan Kham leh Rev.Go Cin Zam(OM), Sia Khual Lam Mang, Evan.lang Do Khup,Sia Kam Kho Pau, Sia Pau Za Do cihbang leh adang Ulian tampi in hong uap uh hi. Ko DHCS angah mi 3- kei leh Sia On Za Dal, Sia Cing Khan Mungte kigawmin Church of God(Porphecy) Biakinn ah Degree lopna hun 100-300pm sung neiin zing-an nitak nai400 pawlin kane pan uh hi. Lopna hunsung ah Doctor ngahsate in angah thak 3te aadingin thu hong nget sak uh hi. Lahoih nono zong kisa hi. Immanuel Degree piakna lah ah mi atampen hi ciin kiciamteh hi.

Lungdamkohna: Mite aa dingin bangmah hita kei leh ko aa dingin athupi mahmah khat ahi hi. Hih Doctor degree ngah theihna dingin hong pia I Pasian, nulehpa Sanggam, zilehtate, hong pai mimal leh hong pai khalo, hong phawk-thungetna hong neihsak dente tungah lungdamna kong ko uh hi. Sumlehpai, thalehngal, hunlehni hong beilawh hong gimpih mite tungah lungdamna kong ko kik uh hi.

Sia Lang Khan Khai