Bang Teng In Zomi Siamsin Kipawlna Thanemsak?

Zomi Siamsin sungah ka kihelna ah lawm le gual tampi tawh bang hang tuni dong kithanem mahmah lai hiam, cih thu ka na kilimkum den uh a, tua thu sung pan thu thum hang in thanem hi ci ung. Tua thu thumte hong hawm nuam ing. Nong kikup pih nadingun zong hong thum ing.

1. Nu le Pa : Nulepa in Siamsin sung kihel pen tha hong pia masa lo uh hi. Met nading bangmah om kei ci-in kihel sak nuam masa lo uh hi. A kihelte sungpan a gualzo a lawhcing te hong en lo in a guallel le a picing zo nailo te tawh genteh in Siamsin sung a kihel ding khak uh hi. Ngah nading omlo ci in ngahna ding a omloh na tawh kihelsak nuamlo hi. Hunbei ci uh hi. Aih hang a taktak in Siamsin sung hong kihel na a hun bei le sum bei sangin a lawm agualte tawh a kithuahna ah sum bei a tamzaw kei tam cih hong ngaihsun nailo uh hi.
2. Pawlpi: Pawlpi ka cih ciang in biakna hilo hi. I pawlpi ciat kithupisak hi. Pastor te tate tampi tak hong kihel lo aih ciang, Pawlpi sia te zong a tamzaw in thapia lo hi ci in ngaihsun ing. Tua ban ah Siamsin sung nasepna pen pawlpi sung nasepna zah in thupi salo uh hi. Pawlpite mahmah ing zong no i Siamsin lel dih ci in a mau zong tua lungsim vom pah uh hi. Siamsin sung hong kihelna hangin pawlpi sungah thanem in a puk pah ding kisa phial uh hi. Pawlpi in Siamsin cih pen pawlpi kantan in a kihel huai kipawlna khat in hong ngaihsut pih zo nai lo hi.
3. Amau mahmah: Amau mahmah in a kihel huai kipawlna khat in hong ngaihsun lo uh hi. Thanemna bek mu in a hoihna lam hong enlo uh hi. Amau zong thu hoih khat a gel khoppih theih lam kitheilo in a mah zong Zomi Sangnaupang khat hinapi No Siamsinte ci in makaite le nasemte hong sam zen hi.

Hih a tung a thu thum hangin Zomi Siamsin Kipawlna thanem hi ci in ka na ngaihsun uh hi. Tua ahih manin Zomi sungah tha i neih semsem nading le i khantoh semsem nading in kingaihsun in kipuahpha ciatni.

Tg Zam Thuam
Pawllutang
Zomi Siamsin Kipawlna (Central)